Израиль шинэ суурин барихаа зогсоолоо

Израиль улс маргаантай газар нутаг дээр барьж буй шинэ еврейн суурингийн ажлаа зогсоожээ. Энэ төслийг эргэн харах тушаалыг Ерөнхий сайд Биньямин Нетаньяху өгсөн байна. Израилийн эрх баригчид Баруун эрэг болон Зүүн Иерусалимд еврейн суурийн байгуулж, мянга орчим байшин барих төслийн тендерийг зарлаад байсан юм.

“Тель-Авив еврейн суурин барих ажлаа зогсоохгүй бол бид үүнийг хэлэлцээг зогсоосонтой адилаар хүлээн авна” хэмээн Палестины төлөөлөгч Саеб Эрекат мэдэгджээ.

Хятадад гоонь залуусын баярыг тэмдэглэв

Хятадад арваннэгдүгээр сарын 11-нд гоонь залуусын баярыг өргөн тэмдэглэв. 1990-ээд оны эхээр хятад оюутнууд Дурлалт хосуудын баярыг (хоёрдугаар сарын 14) сөргүүлэн гоонь залуусын өдрийг тэмдэглэх болсон нь улам өргөн дэлгэр болсоор байна. Энэ өдрөөр дурлалт хосгүй залуус бэлэг солилцон, хамтдаа оройн зоог барьдаг. Интернэт дэлгүүрийн эзэд энэ баяраар халаасаа түнтийлгэх шиг л болдог. Хятад залуус ч онлайн худалдаанд ихэд татагдах болжээ. Гоонь залуусын баяраар 800 мянган хүргэгч, түгээгч ажиллаж онлайн худалдааны барааг эзэнд хүргэдэг байна.