Tuesday, December 22, 2015



Хамгийн алдартай улаан дэнлүүний газрын эзэн нас баржээ

Францын хамгийн алдартай улаан дэнлүүний газрын эзэгтэй, алдарт мадам Клод Ницца  хотод 92 насандаа өөд болов. Парисын Елисейн талбайн хажууд байдаг дээд зэрэглэлийн “Хайрын шилтгээн”-д 500 гаруй бүсгүй ажиллаж байжээ. Мадам Клод дэлхийн хамгийн нөлөө бүхий хүмүүст бүсгүйчүүдийг “нийлүүлж” байснаа нэг бус удаа батлан ярьж байв. Францын хэвлэлд бичиж буйгаар, түүний үйлчлүүлэгч дотор АНУ-ын Ерөнхийлөгч Жон Кеннеди, Ливийн лидер Муаммар Каддафи, жүжигчин Марлон Брандо, Ираны шах болон өөр олон алдартнууд байсан аж. Эсэргүүцлийн хөдөлгөөний дайчин байсан мадам Клод “Хүмүүс үргэлж мөнгөөр ав ч байдаг хоёр л зүйл байдаг, хоол, секс. Хоол миний хийх ажил биш” хэмээн хэлж байжээ. Мадам Клод татвараас зайлсхийсэн, биеэ үнэлэгчдийг зуучилсан хэргээр хоёр удаа шүүхэд дуудагдаж байжээ.

Иракийн арми Рамади хотыг чөлөөлөхөөр дайрлаа

Иракийн цэрэг тавдугаар сараас хойш “Исламын улс” бүлгийн хяналтад байгаа Рамади хот руу томоорон дайралтыг эхлүүлжээ. Зэвсэгт босогчид болон АНУ тэргүүтэй холбоотны агаарын хүчний дэмжлэгтэй дайралтад орсон Иракийн цэргүүд хотын төв хэсэг рүү хөдөлж байгаа мэдээ ирж байна. Рамади хотыг чөлөөлөх ажиллагаанд хэдэн сарын турш бэлдсэн юм. Энэ үеэр лалын босогчдыг нийлүүлдэг замыг хааж чадсан бөгөөд энгийн иргэдийг Рамади хотоос гарахыг  уриалжээ. Анбар мужийн нийслэл Рамади хотод өнөөдөр “Исламын улс” бүлгийн хэдэн зуун дайчин байрлаж байгаа аж. Иракийн арми тус хотыг нэг сарын дотор чөлөөлөх зорилт тавьж байна.

60 цагийн дараа амьд олдлоо

Хятадын Шэнжэнь хотод хөрсний нуралт болсноос хойш 60 цагийн дараа барилгын нуранги дороос нэг хүнийг амьд байхыг олжээ. 19 настай залуу нурангид даруулсан ч амьд үлдэж чадсан байна. Уулын хөрс нурсны улмаас тус хотын 30 орчим байшин барилга нурсан юм. Нэг хүн амиа алдаж, 70 орчим хүн сураггүй болоод байна. 100 орчим метрийн өндөр толгод дээр асгаж байсан барилгын хог хоёр жил хуримтлагдсаны эцэст хөрсний нуралт үүсгэсэн хэмээн мэргэжилтнүүд үзэж байгаа аж. Бороо ихээр орж, хөрсийг зөөлрүүлсэн тул барилгын хог гулсаж нурсан бололтой. Аврах ажиллагаанд мянга орчим хүн оролцож байна.

Грекийн эрэг дээр дүрвэгчид живжээ

Ойрхи Дорнодын дүрвэгчидтэй завь Грекийн Фармакониси арал орчмын Эгийн тэнгист сүйрч арван хүн амиа алдлаа хэмээн Reuters мэдээлэв. Эргийн харуулын цэргүүд 13 хүнийг аварч чадсан байна. Аврах ажиллагаанд нисдэг тэрэг, эргүүлийн хурдан завь, хувийн хөлөг онгоц оролцжээ. Цагаачдын зургаан метр урт завь хөмөрч живсний дараа тэднийг илрүүлсэн аж. Фармакониси арал нь Туркийн хилээс холгүй байдаг ба Сири болон бусад хөрш орны иргэд Европ руу орохын тулд тус арлыг зорих нь элбэг байдаг. Сүүлийн нэг жилд Еврод руу орсон цагаач, дүрвэгчдийн тоо нэг саяыг даваад байна. 



Amnesty: ОХУ-ын агаарын довтолгоонд Сирийн 200 иргэн амиа алдлаа

ОХУ-ын нисэх хүчин есдүгээр сарын сүүлчээс хойш Сирид явуулсан агаарын довтолгооны улмаас Сирийн 200 орчим энгийн иргэн амиа алдаж, нөхөж баршгүй хохирол учирсан хэмээн хүний эрхийн Amnesty International байгууллага мэдэгдлээ. Тус байгууллага 16 гэрч, эмч нар болон хүний эрхийн бүлгүүдээс авсан  ярилцлага, мэдээлэл дээр үндэслэн дээрх тооцоог гаргасан байна. Amnesty International Оросын нисэх хүчин есдүгээр сарын 30-наас арваннэгдүгээр сарын 29-ний хооронд Хомс, Хаме, Идлиб, Латаки, Алеппо хотын дүүргүүдэд өгсөн цохилтод дүн шилжилгээ хийсэн юм. Ойр хавьд нь цэрэг, дайны ямар ч тодорхой бай байхгүй байхад зургаан цохилт арваад энгийн иргэний аминд хүрсэн гэжээ. Тухайлбал, агаарын цохилт орон сууц, эмнэлэг, зах, лалын сүм дээр ирж байсан аж. Арваннэгдүгээр сарын 29-нд Идлиб мужийн Ариха хотын зах дээр Оросын гурван пуужин унаж 49 энгийн иргэний аминд хүрсэн хэмээн үзэж байна.
ОХУ-ын эрх баригчид олон улсын хүмүүнлэгийн эрхийг ноцтойгоор зөрчсөн хэмээн илтгэлд онцолжээ. Мөн оросуудыг хүн ам ихтэй газарт удирдлагагүй тэсрэх бөмбөг, олон задардаг тэсрэгч ашиглаж асар их хохирол учруулсан хэмээн буруутгасан юм. Одоогоор Кремль эдгээр буруутгалд ямар нэг хариу тайлбар хийгээгүй байна. Оросын нисэх хүчний онгоцууд “Исламын улс” болон бусад хэт даврагч бүлгийн байрлалд цохилт өгч байгаа хэмээн Москва мэдэгдэж байв. Иймэрхүү илтгэлүүд нь ОХУ-ын Сири дахь ажиллагааг харлуулах гэсэн оролдлого хэмээн нэрлэж байсан юм.

Сири дахь лалын босогчдын цэрэг, стратегийн байгууламжид цохилт өгч байгаа Оросын нисэх хүчний довтолгоонд энгийн иргэд амь үрэгдэж байна гэх буруутгалыг “мэдээллийн довтолгоо” хэмээн Ерөнхийлөгч В.Путин нэрлэсэн билээ. ОХУ Сирийн Ерөнхийлөгч Башар Асадын хүсэлтээр есдүгээр сарын 30-нд агаарын довтолгоог эхлүүлжээ. Оросын онгоцууд Сирийн тэнгэрт хөөрөхөөс өмнө оросуудын довтолгоонд энгийн иргэд амь үрэгдлээ гэсэн мэдээлэл гарч байсан аж. ОХУ “Исламын улс” бүлгийг бус, Б.Асадыг эсэргүүцдэг аядуу сөрөг хүчний бүлгүүдийг довтолж байна хэмээн өрнөдийн орнууд нэг бус удаа мэдэгдсэн. АНУ тэргүүтэй холбоотны эвсэл “Исламын улс” бүлгийн байрлалд жил гаруй хугацаанд цохилт өгч байгаа билээ. 

Monday, December 21, 2015



Кабулд АНУ-ын иргэн амь үрэгджээ

Афганистаны Кабул хотод АНУ-ын иргэн Лиза Акбари амиа алдсаныг Төрийн департаментын төлөөлөгч Жон Кирби баталлаа. Тэрээр амь үрэгдсэн иргэний хувийн амьдрал, гэр бүлийг нь хүндэтгэх үүднээс өөр дэлгэрэнгүй мэдээлэл өгөх боломжгүй гэв. Лиза христос шашны World Vision хүмүүнлэгийн байгууллагад ажиллаж байжээ. Хэд хоногийн өмнө Афганистаны Баграм хотод алан хядагчийн халдлагад Америкийн зургаан цэрэг амь эрсэдсэн юм. Мөн Кабул дахь дипломат төлөөлөгчийн газар пуужинд өртөж дэлбэрэлт болсон аж.

Аргентины Ерөнхийлөгч иргэддээ туслахаа амлав

Аргентины шинэхэн Ерөнхийлөгч Маурисио Макри үндэсний валютын ханшийн уналтыг нөхөхийн тулд Зул сараар ядуу гэр бүлд тусламж үзүүлнэ хэмээн амлалаа. Тэрээр хэвлэлийн хурал дээр мэдэгдэхдээ, үндсэн барааны үнэ өснө, тиймээс найман сая хүнд тус бүр 400 песоны (31 доллар) тусламж үзүүлнэ гэжээ. Энэ талаар пүүс компаниуд болон үйлдвэрчний эвлэлтэй хэлэлцээ хийж байгаа аж. Нийтдээ 3.3 тэрбум аргентин песог нөхөн төлбөрт зарцуулах юм. Валютын ажиллагаа, хөдөлгөөнийг хязгаарласны дараа аргентин песоны ханш 42.6 хувиар унасан ажээ.

Алтны уурхайд 13 хүн амиа алдав

Гвиней улсын зүүн хэсгийн алт олборлох уурхайд нуралт болсны улмаас13 хүн амиа алдлаа хэмээн Reuters дамжуулав. Тэдгээр хүмүүс хаагдсан уурхайд хууль бусаар ажиллаж байсан, энэ осол хэд хоногийн өмнө болсон хэмээн орон нутгийн түшмэл мэдээллээ. Баруун Африкийн энэ улсад ашигт малтмалыг хууль бусаар олборлох нь тун аюултай, золгүй тохиолдол гарах нь элбэг байдаг ажээ. Эрх баригчид хууль бус олборлогчдыг зогсоох гэж оролддог ч үр дүн гарахгүй байна. Бүс нутаг дахь ядуурлын улмаас хаагдсан уурхайд нэвтрэх иргэд хэнд дийлддэггүй ажээ.

Энэтхэгт үхэртэй селфиний уралдаан болов

Энэтхэг улсад олон нийтийн сүлжээгээр үхэртэй хамгийн шилдэг селфи хийх уралдаан болжээ. Энэ онд тус улсад үхрийн махыг хүнсэнд хэрэглэх эсэх талаар том маргаан дэгдсэн юм. Индиузмд үхрийг ариун амьтан хэмээн үздэг билээ. Энэтхэгийн ихэнх мужид үхэр нядлахыг хориглосон байдаг. Үхрийн нөхцөл байдалд олон нийтийн анхаарлыг хандуулах зорилгоор дээрх уралдааныг зохион байгуулжээ. Үхэртэй шилдэг селфи хийх Go Seva Parivar уралдааны ялагчийг олон нийтийн сүлжээгээр тодруулж зарлах юм. 


“Исламын улс” хэрхэн санхүүждэг вэ

Өрнөдийн тагнуулын алба террорист бүлгүүдийн санхүүжилтын талаар мэдээлэл цуглуулсаар байна. Тэдний нефтийн дэд бүтцийг бөмбөгдөх нь жихадист дайныг тэтгэж байгаа санхүүгийн бүтцийг устгахад хангалтгүй гэдэг нь батлагдаж байгаа аж. Өнгөрсөн долоо хоногт холбоотны хүчин “Исламын улс” бүлгийн санхүүч Абу Салахыг устгаснаа зарласан. Гэвч газраар цэргийн ажиллагаа явуулахгүйгээр 30 гаруй мянган дайчдыг цалинжуулж дайн хийж байгаа санхүүгийн бүтцийг устгахад маш хэцүү хэмээн Financial Times-т бичжээ.

Нөөц

Холбоотны хүчний тагнуулын албанаас мэдэгдэж буйгаар, “Исламын улс” ойрын гурван жилд дайн хийх хангалттай нөөц, орлогын эх үүсвэртэй ажээ. Тус бүлгийн санхүүгийн эх үүсвэрийг тодруулахдаа экс командлагч нар, Ирак, Сирийн эрх баригчид, холбоотны дипломатчид зэрэг олон эх сурвалжийг ашигласан байна. Сүүлийн нэг жилд “Исламын улс” бүлэг шашны шалтгаанаар зөвтгөдөг дээрэм, эд хөрөнгө хураалт, нефтийн худалдааны татвараас орлогынхоо ихэнх хэсгийг бүрдүүлжээ.
Холбоотны хүчин өнгөрсөн сараас эхлэн тус бүлгийн нефтийн цооногуудыг бөмбөгдөхөөс өмнө террористууд түүхий нефтийн худалдаанаас жилд 450 сая долларын орлого олж байжээ. Нийтдээ жилд 900 сая доллар олж байсны 70 хувийг нь дайны санхүүжилтэд зориулж байсан хэмээн судлаачид үзсэн юм. “Исламын улс” бүлэг гол дайчдынхаа цалин хөлсөнд сард 20 сая доллар, бусад цэргүүддээ 15 сая доллар зарцуулдаг аж.

Дайчид

Тагнуулын албадын тооцоогоор “Исламын улс” бүлэг 30 мянган дайчинтай. Гэвч байнгын болон түр дайчдыг нэгтгэвэл энэ тоо 50-70 мянгад хүрнэ гэж үздэг. Сүүлийн үед тэдний орлогын үлэмж хэсэг нь устгахад тун хэцүү эх сурвалжаас бүрдэх болжээ. Тиймээс энгийн иргэдийн аминд хүрэлгүйгээр санхүүгийн эх үүсвэрийг нь таслах боломжгүй болж байгаа аж.
“Исламын улс” бүлгийн эгнээнд байлддаг гадаадын террорист сарын 150 долларын үндсэн цалинтай. Үүн дээр нэг байрлалаас нөгөө рүү шилжихэд 200 долларын нэмэгдэл авдаг байна. Мөн цэргийн гутал, хувцсаар хангаж, дайчдын эхнэрүүдэд тэтгэмж олгодог аж. Гэрчүүдийн баталж буйгаар, “Исламын улс”-ын дайчны сарын орлого 800 доллар хүрдэг бололтой. Тус бүлэг цагдаа, тагнуулын албаны ажилтан, татвар, торгууль цуглуулдаг дотоодын аюулгүйн албаны туслахуудаа цалинжуулдаг аж. Тэд дотоодын аюулгүй байдалдаа сард 15 сая доллар зарцуулдаг болохыг тогтоогоод байна. “Исламын улс” бүлгийн цагдаагийн нууц алба буюу Амният нь халифатын газар нутгаас давж Турк, Иорданд хүртэл үйл ажиллагаа явуулж байна. Тэд утасны яриаг чагнах системд хөрөнгө оруулж байгаа мэдээлэл иржээ.

Эрүүл мэнд, боловсрол

Тусгаар улс байгуулах санаархалтай “Исламын улс” бүлэг Сирийн газар нутгийн талыг, Иракийн гуравны нэгийг хянаж байна. Зарим улс орноос илүүтэй газар нутгийг хяналтдаа байлгадаг босогчид “иргэд”-ээсээ татвар авч орлого бүрдүүлэх санаа сэджээ. Тус бүлэг үнэнч гишүүддээ мөнгийг харамгүй тарааснаар дайны үр дүнтэй машиныг бий болгосон хэмээн мэргэжилтнүүд үзэж байна.

“Исламын улс”-ын эзэмшлийн газар нутаг дээр байдаг эрүүл мэнд, боловсролын байгууллагууд сард 10 гаруй сая долларын тусламж авдаг ажээ. Одоогоор тэдний мэдэлд тус бүр 50 эмч, сувилагчтай есөн эмнэлэг байгаа аж. Эмч нарын цалин сарын 300 доллар. Лалын босогчид халифат улс болох мөрөөдөлдөө хөтлөгдөж сургууль, эмнэлэгт анхаарч, хүмүүс хэрхэн хувцаслаж, хэрхэн биеэ авч явж байгаад хяналт тавих болжээ. Мөн шүүхийн системийг нэвтрүүлэхийг оролдож байна. 

Sunday, December 20, 2015



Испанийн сонгуульд эрх баригч нам яллаа

Испанид парламентын сонгууль болж Ерөнхий сайд Мариано Рахойн тэргүүлдэг Ардын нам ялалт байгуулжээ. Тус нам 350 суудалтай парламентын 123 суудлыг авч үнэмлэхүй олонх болж чадсангүй. 2011 оны сонгуульд Ардын нам 186 суудалтай байсан юм. Гол өрсөлдөгч Социалист нам 90 суудал авчээ. Зүүний Podemos нам 69, либерал Ciudadanos нам 40 суудал авсан байна. Ойрын өдрүүдэд Засгийн газраа байгуулах хэлэлцээ эрчимтэй явах бололтой. Засгийн газар байгуулах хугацааг Үндсэн хуулиар зааж өгдөггүй. Үнэмлэхүй олонх болсон нам байхгүй тул эвслийн Засгийн газар байгуулаглахаар болж байна.

Словенийн иргэд ижил хүйстний гэрлэлтийг дэмжсэнгүй

Словени улсад ижил хүйстний гэрлэлтийг дэмжих эсэх талаар бүх нийтийн санал асуулга болж, ихэнх нь эсэргүүцсэн санал өглөө хэмээн Reuters уламжлав. Санал хураалтын комиссоос гаргасан мэдээгээр, иргэдийн 63 хувь нь ижил хүйсний гэрлэлтийг зөвшөөрөхгүй гэжээ. 37 хувь нь дэмжсэн санал өгчээ. Нийт саналын 96 хувийг боловсруулж гаргасан хэмээн мэдээлж байна. Энэ оны гуравдугаар сард Словенийн парламент ижил хүйстний гэрлэлтийн хуулийг хэлэлцэж 51 депутатын саналаар баталж байсан юм. Хууль батлагдсаны дараа хоёр мянга орчим иргэн парламентын ордны өмнө жагсаж эсэргүүцлээ илэрхийлж байжээ.

“Барселона” клубүүдийн дэлхийн аварга боллоо

Японд клубүүдийн дэлхийн аварга шалгаруулах тэмцээн өндөрлөв. Аваргын төлөө Өмнөд Америкийн “Либертадорес” цомын эзэн, Аргентины “Ривер Плейт” Аваргуудын лигийн цомын эзэн, Испанийн “Барселона”-тай туллаа. “Барса”-гийн Месси нэг, Луис Суарес хоёр гоол хийж өрсөлдөгчөө илүүрхэн хожиж, гурав дахв удаагаа клубүүдийн дэлхийн аварга болов. Хагас шигшээ болон аваргын төлөөх тоглолтод нийт таван гоол оруулсан Луис Суарес шилдэг тоглогчоор шалгарч Toyota автомашинаар шагнууллаа. Өмнөд Америк, Европын аварга баг ганцхан тоглож аваргаа тодруулдаг байсан Toyota Cup сүүлийн үед өргөжиж, тив бүрийн аварга баг (нийтдээ найман баг) оролцдог болсон юм.

Энхийн хэлэлцээ үр дүнд хүрсэнгүй

Йемен дахь иргэний дайныг зогсоох энхийн хэлэлцээ үр дүнд хүрсэнгүй. Зөвхөн хэлэлцээний дараагийн шатыг ирэх оны нэгдүгээр сард хийх тохиролцоогоор өндөрлөжээ. НҮБ-ын тусгай элч Исмаил Ахмед Швейцарьт хийлгэсэн хэвлэлийн бага хурал дээр мэдэгдэхдээ, хэлэлцээний үеэр гал зогсоох дүрмийг зөрчсөн ч бага зэргийн ахиц дэвшилд хүрсэн гэв. Сөргөлдөгч талууд олзны хүмүүсийг солилцох, зэвсэгт бүлэглэлүүдийг эргүүлэн татах, хүмүүнлэгийн тусламж хүргэх нөхцөлөөр хангах зэрэг асуудлаар ярилцсан байна. Талуудын гал зогсоох хүсэл эрмэлзлээс хэлэлцээний ирээдүй ихээхэн хамаарна хэмээн тоймч, ажиглагчид үзэж байна. 


Air France-ийн онгоцонд хуурамч тэсрэх бөмбөг байжээ

Францын Air France авиакомпанийн онгоцноос илэрсэн сэжиг бүхий зүйл нь дэлбэрэх төхөөрөмжийг дууриалган хийсэн хуурамч зүйл байсан, ямар нэг аюул учруулаагүй хэмээн мэдэгдэв. Маврики улсаас Парис руу нисч явсан Air France-ийн нисэх онгоцны бие засах өрөөнөөс сэжигтэй боодолтой зүйл илэрсний дараа тус онгоц Кений Мумбаса хотын нисэх буудалд яаралтай буулт хийсэн юм. Онгоцонд явсан зорчигч болон экипажийн гишүүдийг яаралтай гаргаж, мэргэжилтнүүд сэжигтэй зүйлийг онгоцноос гаргаж аюулгүй газар аваачжээ. Хэн нэгэн этгээд цаасан хайрцагтай боодолд цаг бэхэлж тавьсан байсан Францын авиакомпанийн удирдлагаас мэдэгдлээ. Энэ хэрэг явдлыг “Хэт түрэмгий үйлдэл” хэмээн үзсэн юм.
Маврики улсаас хөөрсөн “Боинга 777” нисэх онгоцонд 459 зорчигч, нисэх багийн 14 гишүүн явж байсан бөгөөд Парисын Шарль де Голль нисэх буудалд хүртэл шууд нислэг гүйцэтгэж байсан аж. Нислэгийн үеэр бие засах өрөөнд орсон нэгэн зорчигч тэнд электрон цаг бэхэлж уясан сэжигтэй хайрцаг байна хэмээн нисэх багт мэдэгджээ. Үүний дараа нисэх багийнхан Кенийн нисэх буудалд яаралтай буух шийдвэр гаргасан байна. Кенийн цагдаа хэд хэдэн зорчигчоос байцаалт авчээ. Энэ хэрэг явдлыг мөрдөн шалгаж, буруутай этгээдийг хариуцлагад татна хэмээн Air France-ийн удирдлага мэдэгдлээ.
Маврики улс дахь аюулгүй байдлын хяналт, шалгалт сул байсан тухай яриа гарсан ч тус улсын эрх баригчид үүнийг няцаажээ. Тэсрэх бөмбөг шиг харагдсан зүйл нь тэсрэх бодис агуулаагүй байсан тул нислэгийг өмнөх аюулгүйн үзлэгээр юу ч илрээгүй хэмээн мэдэгдэв. Францын авиакомпаниас дамжуулж буйгаар, цаасан хайрцагтай зүйлд гал тогооны ахуйн электрон цаг бэхэлж нисэх онгоцны бие засах өрөөний жижиг шүүгээнд хийсэн байжээ. Хуурамч тэсрэх бөмбөгийг хэзээ тийш нь оруулж тавьсан нь тодорхойгүй байна. Нисэх онгоц хөөрөхөөс өмнө бие засах өрөөний шүүгээг шалгасан, сэжигтэй юу ч байгаагүй хэмээн мэдээлж байна. Тиймээс нислэгийн үед хэн нэг нь айлган сүрдүүлэх зорилгоор тэр зүйлийг тавьсан хэмээн үзэж байгаа аж. Тус нислэгээр зорчиж явсан нэгэн зорчигчийн баталж буйгаар, нисэх онгоц техникийн доголдлын улмаас Кенид газардахаар боллоо хэмээн дуулгасны дараа бүх зорчигчид тайван байдлаа хадгалж байсан аж. Энэтхэгийн далайд оршдог Маврики арал нь франц жуулчдын амрах дуртай газрын нэг юм.

Арваннэгдүгээр сарын 18-нд Лос-Анжелес болон Вашингтоноос Парис руу нисч байсан хоёр онгоцонд тэсрэх бөмбөг тавьсан мэдээлэл ирж, хоёулаа ослын буулт хийсэн ч нисэх онгоцноос ямар ч тэсрэх бөмбөг олдоогүй. Арваннэгдүгээр сарын 13-нд Парис хотод аймшигт цуврал халдлага болж 130 хүн амиа алдсаны дараа Франц улс онцгой сонор сэрэмжтэй байгаа билээ. Хэт даврагч “Исламын улс” бүлэг энэ хэргийн хариуцлагыг хүлээсэн юм. Мөн аравдугаар сарын 31-нд Оросын авиакомпанийн онгоц Египетэд сүйрч 224 хүн амь үрэгдсэн. Мөрдөн шалгалтаар тус онгоцонд тавьсан бөмбөг дэлбэрсний улмаас онгоц сүйрсэн болох нь тогтоогджээ. Гэвч Египетийн эрх баригчид Оросын нисэх онгоцыг дэлбэлсэн гэх нотолгоо олдоогүй хэмээн мэдэгдэж байгаа аж. 

Saturday, December 19, 2015




Иракийн гоо бүсгүй тодорлоо

Багдадын нэгэн зочид буудалд Иракийн гоо бүсгүй шалгаруулах тэмцээн боллоо. Тус улс 1972 оноос хойш анх удаа гоо сайхны хатан хаанаа тодруулж буй нь энэ юм. Гоо бүсгүй шалгаруулах тэмцээнийг суннит, шийт шашинтнууд ихээхэн дэмжсэн нь тэмдэглүүштэй явдал болжээ. 150 бүсгүй оролцсон “Иракийн мисс” тэмцээнд Киркук хотын 20 настай Шайма Абдельрахман түрүүлсэн байна. “Манай улс ирээдүй рүү харж байгаад би их баяртай байна. Энэ тэмцээн иракуудын нүүрэнд инээмсэглэл авчирсан том үйл явдал боллоо” хэмээн тэрээр ярьжээ. Ирэх онд Иракийг төлөөлж “Дэлхийн мисс”-т оролцох Шайма курд үндэстэн юм. Хэд хэдэн гоо бүсгүй сүрдүүлгийн улмаас тэмцээнд оролцохоос татгалзжээ.

Майкл Жексон шинэ рекорд тогтоов

Майкл Жексон хорвоог орхиод зургаан жил болсон ч шинэ рекорд тогтоосоор байна. Түүний 1982 онд гаргасан шилдэг дууны цуглуулга болох Thriller цомог Америкт 30 сая хувиар зарагдаад байна. Энэ цомог хөгжмийн ертөнцийн бүх шагналыг авч байсан билээ. Thriller цомог эхний хоёр жилдээ 20 сая хувиар зарагдсан нь мөн л дээд амжилт юм. Eagles хамтлагийн Their Greatest Hits (1971-1975) цомог 29 сая хувиар борлогдож рекорд тогтоож байв. Майкл Жексоны шинэ амжилт түүнийг бүх цаг үеийн шилдэг дуучин гэдгийг дахин баталсан хэрэг боллоо хэмээн бичиж байна.

Б.Обама өвлийн амралтаа Хавайд

АНУ-ын Ерөнхийлөгч Барак Обама гэр бүлийн хамтаар Зул сарын амралтаа Хавай аралд өнгөрөөхөөр явлаа хэмээн Цагаан ордноос мэдээлэв. Төрийн тэргүүн ч, гэр бүлийн гишүүд нь ч амралтаараа олон нийтийн ямар нэг арга хэмжээнд оролцохгүй аж. Хавай арлын Хонолулу хот нь Обамагийн төрсөн нутаг юм. Тэрээр 1961 онд тэнд мэндэлжээ. Ерөнхийлөгч Цагаан ордонд жил тутмын хэвлэлийн бага хурлаа хийж, Калифорнийн Сан-Бернардинод аллагад өртсөн хүмүүсийн ар гэрийнхэнтэй уулзсаны дараа амралтаа авч Хавайг зорьжээ. 


“Сирид таван жилийн өмнөөс үйл ажиллагаа явуулах хэрэгтэй байсан”

Ойрхи Дорнодын газрын зураг дээр шинэ халуун цэг гарч ирээд байна. Турк улс Иракийн Курдистаны газар нутагт цэргээ оруулжээ. Эрдоган Иракийн Курдистан, Сирид ямар зорилго агуулж байна вэ? Энэ болон бусад асуултад дорно, араб судлаач Алексей Новоточинов хариулж байна.

-ОХУ-ын Ойрхи Дорнод дахь бодлогод ямар нэг дутагдал байна уу?

-Ирак, Афганистан, Иран, Саудын Арабт олон жил ажилласан туршлага дээр үндэслэсэн мэргэжлийн үнэлэлт дүгнэлт надад байна. Бид их хоцорч байна.

-Сирид хэзээ үйл ажиллагаа явуулж эхлэх хэрэгтэй байсан бэ?

-Би бол таван жилийн өмнөөс тэнд үйл ажиллагаа явуулж эхлэх хэрэгтэй байсан гэж хэлнэ.

-Хомс хотод бослого дэгдэж, иргэний дайн эхэлж байх тэр үед үү?

-Яг тийм. Хөндлөнгийн ажиглагч хэрэгтэй гэдэг нь тэр үед тодорхой, ойлгомжтой байсан. Хурим найрыг хүртэл дэлбэлж байлаа шүү дээ. Тэгэхээр мөргөлдөөнд үргэлж зуучлагч байж байдаг. Нэгэн үе Евгений Примаков гэдэг гайхалтай зуучлагч байлаа.

-Хүч нь ихээхэн сулраад байгаа Сирийн арми эзлэгдсэн газар нутгаа босогчдоос чөлөөлж чадах болов уу? Башар Асадад тийм боломж байна уу?

-Сириүд бол баатар. Нэгдүгээрт Асад хаашаа ч зугтаагүй. Арми нь бууж өгөөгүй. Таны асуулт зөв л дөө. Тийм ээ, энэ маш хэцүү. Өнөөдөр хямралыг ажиглахаас илүү Сирийн ухамсар, сэтгэхүйг сэргээх нь тун сонирхолтой байна. Сири задарч, тогтвортой байдал алдагдахад энэ хүмүүс оронд нь юу авсан юм? Юу ч авсангүй. Башар Асад өөрийн арьсаа бус, улс орны бүрэн бүтэн байдлыг хамгаалж зогссон. Тиймээс эвлэрлийн томоохон хэлэлцээ, бүрэн эрхт улсын ирээдүйн үндсэн хуулийн загварыг боловсруулах ажил өрнөх байх гэж бодож байна.

-Курдистан юу болох бол? Нэгдсэн нэг улс гарч ирэх болов уу, эсвэл Иракийн курдууд өөрсдийн замаар, Турк, Сирийн курдууд өөрсдийн замаар явах юм болов уу?

-Энд автономийн тухай асуудал яригдана л даа. Яагаад Турк, Ирак, Сири дотор автономи байж болохгүй гэж.

-Сири улс урьд өмнийн хил хязгаараа хадгалж чадах уу?

-Чадна, Сирийг өөрөөр харж чадахгүй байна.

-Ирак яах бол?

-Иракт маш олон бэрхшээл байгаа нь харамсалтай. Тэд Саддам Хусейнийг цаазлаад олон зуунаар үргэлжлэх зовлонгийн эхийг тавьчихсан. Суннит, шийтүүд эвлэршгүйгээр хуваагдаад байна. Тиймээс Иракийг тун гунигтай ирээдүй хүлээж байна. Тэнд эм тариа алга, ундны ус алга. Дээр нь дотоодын терроризм гэж ужиг өвчинтэй болчихсон. Өөрөөр хэлбэл тэд гудамж гудамжаараа, хот хотоороо, дүүрэг дүүргээрээ хуваагдчихсан.

-Туркийн цэрэг Иракт дайтах гээд орчихлоо. Тэд Мосул руу явж байна. Тэнд яах гэж байгаа юм бол?


-Өдөөн хатгах ажиллагаа. Мосул бол курдуудын бахархал болсон газар. Тэр бол курдуудын нэр нөлөөнд байдаг хот. Курд үндэстнийг өдөөн хатгаж байгаад дарж авах гэсэн санаа явж байгаа хэрэг.

Thursday, December 17, 2015




В.Путин: Ойрын ирээдүйд Турктай харилцаа сайжирна гэж бодохгүй байна

ОХУ-ын Ерөнхийлөгч Владимир Путин телевизийн эфирээр 1390 сэтгүүлчтэй 2015 оны хэвлэлийн хурал хийлээ. 11 дахь удаагаа хийлгэж байгаа Том хэвлэлийн хуралд тэрээр Сири, Турк, АНУ, нефть, доллар, эдийн засгийн хямрал зураг өргөн сэдвээр сэтгүүлч, сурвалжлагчдын асуултад хариулсан юм.

-Улс орны эдийн засгийн байдал сайнгүй байна. Хямралаас гарах арга замыг хэрхэн харж байна вэ?

-2015 он бидний хувьд нааштай жил болон өнгөрч байна. Эдийн засгийн нөхцөл байдал амаргүй байгаа ч хямралын оргил үе өнгөрч тогтворжих, өсөх хандлагатай болсон. Нефтийн үнэ баррель нь 50 доллар байхад боломжтой гэж үзэж байсан, одоо 38 доллар болчихлоо. Рублийн ханш унасан нь бас нэг шалтгаан болж байгаа. Тиймээс зарим залруулга хийх хэрэгтэй болж байна. Нефтийн үнэ буурч байгаа ч Оросын эдийн засаг тогтворжиж байна. Манай улсын валютын нөөц үл ялиг буурч 364 тэрбум долларт хүрлээ. Энэ бол хангалттай бат бөх суурь гэсэн үг. Дотоодын нийт бүтээгдэхүүн 3.7 хувиар буурлаа, инфляц оны эхнээс хойш 12.3 хувьтай байна. ДНБ-ий өсөлт аравдугаар сард 0.3 хувьтай байна. Үйлдвэрлэл 0.2, хөдөө аж ахуйн салбарын өсөлт гурван хувьтай байна. Үр тарианы ургац хоёр жил дараалан 103.4 сая тн-д хүрлээ. Ажилгүйдэл 5.6 хувьтай, тогтвортой байна. Худалдааны тэнцэл 126.3 тэрбум долларын ашигтай гарлаа. 2014 онтой харьцуулахад гадаад өр 13 хувиар буурлаа.

-Су-24 онгоцыг унагалаа гээд Турктай бүх харилцаагаа тасалж болох уу. Туркт сурдаг орос оюутнуудыг хавчиж гадуурхах болсон тухай ярьж байна. Орост оруулсан Туркийн хөрөнгө оруулалт юу болох вэ?
  
-Энэ бол зөвхөн Су-24 онгоцтой холбоотой хэрэг биш юм. Энэ бол илт дайсанасан үйлдэл байсан. Тэд манай цэргийн онгоцыг унагаж, хүний амь үрэгдсэн. Энэ санаандгүй тохиолдол байсан юм бол туркууд яагаад бид нарт хэлэлгүй эхлээд НАТО руу ярьсан юм бэ. Тэд үүгээрээ биднийг доромжилсон. Тэд НАТО-гоор халхавч хийхийг хүсч байна. Тэд үүгээрээ юуг хүссэн юм бэ. Биднийг гараад зугтаад явна гэж бодсон юм уу. Үгүй ээ, бид тийм улс биш. Тэр хэрэг явдлаас хойш бид бүс нутаг дахь цэргийн хүчээ зузаатгасан. Тэнд пуужингаас эсэргүүцэн хамгаалах систем байгаагүй. Одоо бид С-400 пуужингаа аваачиж байрлуулаад байна. Туркийн агаарын хилийг зөрчлөө гээд байгаа. Гэтэл тэд өөрсдөө Сирийн агаарын хилийг байнга зөрчиж байдаг.
Тэнд 11 мянган бензин зөөгч машин байгааг бид илрүүлсэн. Сирийн босогчдоос хууль бусаар худалдаж авдаг нефть зөөгч машинуудыг нь бид бөмбөгдсөн. Одоо тэд шөнөөр нефтээ зөөж байна. Иракаар дамжуулан авах гэж оролдож байна. Ойрын ирээдүйд Турктай харилцаа сайжирна гэж бодохгүй байна. Хүмүүнлэгийн тал дээр харилцаа сайжирч болох л юм. Туркийн удирдлагатай муудалцаад байгаа болохоос Туркийн ард түмэнтэй муудалцаагүй.

-Сири дахь Оросын ажиллагаа хэзээ дуусах вэ, Сирийн талаар тодорхой төлөвлөгөө байна уу?

-Сирийн асуудлыг аль болох хурдан шийдвэрлэх тусам хор хохирол нь бага байх болно. Мэдээж Сирийн асуудлыг шийдэх янз бүрийн төлөвлөгөө байгаа. АНУ Сирийн асуудлаар тогтоол боловсруулж НҮБ-ын Аюулгүйн зөвлөлд танилцуулах гэж байгааг бид дэмжиж байгаа. Сирийн шинэ үндсэн хуулийг боловсруулж, ирээдүйг сонгуульд хяналт тавих механизмийг бий болгох тал дээр Орос, Америк хоёр санал нэг байгаа. Сирийн хямралыг улс төрийн аргаар шийдвэрлэхээс өөр зам байхгүй. Агаарын довтолгооны тухайд бол бид Сирийн армийг дэмжиж байгаа. “Исламын улс” бүлгийн эсрэг тэмцдэг босогчдын бүлэг байгаа. Бид тэдгээр бүлгийг агаарын довтолгооноор дэмжих зарчим баримталж байна. “Исламын улс” хүн бүрт аюул занал учруулж байна. Тэднийг аль болох хурдан устгах тусам сайн байх болно.

-Украинд олзлогдсон орос цэргүүдийг Савченкогоор (Оросын телевизийн сэтгүүлчдийг алсан хэргээр ОХУ-д саатуулагдаад байгаа Украины армийн цэрэг, нисгэгч) солих боломж байгаа юу?

-Савченкогийн эсрэг эрүүгийн хэрэг үүсгэсэн болохоор солилцох боломж байхгүй. Украин бол бидний ах дүүгийн барилдлагатай улс, үүнийг олон дахин давтаж хэлэхээс хэзээ ч залхахгүй. ОХУ Украины эсрэг ямар нэг хориг арга хэмжээ авах бодолгүй байна. Киевтэй харилцаагаа муутгах сонирхол алга. Харин 2016 оны нэгдүгээр сараас эхлээд Украинд худалдааны ямар нэг давуу тал олгохгүй.

-ОХУ олон улсын хориг арга хэмжээнд байгаа. Эдийн засаг сайнгүй байна. Сирид агаарын довтолгоо хийж, тэнд цэргийн хүчээ нэмэгдүүлэх хангалттай нөөц, хөрөнгө бидэнд байгаа юу?

-Бид төсөвт дарамт учруулсан юм байхгүй. Зөвхөн цэргийн хүч, төсвөө дахин хуваарилсан юм. Тиймээс бид төсөвтөө хүндрэл учруулахгүйээр тэнд ажиллагаа, сургалт явуулаад байж болно. Батлан хамгаалахад зарцуулах ёстой мөнгөө дотроо зохицуулж, хуваарилалтыг нь өөрчилсөн гэсэн үг. Бид дайн явуулаагүй, тусдаа цэргийн ажиллагаа явуулж байна. Бид нисэх хүчин, сансрын хүчин, пуужингаас эсэргүүцэх систем, тагнуулын байгууллагаа ашиглаж тусдаа ажиллагаа явуулж байна.

-Гүржид эрх баригчид солигдоод гурван жил өнгөрөхөд дээд хэмжээний уулзалт болсонгүй. Талууд юу хийх ёстой вэ. Москва Тбилисээс юу хүлээж байна вэ. Харилцааг шинэ түвшинд гаргахад Москва юу хийх гэж байна вэ?

-2008 оны үйл явдлын дараа бидний харилцаа муудсан. Харилцаа муудсанд манай буруу байхгүй. Гүржийн тэр үеийн урирдлага, тэр үеийн Ерөнхийлөгч Саакашвилид Гүржийг сүйрүүлсэн шийдвэр гаргах боломж олгохгүй байх хэрэгтэй байсан. Энэ бол Гүржийн ард түмний алдаа. Одоо энэ нөхөд Украинд оччихсон бужигнуулж байна. Тэдний арга барил өөрчлөгдөөгүй. Саакашвилийг Одесса хотын даргаар томилсон нь Украины ард түмний нүүр рүү нулимсантай адил. 45 сая хүнээс удирдагч хийчих 5-10 хүн олдохгүй байна гэж үү. Гүржийн газар нутгийн бүрэн бүтэн байдлын тухайд бол гүрж, өмнөд осети, абхаз ард түмний л шийдэх асуудал. Гүржтэй хийдэг худалдаа, наймаа нэмэгдэж байгаа. Визийн дэглэмийн тухайд бол бид Гүржтэй визгүй зорчих дэглэмд шилжихэд бэлэн байгаа.

-“Роснефть” зэрэг Оросын төрийн мэдлийн томоохон компаниудыг хувьчлах санаа байгаа юу?


-Хувьчилж болно. Гэвч зах зээлийн нөхцөл байдлыг урьдчилж таах аргагүй. Ер нь хяналтын багц нь төрийн мэдэлд байдаггүй компаниудын дотоод хэрэгт оролцох хэрэггүй л дээ. 

Tuesday, December 15, 2015



Өмнөд Судан тусгаар тогтносон ч энх тайван ирсэнгүй

“Өмнөд Суданд сүйрэл, гамшгаас өөр юм алга” хэмээн Ихаф Куок цөхрөнгүй харцаар өгүүлж байна. “Динка цэргүүд чамайг нуэр гэж мэдэх юм бол тэгээд л дуусаа. Бүх нуэр үндэстнийг хүйс тэмтрэнэ гэж тэд хэлдэг юм. Тэднийг гэрт нь алж, бусдынх нь өмнө шатаадаг” хэмээн ярьж байна. Ихаф эмэгтэй дүү, шинэ гэр бүлийнхээ арван хүний хамтаар Өмнөд Суданы хилээс 100 км-т орших Кенийн Какума дүрвэгсдийн хуаранд амьдардаг. 32 настай Ихаф туулж өнгөрүүлсэн дайн, аймшгийн талаар ярихад хүүхдүүд ихэд гайхан сонсох ажээ.
Тэрээр өөр зургаан хүний хамтаар Юнит мужийн Пайнжар хотоос зугтаажээ. Олон жилийн дайн, аллага хүчирхийллийн дараа Өмнөд Судан нь 2011 оны доолдугаар сард Суданаас салж тусгаар тогтносон юм. Голлох хоёр үндэстэн болох нуэр, динка нарын хооронд эвлэршгүй ширүүн тэмцэл өрнөдөг ч тэд гэгээн сайхан мөрөөдөлтэйгээр тусгаар улсаа зарлаж байв. Дэлхийн хамгийн залуу улс дахь чимээгүй энх тайван тэр дороо л Ерөнхийлөгч Салва Кир (динка), дэд ерөнхийлөгч Риек Машар (нуэр) нарын хоорондох хардалт сэрдэлт болон хувирчээ. 2013 оны арванхоёрдугаар сард Кир Засгийн газраасаа нуэр үндэстнүүдийг хөөн зайлуулсан нь шинэ иргэний дайны эхлэлийг тавьжээ. Тэр цагаас хойш Өмнөд Суданд 50 мянган хүн амиа алдаж, хоёр сая орчим иргэн орон гэрээ орхиж, 50 мянга гаруй хүн орогнол хүсч хил даван дүрвээд байна. Тус улсад хүний эрх зөрчигдөж, иргэдийг тамлаж, хүчирхийлсээр байгааг хүний эрхийн байгууллагууд илчилсээр байгаа юм. Зугтах нь амьд үлдэх цорын ганц баталгаа болж байгаа ч тийм амаргүй аж.
“Тэндээс зугтаж гарахын тулд 1500 доллар зарцуулсан. Амь өрсөн зугтаж буй хүмүүст виз, хил нэвтрэх тал дээр  ямар ч ойлголт байхгүй” хэмээн Угандагаар дамжин  Кенид ирсэн Ихаф хэлж байна. “Зугтаах замдаа динка цэргүүдтэй таараад тэд нарын хэлийг мэдэхгүй бол шууд алуулна. Нэг найз маань алуулсан. Би тэдний хэлийг мэддэг болохоор амьд гарсан” хэмээн өгүүлж байна. Тэр болон бусад олон хүн тусгаар тогтнолыг баярлан хүлээж авчээ. Гэвч долдугаар сарын 9-ний түүхт өдрөөс хойш хэдхэн сарын дараа улс орны лидерүүд харгис, амиа бодсон дарангуйлагч болон хувирч, бүхнийг халааслах болсон аж. Өмнөд Суданы хямралд хүүхдүүд хамгийн ихээр хохирчээ. Түгшүүртэй, баталгаагүй байдлын улмаас улс орон даяар бүх сургууль хаагджээ. Өмнөд Суданд насанд хүрээгүй 15 мянган хүүхэд зэвсэгт бүлэглэлийн эгнээнд хүчээр алба хааж байна хэмээн ЮНИСЕФ-ээс мэдэгдсэн юм.

Кир, Машар нар өнгөрсөн наймдугаар сарын сүүлчээр энхийн гэрээ байгуулсан ч олон улсын хамтын нийгэмлэг үүнийг ээлжит жүжиг хэмээн үзэж байна. Тэд гэрээнд гарын үсэг зурсан ч ямар ч бодитой, нааштай үр дагавар гарахгүй байгаа аж. Юнит мужид ард иргэдийг довтлох нь энгийн үзэгдэл болсныг 22 настай Ребека Найбуот өгүүлж байна. “Нуэр үндэстэн хаагуур байдгийг цэргүүд сайн мэддэг. Тэд нар машинтай, буутай хүрч ирээд л хүмүүсийг алчихаад хурдан арилаад өгдөг. Хүмүүсийг хулгайлдаггүй, тамладаггүй, зүгээр л буудаж алчихаад яваад өгдөг” хэмээн ярьж байна. Какума дүрвэгсдийн хуаран 1992 онд байгуулагджээ. Өнөөдөр 80 мянган хүний багтаамжтай 15 км кв талбайд нь 180 мянган хүн амьдарч байна. Мэдээж энд амьдрах орчин тийм таатай биш ч Дадааб дүрвэгсдийн хуаранг бодвол ус, хүнсний хамгамжаар хамаагүй илүү ажээ. Какума мужийн захиргаа саяхан дахин 25 км кв газрыг дүрвэгсдэд зориулахаар болоод байна. Одоогоор дэлхийн хамгийн залуу улс дахь энх тайван, тоггтвортой байдалд ямар ч дүрвэгч итгэхгүй байгаа юм. “Бид хэзээ ч энх тайвныг харсангүй. Харах ч үгүй байж мэднэ” хэмээн тэд өгүүлж байна.



Ж.Керри, В.Путин нар уулзжээ

Москва, Вашингтон хоёр Сирийн асуудлаар байр сууриа ойртууллаа хэмээн АНУ-ын Төрийн нарийн бичгийн дарга Жон Керри мэдэгдлээ. “Зарим талбар дээр бид санаагаа нэгтгэсэн. Сири дахь террорист бүлгүүдийг ангилж ялгах тал дээр санал зөрсөн. Бид хоёр талын хэлэлцээн дээр ямар тохиролцоонд хүрснийг одоо хэлж чадахгүй нь. Бид байр сууриа ойртуулж, хүндрэл бэрхшээлээ шийдвэрлэх талаар ярилцсан” хэмээн Керри хэлжээ. ОХУ-ын Гадаад хэргийн сайд Сергей Лавров  В.Путин, Ж.Керри нарын уулзалтыг үр дүнтэй болсон, Сирийн асуудлаар урагш алхсан хэмээн дүгнэжээ. Арванхоёрдугаар сарын 18-нд Нью-Йоркт Гадаад хэргийн сайд нарын түвшинд Сирийг дэмждэг бүлгүүдийн ээлжит уулзалт болох юм.

Адель тайзан дээр гараад уйлжээ

Британийн дуучин Адель сүүлийн дөрвөн жилд анх удаа тайзан дээр гарахдаа сэтгэл нь хөдөлж уйлжээ. Тэрээр арванхоёрдугаар сарын 14-нд Нью-Йоркт тайзан дээр гарсан юм. Адель When We Were Young дуулсны дараа үзэгчид босож алга ташин баяр хүргэжээ. “Би дуу, хөгжмөө санажээ. Бишрэн шүтэгчдээ гайхуулахын тулд гэнэт буцаж ирэхийг хүссэн. Энэ бол шинэ эхлэл гэдгийг мэдэрч байна” хэмээн дуучин бүсгүй өгүүлэв. Адель 2016 оны хоёрдугаар сард гаргах шинэ цомгоо сурталчилж томоохон хэмжээний аялан тоглолтоо эхлүүлээд байна. Түүний студид бичүүлсэн шинэ дуу Британийн, дэлхийн хөгжмийн жагсаалтыг тэргүүлж байгаа юм.

120 кг цулбуурт загас барьжээ

Италийн Режо хотын загасчин Гризенди 120 кг жинтэй цулбуурт загас барилаа хэмээн Daily Mail уламжлав. Тэрээр Мантуи хотоос холгүй байдаг голоос энэ аварга загасыг барьжээ. 38 настай итали эр Гризенди 20 орчим жил загасчлалаар хичээллэж байгаа аж. “Би ийм загас хэзээ ч харж байгаагүй. Энэ бол зүгээр л мангас” хэмээн өгүүлэв. Тэрээр цулбуурт загасыг гаргах гэж цаг орчим ноцолджээ. Шведийн загасчин Эрик Акснер 100 кг жинтэй цулбуурт загас барьж байсан аж. Голоос ийм том цулбуурт загас гаргаж байсан тохиолдол анх удаа бүртгэгдэж байгаа ажээ.

НҮБ-ын тэргүүний сонгууль эхэллээ

НҮБ-ын Ерөнхий нарийн бичгийн даргын суудлын төлөөх сонгуулийн кампанит ажил албан ёсоор эхэллээ. Одоогийн тэргүүн, Өмнөд Солонгосын Гадаад хэргийн сайд асан Пан Ги Муны бүрэн эрхийн хугацаа 2016 оны эцсээр дуусах юм. Бүс нутгийн төлөөллийг ээлжлэн сонгодог журмын дагуу энэ удаа Зүүн Европын орны иргэн НҮБ-ын тэргүүн болох юм. Аюулгүйн зөвлөлийн ерөнхийлөгч, АНУ-ын элчин сайд Саманта Пауэр, Ерөнхий Ассамблейн тэргүүн, Данийн иргэн Могенс Люккетофт нар НҮБ-ын гишүүн орнуудад хандаж сонгуулийн шударга, ил тод байдлыг дээшлүүлэхийг уриалжээ. Мөн Ерөнхий нарийн бичгийн даргын суудалд эмэгтэйчүүдийн өрсөлдөх боломжийг эрх тэгш байлгах санал дэвшүүлэв. 1945 оноос хойш зөвхөн эрэгтэйчүүд энэ албыг хашиж байгаа юм.

Monday, December 14, 2015




Сири иргэдэд хуурамч бичиг баримт бүрдүүлдэг байжээ

Бразилийн цагдаа Сирийн иргэдэд хуурамч бичиг баримт бүрдүүлж өгдөг бүлэглэлийг илрүүлжээ. Тэд Сирийн 70 орчим иргэдэд Бразилийн паспорт, төрсний гэрчилгээг хуурамчаар гаргаж өгсөн болохыг тогтоогоод байна. Хуурамч биеийн байцаалттай болсон иргэдийн зарим нь Европ болон АНУ-д хөл тавиад амжжээ. Тэдний дотор Сирийн армийн төлөөлөгчид хүртэл байсан хэмээн мэдээлж байна. Хэд хоногийн өмнө Гондураст хуурамч паспорттай явж байсан Сирийн таван иргэнийг саатуулжээ. Тэд Америк орохоор явж байснаа хүлээсэн байна.

Саудын Арабын байгуулсан эвсэл терроризмын эсрэг тэмцэнэ

Саудын Арабын байгуулсан цэргийн эвсэл дэлхийн тэргүүлэх гүрнүүд, олон улсын байгууллагуудтай хамтран ажиллана хэмээн тус улсын Батлан хамгаалахын сайд Мухаммад ибн Салман Аль Сауд мэдэгдлээ. Терроризмын эсрэг лалын орнуудын эвсэлд 34 орон багтаж байна хэмээн Саудын Араб зарлажээ. Коран сударт терроризмын ямар ч үйлдлийг буруутгадаг хэмээн тус эвслийн мэдэгдэлд онцолсон байна. “Дэлхий даяар аллага, хүчирхийлэл, хагарал бутралыг сурталчилж, гэм буруугүй хүмүүсийг айлган сүрдүүлдэг террорист бүлэг, зэвсэгт отрядуудаас ард иргэд, улс үндэстнийг хамгаална” хэмээн тус эвсэл зорилгоо тодорхойлжээ. Лалын цэргийн эвсэл Аллахын нэрийн өмнөөс байгуулагдсан хэмээн онцолсон байна. Саудын Араб санаачилсан цэргийн эвсэлд Саудын Араб, Иордан, Арабын нэгдсэн эмират, Пакистан, Бангладеш, Бахрейн, Бенин, Турк, Чад, Того, Тунис, Жибути, Сенегал, Судан, Сьерра-Леон, Сомали, Габон, Гвиней, Палестин, Коморын арал, Катар, Кот-д'Ивуар, Кувейт, Ливан, Ливи, Мали, Мальдив, Малайз, Египет, Марокко, Мавритани, Нигер, Нигери, Йемен улс багтжээ.

Б.Обама: Бид улам хүчтэй цохилт өгнө

Олон улсын цэргийн эвслийн довтолгооны улмаас Ирак дахь террористууд хянаж буй газар нутгийнхаа 40 хувийг алдлаа хэмээн АНУ-ын Ерөнхийлөгч Барак Обама Пентагонд зөвлөлгөөнд оролцсоны дараа мэдэгдлээ. “Бид лалын босогчдын байрлалыг улам хүчтэй бөмбөгдөж байна. Олон улсын цэргийн эвсэл террористуудын голомтыг довтолж байна” хэмээн онцоллоо. Холбоотны эвсэл цохилтынхоо тоог нэмэгдүүлж, мөн газраар давшиж буй түншүүддээ агаараас дэмжлэг үзүүлж байгаа аж. Алан хядагчид хот тосгонд бүгж, энгийн иргэдийн ард нуугдах болсон нь терроризмын эсрэг тэмцлийг хүндрүүлж байна хэмээн Б.Обама ярилаа. “Исламын улс” бүлгийн эсрэг тэмцэлд хурд хэрэгтэй байгааг тэрээр анхаарууллаа.

Б.Нетаньяхугийн нохойг тусгаарлана

Израилийн Ерөнхий сайд Биньямин Нетаньяхугийн Кай хэмээх нохой Ханукка баярын үеэр өндөр хэмжээний зочныг хазсан тул түүнийг хорионд оруулж тусгаарлахаар болжээ. Энэ тухай Нетаньяху фейсбук хуудсандаа бичсэн байна. “Харамсалтай нь Кайг хуулийн дагуу тусгаарлахаар боллоо” хэмээн мэдээлжээ. Израилийн хуулиар хүн хазсан нохойг вакцинд хамрагдсан байсан ч наад зах нь арав хоног тусгаарладаг. Вакцин хийлгээгүй бол 30 хоног хорьдог аж. Ерөнхий сайдын арван настай монгрел үүлдрийн цагаан нохой Ханукка баярын үеэр парламентын гишүүн Шаррен Хаскел, Гадаад хэргийн орлогч сайдын нөхөр Ципи Хотовелийн гуянд соёогоо зоосон ажээ.

В.Путин хакас охинд хаски бэлэглэжээ


ОХУ-ын Хакасийн бүгд найрамдах улсын Белый Яр тосгоны 12 настай оршин суугч Ольга Марущенко Ерөнхийлөгч В.Путинаас цэнхэр нүдтэй хаски гөлгийг шинэ жилийн бэлгэнд авчээ. Бүгд найрамдах улсын бүрэн эрхт төлөөлөгч Михаил Побызаков Ерөнхийлөгчийн даалгавраар хаски гөлгийг охинд гардуулж өгчээ. Марущенкогийн гэр бүл Казакстанаас Хакасид ирж суурьшжээ. Ольга охин шинэ жилээр хаски гөлөгтэй болохыг хүссэн ч аав, ээж нь авч өгч чадахгүй гэсэн тул Путинд захидал бичсэн байна. ОХУ-ын Ерөнхийлөгч өмнө нь Тула хотын долоон настай жаалд лабрадор, Киргизийн тавдугаар ангийн сурагчид ньюфаундленд үүлдрийн гөлөг бэлэглэж байжээ. 


Ф.Жиральди: АНУ-д Туркийн агаарын хүчний бааз хэрэгтэй

Женевт ОХУ, АНУ болон НҮБ-ын төлөөлөгчид уулзаж Сирийн асуудлаар ярилцаж байна. ТТГ-ын терроризмтэй тэмцэх хэлтсийн шинжээч асан, Council for National Interest хүрээлэнгийн захирал Филипп Жиральди ярьж байна.

-Та Туркийг сайн мэддэг. Туркийн Ерөнхийлөгч Эрдоган Сирийн мөргөлдөөнд ямар зорилго агуулж байна вэ?

-Эрдоган “Исламын улс” бүлгийн эсрэг дайтахгүй байгаа. Тэрээр Курдын асуудлын улмаас Башар Асадын тэргүүлдэг Сирийн Засгийн газрын эсрэг тэмцэж байна. Курдуудын асуудал нь Эрдоганыг зовоодог цорын ганц сэдэв л дээ. Курдууд тусгаар улсаа байгуулахыг хүсвэл тэд Туркийн газар нутгийн гуравны нэгийг эзэлж магадгүй. Энэ нь мэдээж Эрдоганд шөнийн хар дарсан зүүд. Түүний Сирид хийж буй зүйл нь гагцхүү үүнтэй холбоотой юм. Туркийн цэрэг Иракт нэвтэрсэн, тэд хаана байна вэ? Курдууд байдаг Мосулд л байна.

-Эрдоган Сирид өөрсдийн ашиг сонирхлыг л хамгаалж, лалын бүлгүүдийг дэмжиж байна гэдгийг Америк мэдсэн байх. Гэвч яагаад үүний өмнө нүдээ таглаад байна вэ?

-АНУ Туркийн асуудал дээр ацан шалаанд ороод байна л даа. Турк байхгүй бол Сирийн бодлого байхгүй болчих гээд байна. Америкууд Сирийг бөмбөгдөхийн тулд Туркийн агаарын хүчний бааз хэрэгтэй. Хэрвээ тэд Персийн булан дахь баазаас нисэх юм бол Сирид арван минут л үүрэг гүйцэтгээд буцах болчихоод байдаг. Харин Туркийн газар нутаг дээрээс хөөрвөл Сирид нэг цаг ажиллагаа явуулах боломжтой байдаг.

-ОХУ Эрдоган болон түүний хүүг Сири дахь лалын босогчдоос нефть худалдаж авдаг хэмээн буруутгасан. Таныхаар, энэ аль хэр үнэний ортой вэ?


-Үнэн, энэ нь аль хэдийнээс тодорхой болсон. Бензин ачсан машинууд хаагуур явж, мөнгийг яаж шилжүүлж байгааг бүгд харсан. Иран улс хориг арга хэмжээнд байхад туркууд мөн ингэж нефть авч байсан. Тэд Ираны нефтийг авч, энэ ажиллагааг мөн л Эрдоганы хүү зохион байгуулж байсан. АНУ Турктай сайн харилцаагаа хадгалахыг хүсч байх шиг.  

Saturday, December 12, 2015




Америкийн компани ажилтнуудаа 100 мянган доллараар шагнана

Байгалийн хий, нефть олборлолт эрхэлдэг Америкийн хувийн томоохон компанийн нэг Hilcorp Energy бүх ажиотнаа шагнах болсноо зарлав. Оны эцсээр тус компанийн 1381 ажилтан тус бүр 100 мянган доллар авахаар болсныг компанийн зүгээс зарлалаа. Hilcorp Energy таван жилийн өмнө олборлолтоо хоёр дахин нэмэгдүүлэхдээ компанийн захирал, тэрбумтан Жефри Хилдебранд ажилтнууддаа 50 мянган доллар авч зөвхөн автомашинд зарцуулах уу, эсвэл өөр зорилгод зарцуулах 35 мянган долларыг бэлнээр авах уу гэсэн шагналын сонголт санал болгож байжээ.
Энэ онд тус компани нефтийн олборлолтоо хоёр дахин нэмэгдүүлж өдөрт 150 мянган баррель олборлох болсонтой холбогдуулж ажилтнуудаа 100 мянган доллараар шагнах шийдвэр гаргасан байна. “Энэ бол жинхэнэ бэлэг” хэмээн Hilcorp Energy-д арван жил ажиллаж байгаа нарийн бичиг Аманда Томсон хэллээ. Hilcorp 1989 байгуулагдсан, төв байр нь техас мужийн Хьюстон хотод байдаг. 2015 онд тус компани Fortune-ийн 100 шилдэг компанийн жагсаалтад гурав дахь удаагаа багтжээ. Компанийн захирал Хилдебранд 5.6 тэрбумын хөрөнгөтэй, Америкийн 100 тэрбумтны нэг ажээ.

Парисын клуб Кубын дөрвөн тэрбум долларын өрийг цуцлав

Зээлдэгчдийн Парисын клуб Кубын гадаад өрийн нэг хэсэг болох дөрвөн тэрбум долларыг цуцлахыг зөвшөөрлөө хэмээн Францын Сангийн сайд Мишель Сапен мэдэгдэв. Тэрээр Гаванатай хийсэн тохиролцоог “Куба болон олон улсын санхүүгийн байгууллагуудын хооронд шинэ эрин үе эхэллээ” хэмээн нэрлэжээ. Куба улс үлдсэн 2.6 тэрбум долларын өрийг 19 жилийн дотор төлж барагдуулах үүрэг хүлээж байна. Куба, Америкийн харилцаа сайжирсны дараа тус арал дээр хөрөнгө оруулах сонирхол нэмэгдсэн тул зээлдэгчид өрийн бүтцийг дахин шинэчлэх сонирхолтой байгаа юм.

Хойд Солонгосын охидын хамтлаг Хятадад тоглосонгүй


Дан охидоос бүрдсэн Хойд Солонгосын “Моранбон” поп хамтлаг Хятадад тоглохоор ирсэн ч тоглолтоо хийлгүй нутаг буцжээ. Хамтлагийн охид Бээжинд товлосон концертоосоо хэдэн цагийн өмнө Бээжингийн нисэх буудал дээр очиж Пхеньян руу буцаж нисчээ. Тэд Хятад, Хойд Солонгосын харилцааг сайжруулах зорилгоор Бээжинд гурван концерт тоглохоор ирж, хятадууд ч ихээхэн сонирхож байсан юм. Концертыг цуцалсан шалтгаан тодорхойгүй байна. “Моранбон” нь Хойд  Солонгосын хамгийн алдартай поп хамтлаг юм. Хамтлагийн гишүүдийг улс орны лидер Ким Чен Ун сонгодог гэсэн яриа байдаг. “Моранбон” хамтлаг цахилгаан хийл, гитар зэрэг янз бүрийн хөгжмийн зэмсгээр солонгос болон өрнөдийн дуу дуулдаг ажээ.


Цаг агаарын өөрчлөлтийн асуудлаарх бага хурал өндөрлөв

Парист цаг агаарын өөрчлөлт, дэлхийн дулаарлын асуудлаарх бага хурал өндөрлөж, оролцогчид эцсийн тохиролцооны төслийг боловсруулан гаргажээ. Францын Гадаад хэргийн сайд Лоран Фабиус дээрх тохиролцоо батлагдвал түүхэн баримт бичиг болно хэмээн мэдэгдэв. Төслийн дагуу 2020 он гэхэд агаар мандалд цацдаг хорт хаягдлын эсрэг тэмцэлд хөгжиж буй орнуудад 100 тэрбум долларын тусламж үзүүлэх юм. Ингэснээр дэлхийн дулаарлыг сааруулахад ихээхэн хувь нэмэр болно хэмээн Фабиус үзэж байна.
Төслийн дагуу дэлхийн улс орнууд дулаарлын хэмжээг үйлдвэрлэлийн өмнөх эрин үеийн хэмжээнд барьж, 1.5-2.0 градусаас илүү нэмэхгүй байх үүрэг хүлээж байна. Бага хурлын оролцогчид хоёр долоо хоногийн турш эрчимтэй хэлэлцээ хийсний эцэст төгсгөлийн баримт бичгийг боловсруулж чаджээ. Хамгийн сүүлчийн хуралдаан хагас сайны шөнө төлөвлөснөөс 16 цагийн дараа дууссан юм. Парисын бага хуралд дэлхийн 195 орны төлөөлөгч оролцжээ.
Одоо энэ баримт бичиг агаар мандалд цацагддаг хорт хаягдлын 55 хувийг “хариуцдаг” 55 улсын парламентаар батлагдсанаар хүчин төгөлдөр болох юм.
Хөгжингүй болон хөгжиж буй хамгийн олон улс орон цаг агаарын өөрчлөлт, дэлхийн дулаарлын асуудлаар ийнхүү анх удаа тохиролцоонд хүрч байна.
Агаар мандал дахь хорт хийн цацалт, хаягдлыг бууруулахад баян орнууд нь ядуу орнууддаа туслахаар тохиролцлоо. 2020 он хүртэл энэ зорилгоор 100 тэрбум доллар хандивлахыг зөвшөөрсөн нь хамгийн том амжилтад тооцогдож байна. Дэлхийн улс орнууд хэдийгээр тун чухал тохиролцоонд хүрсэн ч амлалтаа биелүүлээгүй улс орнуудыг хэрхэн шийтгэх талаар ярьсангүй. “Одооноос эхлэн бид эх дэлхийгээ аврах жинхэнэ бааз, суурьтай болж байна. Дэлхий даяараа ийм тохиролцоонд хүрэх зайлшгүй шаардлагатай байсан” хэмээн Францын Гадаад хэргийн сайд Лоран Фабиус цаг агаарын өөрчлөлтийн асуудлаарх бага хурлын үр дүнг нэгтгэн дүгнэхдээ онцолсон юм.

АНУ-ын Ерөнхийлөгч Барак Обама Парисын тохиролцоог “Эх дэлхийгээ аврах хамгийн шилдэг боломж” хэмээн нэрлэжээ. “Манай үеийнхэн цэвэр эрчим хүч дээр үндэслэсэн эдийн засгийн хэдхэн давуу талыг харж байна. Ажлын байр, мөнгөний эдийн засаг зэрэг. Магадгүй бид амжилт ололтоо амьдралд бүрэн хэрэгжүүлж чадалгүй хорвоогоос явж болно. Гэхдээ аймшигтай юм юу ч алга” хэмээн тэрээр хэлжээ. Хамгийн гол нь эх дэлхийгээ дараагийн үедээ хамгийн сайнаар хадгалан үлдээх бат итгэл юм хэмээн Обама онцолж байна. 

Tuesday, December 8, 2015



Нууранд нуугдсан хулгайч матрын идэш болов

Флорида мужид айл ухсан хэрэгт сэжиглэгдэж байсан этгээд матрын идэш болжээ. Арваннэгдүгээр сарын 13-нд Берфут-Бей тосгоны иргэд хоёр этгээд айл ухаад явж байгааг цагдаа нарт мэдээлсэн байна. Цагдаа нар хулгайч нарын эрэлд гарсан ч хэнийг ч барьж чадаагүй аж. Энэ хэрэг явдлын дараа Палм-Бей  хотын 22 настай Мэтью Риггинс сураггүй алга болсныг гэр бүлийнхэн нь дуулгажээ. Арав хоногийн дараа түүний цоцгсыг нуураас олсон аж. Тэр нууранд нэг аймшигтай матар жижүүрлэж байдгийг хотын цагдаагийн дарга ярьж байв. Риггинс матрын довтолгоонд өртөж нууранд живсэн болохыг тогтоожээ. Гурван метр урт матрын хотоодноос түүний биеийн зарим хэсэг гарч ирсэн байна.
Риггинс арванхоёрдугаар сарын 13-нд найз хүүхэн рүүгээ ярьж Берфут-Бей тосгонд хулгай хийх гэж байгаагаа хэлжээ. Дараа нь тэрээр дахин утасдаж, цагдаа нарт хөөгдөж байгаагаа амжиж дуулгасан аж. Цагдаа нарын үзэж буйгаар, Риггинс үнэрч нохойноос нуугдах гэж нуур руу ороод матрын идэж болжээ.

Венесуэлийн сөрөг хүчин парламентад олонх болов

Венесуэлийн сөрөг хүчин Үндэсний ассамблейн 167 суудлын ихэнхийг авчээ. Сонгуулийн хорооноос гаргасан мэдээллээр, сөрөг хүчний эвсэл парламентад 109 суудлыг авч, уугуул иргэдийн гурван төлөөллийн хамтаар олонх болж чаджээ. Ерөнхийлөгч Николас Мадурогийн тэргүүлдэг Социалист нам 55 суудал авчээ.
Ийнхүү энэ удаагийн сонгуулиар Уго Чавесийн социализмын төгсгөл ирлээ хэмээн тоймч, ажиглагчид үзэж байна. Парламентад олонх болсон сөрөг хүчин Ерөнхийлөгч Николас Мадурог улс орныг сүйрүүлсэн хэргээр огцруулж магадгүй байгаа аж.

АНУ визийн дэглэмээ чангатгав


АНУ-ын Конгрессын доод танхим визийн дэглэмийг чангатгахыг дэмжлээ хэмээн Reuters уламжлав. Доод танхимийн 407 гишүүн визийн шаардлагыг дээшлүүлэх хуулийн төслийг дэмжиж, ердөө 19 нь эсэргүүцжээ. Арваннэгдүгээр сарын 13-нд Парист болсон халдлагын дараа улс орны аюулгүй байдлыг дээшлүүлэх хуулийг хоёр дахь удаагаа чангатгаж буй нь энэ юм. Мөн саяхан Калифорнийн Сан-Бернардино хотод аймшигтай халдлага болсон нь түлхэц өгчээ. АНУ-ын Ерөнхийлөгч Барак Обама Сан-Бернардиногийн хэрэг явдлын дараа ард түмэндээ хандаж мэдэгдэл хийхдээ визийн дэглэмийг эргэн хянана хэмээн онцолсон юм. 


Куба, АНУ хамгийн эмзэг асуудлаараа хэлэлцээ хийнэ

АНУ, Кубын төлөөлөгчид Гавана хотод уулзаж, хоёр улсын хоорондох харилцааг хэвийн болгох үйл явцын хамгийн эмзэг асуудал болох кастрист дэглэмд хураалгасан өмч хөрөнгийн нэхэмжлэлийн асуудлаар хэлэлцээний ширээнд суулаа. АНУ-ын Хууль зүйн департаментын хороогоор хүлээн зөвшөөрөгдсөн зургаан мянга орчим пүүс компани, хувь хүний тухайн үеийн нэг тэрбум 900 сая доллар, одоогийн ханшаар найман тэрбум долларт хүрч болох нэхэмжлэлийг хэлэлцээний ширээн дээр тавьжээ. Энэ жагсаалтад Кубын хувьсгалын дараа Фидель Кастрогийн эрх баригч дэглэмд хураалгаж хохирсон гэж байгаа үйлдвэр, ферм, аж ахуй, орон сууц зэрэг бараг бүх төрлийн өмч хөрөнгө, бизнес байна. Хоёр талын харилцааны хамгийн эмзэг асуудлаар анх удаа хийж буй уулзалтаар АНУ-ын шүүхийн Кубын эсрэг шийдвэр, тогтоол, Вашингтоны Засгийн газрын шаардлагын талаар хөндөн ярилцах аж. АНУ-ын Хууль зүйн департаментаас хүлээн зөвшөөрч, Кубын Засгийн газраас буцааж авах ёстой гэдэг эд хөрөнгөний дүн, тоо хэмжээг Гаваны эрх баригчид хүлээн зөвшөөрөхгүй байгаа юм.
Нөгөө талаар, Кубын Засгийн газар Вашингтоны олон жилийн хориг арга хэмжээний учруулсан хор хохирлыг сөргүүлэн нэхэмжилж байгаа аж. 1961 онд Кочинос буланг эзлэх гэж оролдохдоо учруулсан иргэдийн амь наснаас авахуулаад 1976 онд Кубын нисэх онгоцны эсрэг үйлдсэн халдлага (70 гаруй хүн амиа алдсан)-ын хохирлыг арилгахыг АНУ-аас шаардаж байна. Вашингтон хагас илүү зууны турш Эрх чөлөөний арлын эсрэг дайсагнан харилцахдаа хэдэн зуун тэрбум долларын хохирол учруулсан хэмээн Гавана үзэж байгаа ажээ.
Хамгийн урт удаан, хэцүү бэрх үргэлжлэх төлөвтэй байгаа өмч хөрөнгө, эзэмшилтэй холбоотой асуудлаарх хэлэлцээний эхний алхмыг хийж байна хэмээн Төрийн департаментаас мэдэгдэв. Өмч хөрөнгөө хураалгаж хохирсон гэж байгаа иргэдийн асуудал, нэхэмжлэлийг шийдэхгүйгээр Куба, Америкийн харилцааг хэвийн болгох боломжгүй хэмээн олон хүн үздэг билээ. “Дипломат харилцаагаа сэргээснээр дараагийн чухал асуудлыг хэлэлцэх, ярилцах боломжтой болж байна” хэмээн Вашингтоны мэдэгдэлд онцолжээ. Гаванад ирсэн АНУ-ын төлөөлөгчдийг Төрийн департаментын хуулийн зөвлөх Мэри Маклеод ахалж байна.

Кубын хувьсгалын дараа өмч хөрөнгөө хураалгасан хамгийн тод, алдартай жишээ нь Havana club ром дарсны бизнес юм. 1862 онд Кубын Сантьяго хотод Факундо Бакардийн үүсгэн байгуулсан ром дарсны гэр бүлийн үйлдвэрийг Кубын хувьсгалын дараа эрх баригчид улсын мэдэлд хурааж авчээ. Чихрийн нишингээс гаргаж авдаг Кубын ром дарс нь дэлхийд ихээхэн алдаршсан ундаа билээ. Фидель Кастрогийн дэглэмд үйлдвэр, бизнесээ хураалгасан Бакардийн гэр бүл брэнд нэрээ авч Кубыг орхиж эхлээд Пуэрто-Рико дараа нь Бермудын арал дээр төвхнөж Bacardi дарсны бизнесээ үргэлжлүүлэн хийх болжээ. Тэд Кубад үүсгэн байгуулсан Bacardi дарсаа үйлдвэрлэсээр байгаа ч хосгүй үнэр, амтыг нь өгдөг байсан Куба арлын хөрс, агаарын нөлөө байхгүй болсон гэдэг. Кубын эрх баригчид Bacardi дарсны үйлдвэрийн суурин дээр шинээр ром дарс үйлдвэрлэж La Havana Club нэрээр гаргасан нь дэлхийн алдартай хатуу идээний нэг болсон юм.