Monday, February 20, 2017

Saturday, February 11, 2017

Рок-н-ролл мөхөв. Яагаад Ливерпүүлийг Юрген Клопп ч, Стивен Жеррард ч аврахгүй вэ?

Хөлбөмбөг дахь хамгийн алдартай дуу болон хувирсан “Улаанууд”-ын сүлд дуу You’ll never walk alone үнэндээ Ливерпүүлийг байлдан дагуулсан юм. Аваргуудын лигийн сүлд дууг хүртэл даван цуурайтдаг Анфилдын учир шалтгаан, тэмүүлэл нь түрэмгий фанатуудын бус, хөлбөмбөгийн ч бус харин эв нэгдэлд  уриалсан хүнлэг уриа дуудлагатай тэрхүү дууны үгэнд нь байдаг билээ. Тиймээс л энэ дэлхийн бүх хөгжөөн дэмжигч ямар багийг дэмжиж буйгаа үл тоон энэ дууг хүндэтгэн хайрладаг.
Ливерпүүл романтик буву дэврүүн, гэгэлгэн хот. Энэ хотын тугчин, сахиус нь хүртэл романтик байхаар заяагджээ. Тэр гунигтай байж болохгүй, хүмүүсийн сэтгэлийг хөдөлгөж байх ёстой. Тиймээс тэрхүү сүлд дууг сэтгэл зүрхнээс нь өөрийн эрхгүй оргилсон хүчээр эхлүүлдэг Ливерпүүлийн фанатууд өршөөж уучилдаггүй. Энэ баг уйтгартай, эсвэл байх ёстойгоосоо илүү хувьсгалч, өвөрмөц бус болчихвол Ливерпүүл хот Их Британийн газрын зурагнаас арчигдаж алга болох биз.
Брендан Рожерсийн үед утгаа алдаад байсан Ливерпүүл 2015 оны аравдугаар сард шинэ рокертой болов. Юрген Клопп анхны хэвлэлийн хурал дээрээ л Битлз хамтлагийн нэгэн дуунд гардагчлан “Би энгийн нэгэн” (I’m Normal one) гэсэн гал цогтой мэдэгдлээрээ сэтгүүлчдийг сортолзуулж, копуудын сэтгэлд шууд хүрсэн билээ. Хамгийн сонирхолтой нь Клопп бүр эсрэг дүрээр домог болсон юм. Тэрээр ямар ч энгийн нэгэн бус, харин энгийн, хэвийн бус гэдгийг бүгд ойлголоо.
Клопп аврагч байх “ялтай” ирсэн. Түүний зэрлэг гоё ч гэмээр эрч хүч, сэтгэл татам инээмсэглэл, камерийн өмнө тайван, нухацтай байж чаддаг зэрэг нь “Аврагч”-ийн дүр төрхөнд нь чимэг болж өгдөг. Тэрээр чангаар, мөн аймшигтайгаар “Ливерпүүл өөрийн дасгалжуулагчаа олсон” нэмээн зарлажээ. Яг л хүсч, тэмүүлж байсан хайртаа олсон мэт л. Мэдээж таатай ч бас хариуцлага хүлээх нь ойлгомжтой.
Эндээс Юргенд саад гарч ирэв. Тэрээр тэнгэрээс газар дээр бууж ирсэн ч агуу дуучид, хөгжимчид олны хашгираан, галзуурал дор рок-н-роллын түүхийг бүтээдэг Вудстокийн тайз нь Ливерпүүл клуб биш байсан юм. Ливерпүүл хөлбөмбөгийн клуб нь юуг, яаж, хэнд зориулж тоглохоо огтхон ч ойлгодоггүй, рокер хэмээх нэрэндээ ташууран мансуурсан хүмүүст л тохирох жижигхэн, нууцлаг, гэхдээ зөвхөн тэдэнд л ойлгомжтой философ дээр суурилж, тэр л философоор нэвт шувт тэжээгдсэн ямар нэг илүү хүчирхэг, илүү далайцтай, жинхэнэ нөлөө бүхий зүйл болж таарсан юм.
Ливерпүүл улирлыг сайн эхлүүлсэн ч улмаар суларч, хүснэгтийн адаг хавийн багуудад хожигдож, Клопп хэвлэлийн хурал дээр хүртэл “Би энэ тэнэг хожигдлыг мартаж чадахгүй” хэмээн мэдэгдэл хийх болов. Тэрээр сэтгүүлчдийн өмнө “Бидэнд тоглогч худалдаж авах хэрэг байхгүй” хэмээн мэдэгдэхдээ үнэн бодит байдлыг өөрийн эрхгүй хүлээн зөвшөөрсөн юм. Хөлбөмбөгийн тоймчид ч “Тэрээр Ливерпүүлийн хүнд нөхцөл байдлыг хүлээн зөвшөөрсөн ч гаднаа ил гаргахгүй байна” хэмээн ярьж байв. Гэвч топ-клубыг тодорхойлж, дүрсэлж байсан түүний энэхүү дэврүүн яриа, арга барил нь амжилтын үнэрийг мэдрээд алдсан Европа лигийн финалд замхарч, авах байсан цомоо авч чадаагүй юм.
Европ лигийн финалд хожигдсоны дараа Жейми Каррагер “Юрген, зүүн захын хамгаалагч худалдаж аваач жж” хэмээн Твиттертээ бичиж байв. 2016/17 оны улиралд Клопп довтолгоондоо ганган тоглогчдыг авч, улирлыг гайхалтай эхлүүлэв. Мане, Виналдум хоёр Коутиньо, Фирмино дээр хүч нэмж, тэд ПЛ-л түрүүлж магадгүй нь гэсэн яриа дахин эхлэлээ. Тэд Контегийн Челсийг Стамфорд Брижд нь нухаж, шинэ оны өмнөхөн Гуардиолагийн Ситиг булшлав. Рок-н-ролл буцаад ирсэн мэт л санагдав. Яг л Каррагерийн хүсч байсан рок.
Нэгдүгээр сар хүртэл Ливерпүүлд ямар нэг асуудал гарна гэж хэн ч нухацтай бодоогүй нь лавтай. Хүүхдүүд гүйж, хөгжөөн дэмжигчид дуугаа дуулж, Normal one-ий хөрөг байрандаа залраастай байхад хэн ингэж бодно гэж.. !! Гэтэл сүүлийн есөн тоглолтод ердөө л нэг хожиж, ПЛ-ийн лидерээс 10 оноогоор хоцорч, Аваргуудын лигийн эрхээ алдаж ч магадгүй байрлалд ирээд байна. Гэнэт тэнгэр хөмөрсөн мэт л олон юм орвонгоороо эргэв. Рожерс Аваргуудын лигт оруулж байсан. Ливерпүүлд хаалгач алга. “Майнц”-аас ирсэн хүн, Минолье нарын хооронд өрсөлдөөн алга, хоёулаа муу. Челсигийн хаалган дээр зогсохын төлөө Тибо Куртуа, Петр Чехийн өрнүүлж байсан өрсөлдөөнтэй харьцуулах ч юм биш.
Нэг мэдэхэд л Ливерпүүл 22 тоглолтод 27 гоол алдчихсан тууж явах аж. ПЛ-д 16-д яваа Мидлборо зэрэг Английн Премьер лигийн долоон баг үүнээс бага гоол алджээ.
Английн ПЛ-ийн түрүүг нүцгэн сэтгэл зүй, сэтгэлийн хөөрлөөр авах боломжгүй гэдгийг ойлгосон биз. Фергюсон Видичем-Фердинанд, Манчини Компани, Моуриньо Терри-Кэйхил, тэр бүү хэл Раньери Морган-Хут гэсэн хамгаалалтын тогтвортой сайн ноён нуруугаар авч байсан. Гэтэл Ливерпүүлд сүүлийн таван жилд ийм тогтвортой, бат бэх хамгаалалт байсангүй.
Амжилт бүрийн ард бат бэх суурь байдаг. Анфилдэд тэрхүү суурь буюу хамгаалалт алга. Энэ бол яваад, сурсны эцэст олж авдаг дээд боловсролтой адил. АПЛ-ийн аваргын төлөө тэмүүлж буй клуб бүр энэ суурийг бий болгох ёстой байдаг. Суурийг сүлд дуу, эсвэл Энгийн Клоппын хөргөөр бүтээхгүй, харин ухаж суулгаж бий болгодог. Тэд гитар, бөмбөр тоглож, дуулж чаддагүй байсан бол Битлз төрөн гарч, хувьсгал хийхгүй байсан.
Клоппт эхнээс л ингэж нэрлэчихсэн болохоос тэр аврагч биш. Энд Рожерс ч, Далглиш ч аврагч биш. Ливерпүүлд Гуардиолаг, Жеррардыг, эсьэд бүр Пол Маккартнийг ч авчирч болно. Харин хэн ч тусалж чадахгүй.

Тиймээс рок-н-ролл нь фон, хавтас, эсвэл түүх байж болох ч түшиг тулгуур бол биш. Байлдааны нэр хоч нь Газар дээрх ганцхан дуу авиа, нэр биш. Хотын дэврүүн, романтик байдал оргил цагийн замын түгжрэлийг арилгахгүй. Яагаад гэвэл, мөрөөдөгч, цөхөрсөн, гэхдээ хувьтай Ливерпүүл клубыг Ливерпүүлээс өөр хэн ч аврахгүй.

Wednesday, February 8, 2017




Иванка Трамп – АНУ-ын “Тэргүүн” охин

АНУ-ын Ерөнхийлөгч Дональд Трампын том охин Иванка 35 насандаа амжилттай бизнесмэн, зохиолч, олонд нэртэй танил болжээ. Түүний хөрөнгө мөнгө 150 сая долларт хүрээд байна. Харин Цагаан ордны шинэ эзэн Д.Трамп том охиныхоо ирээдүйг хэрхэн харж байгаа бол?
Иванка Трамп олны анхааралд өртөх дуртай биш. Тэрээр өсвөр насандаа загвар өмсч, дараа нь моод, бизнес, хэвлэл мэдээлэл болон өөрийгөө хөгжүүлж төгс төгөлдөр болгох урлагийг хамарсан томоохон группын эзэн болсон юм. Эцэг нь АНУ-ын 45 дахь Ерөнхийлөгч болсон тул Иванка илүү их анхааралд өртөхөөр болж байна. Д.Трамп Цагаан ордонд ирэхдээ охиноо нөхөр Жаред Кушнерийнх хамт Цагаан ордонд авчирна хэмээн мэдэгдэж байсан билээ. Иванка гэр бүлийн хамтаар Вашингтон хотын төвийн нэр хүнд бүхий Жоржтаун дүүрэгт шилжихээр төлөвлөж байх хооронд тэргүүн хатагтайд зориулан тохижуулсан Цагаан ордны өрөөг “тэргүүн” охинд гаргаж өгөх гэж байгаа гэсэн яриа гарчээ. Цагаан ордонд анх удаа ирж, анх удаа Вашингтоны улс төрийн тавцангийн төвд гарч ирсэн тэргүүн хатагтай нар төр, засгийн өдөр тутмын ёслол, ажиллагаанаас зайгаа барьдаг нь гайхалтай зүйл биш хэмээн АНУ-ын тэргүүн хатагтай нарын тухай ном бичдэг Сюзан Суэйн өгүүлж байна. Зарим мэдээллээр, тэргүүн хатагтай Меланиа Трамп амьдралынхаа “хэвийн хэмнэл”-ийг хадгалж, хүүхдүүдээ олны анхаарлаас хол байлгахын тулд нэг хэсэг Нью-Йорк хотод үлдэх шийдвэр гаргасан гэж байна.
New York Times сонин мэдээлснээр, Эрик Трампын өглөгийн сан Иванка Трамптай кофе уух эрхийг дуудлагаар худалджээ. Лондонд хөрөнгө оруулалтын бизнес эрхэлдэг Озан Озкурал гэгч АНУ-ын шинэ Ерөнхийлөгчийн Турк болон бусад орны талаар баримтлах бодлогыг тандаж мэдэх боломж хэмээн үзэж энэ эрхийн төлөө 60 мянган доллар санал болгосон юм. Үнэ хаялцсаар 72 мянга 888 долларт хүрч, энэ бүх орлогыг Теннеси дахь St Jude дахь хүүхдийн эмнэлэгт хандивлана гэжээ. Гэвч дараа нь Америкийн хамгийн нөлөө бүхий бүсгүйтэй кофе уух эрхийн дуудлага худалдааг цуцалсан юм.
Меланиа Нью-Йоркт саатаж байх хооронд, Иванка Цагаан ордон дахь албан ёсны арга хэмжээнд эцгийгээ дагалдаж, зарим үед улс орны тэргүүн хатагтайн үүргийг гүйцэтгэх бололтой. Ийм тохиолдол АНУ-ын түүхэнд нэг бус удаа гарч байсан билээ. Иванка эмэгтэйчүүдийн эрх, цаг агаарын өөрчлөлт, хүүхдийн асран хамгаалал зэрэг асуудлаар зоригтой мэдэгдэл хийж, олон нийтийг уриалан дууддаг идэвхтэй нэгэн. Хэдийгээр түүний үзэл бодол Бүгд найрамдах намын бодлоготой зөрөлдөх магадлалтай ч тэрээр Ерөнхийлөгч эцэгтээ ихээхэн нөлөө үзүүлэх чадалтай, хүчтэй эмэгтэй хэмээн тоймч, ажиглагчид үнэлж байна.

Хятадад орохдоо хурууны хээгээ өгнө

Хятадын эрх баригчид улс орны нутаг дэвсгэрт орж ирж буй гадаадын бүх иргэдээс хурууны хээг нь авч байхаар болсныг тус улсын Үндэсний аюулгүй байдлын яамнаас зарлалаа. Гадаадын жуулчин, гийчдийг бүртгэх шинэ системийг Гуандун мужийн Шэнжэн хотын олон улсын нисэх буудал дээр хоёрдугаар сарын 10-наас эхлэн туршиж үзэхээр болжээ. Оны эцэс гэхэд Хятадын хилийн бүх шалган нэвтрүүлэх боомт дээр хурууны хээ авдаг болох аж. Хятад улсад зорчихоор ирж буй 14-70 насны иргэдээс хурууны хээ авна. Харин гадаадын дипломат ажилтнууд үүнээс чөлөөлөгдөж байгаа юм. Хурууны хээ авах нь гадаадын олон оронд өргөн тархсан, дотоодын аюулгүй байдлын үүднээс ийм арга хэмжээ авч байна хэмээн Бээжингийн Засгийн газрын төлөөлөгч мэдэгдлээ.

Крымд зургаан мянган хүн гэрэлгүй хоцров

Таагүй цаг агаарын улмаас цахилгаан дамжуулах шугам хөлдөж, тасарсны улмаас Крымийн зургаан мянга орчим иргэн гэрэл, цахилгаангүй болоод байна хэмээн ОХУ-ын Эрчим хүчний яамнаас мэдээлэв. Нийтдээ 21 тосгон, суурин гэрэлгүй болоод байна. Тус хойг дээр гэрэл цахилгааны ханган нийлүүлэлт хүндэрсэн тул хоёр өдрийн турш тэг зогсолт хийхээс аргагүй байдалд оржээ. Мэргэжилтэн, инженерүүд ослын үр дагаварыг арилгахаар шуурхай ажиллаж байна.
Украинд дотоодын хямрал, мөргөлдөөн хурцадсаны дараа буюу 2014 оны гуравдугаар сард Крымийн хойг дээр бүх нийтийн санал асуулга болж иргэдийн дийлэнх олонх нь ОХУ-д нэгдэх нь зүйтэй хэмээн шийдвэр гаргасан юм. ОХУ-ын засаг захиргаа энэ шийдвэр дээр үндэслэн Украины мэдэлд байсан Крымийг өөртөө нэгтгэсэн билээ.

Афганистанд Улаан загалмайн ажилтнуудыг хөнөөжээ

Афганистаны хойд хэсгийн мужид хүмүүнлэгийн тусламж түгээж явсан Олон улсын улаан загалмайн нийгэмлэгийн зургаан ажилтан алан хядагчдын дайралтад өртөн амь насаа алджээ. Их цасанд нэрвэгдсэн тосгоны иргэдэд хүмүүнлэгийн тусламж хүргэж явсан афган иргэд байсан аж. “Исламын улс” бүлгийн хамсаатнууд энэ халдлагыг үйлдсэн хэмээн эрх баригчид үзэж байна. Халдлагын дараа хоёр ажилтан сураггүй алга болсон хэмээн Олон улсын улаан загалмайн нийгэмлэгийн төлөөлөгч Томас Гласс мэдэгдлээ. Афганы хойд нутгаар ихээхэн цас орж, зарим сууринд ихэд хүйтэрч, уулын цас нурсны улмаас 100 орчим хүн амь насаа алдаад байгаа аж.