Фото мэдээ

В.Путиний супер амралт

Эцэг Буш юуны тулд үсээ хусуулав?

АНУ-ын 41 дэх Ерөнхийлөгч эцэг Жорж Буш хамгаалагчийнхаа хоёр настай өвчтэй хүүг сэтгэлээрээ дэмжиж, эв санаагаа илэрхийлэхийн тулд үсээ хусуулжээ. Хамгаалалтын албаны хэд хэдэн гишүүн цусны өвчнөөр шаналж байгаа хамгаалагч Жоны хүү Патриктэй эв санаагаа нэгтгэн үсээ хусуулсан байсныг 89 настай Буш мэдээд дээрх шийдвэрийг гаргасан байна. Ерөнхийлөгч асан Ж.Буш Патрик хүүгийн хамтаар инээмсэглэн суугаа зураг олон хэвлэл сонин дээр гарчээ. Ж.Буш, түүний гэргий Барбара нар 1953 онд анхны охин Робиноо гурван настайд нь мөн ийм өвчнөөр алдаж байсан юм. Тэгээд хорт хавдрыг судлах, эмчлэх ажилд бүхий л амьдралынхаа туршид тусалж, дэмжсээр ирсэн аж. Хамгаалагчид жаал хүүгийн эмчилгээнд хандив цуглуулахаар www.patrickpals.org сайт нээсэн бөгөөд Буш, Барбара нар ч өөрсдийн хандиваа өргөсөн байна.

Кубын “heavy metal” хамтлагийнхан АНУ-аас орогнол хүслээ

Кубын Hipnosis “heavy metal” хамтлагийн зургаан гишүүн АНУ-д аялан тоглолтоор газардсан даруйдаа тус улсаас оршин суух эрх хүсчээ. Тэд нэгэн хувийн промоуторийн урилгаар АНУ-д тоглохоор Майами хотод ирээд байсан аж. “Боломж, бололцоо байдаггүй, хэн ч хэнээс ч юу ч хүлээдэггүй улс орныг орхиж, ирээдүйнхээ эзэн болохыг бид эрмэлзлээ” хэмээн хамтлагийн дуучин, гитарчин Жиовани Милет интернэтэд байрлуулсан мэдэгдэлдээ онцолсон байна. Тэд Гавана хотоос нисч Майамид буунгуутаа орогнол хүсчээ.

Hipnosis хамтлаг 2002 онд шилдэг хамтлагийн шагнал хүртэж, тэр ондоо анхны цомгоо гаргаж байжээ. 2012 онд гаргасан “Revelation” цомог нь олон улсын “heavy metal” уралдаанаас шилдэг цомгийн шагнал хүртэж байв.  

Туркийн элчин сайдын яамыг дэлбэлэв

Сомалийн нийслэл Могадишо хотод амиа золиослогч этгээд Туркийн элчин сайдын яамыг дэлбэлжээ. Хоёр хүний амь үрэгдэж, есөн хүн шархадсан байна. “Аль-Кайда”-тай нягт холбоо сүлбээтэй “Аль-Шабаб” лалын хөдөлгөөн Сомалийн Засгийн газрыг дэмждэг Турк улсад ийнхүү дургүйцлээ илэрхийлэв. Нийтдээ гурван алан хядагч элчин сайдын яамыг довтолжээ. Хоёр нь хамгаалагчдыг устгаж, гурав дахь нь дэлбэрэх бодис ачсан машинаар нэвтрэн орж элчин сайдын яамыг дэлбэлсэн аж.

“Аль-Шабаб” нь Сомалийн эрх баригчид болон олон улсын байгуулагын эсрэг байнга халдлага үйлддэг. Тус бүлэг Сомалийн үлэмж хэсгийг хянаж, шариатын хууль дээр үндэслэсэн лалын улс байгуулахыг эрмэлздэг ажээ.

М.Ахмадинежад их сургууль удирдана

Албанаасаа бууж буй Ираны Ерөнхийлөгч Махмуд Ахмадинежад Тегеранд байгуулагдаж буй технологийн их сургуулийг удирдахаар болжээ. Тэрээр Лалын бүгд найрамдах улсын Соёлын дээд зөвлөлөөс их сургууль байгуулах зөвшөөрлийг авсан байна. Шинэ их сургууль нь мэдээллийн болон нано технологи, сансрын, цөмийн судалгаа шинжилгээний мэргэжилтнүүдийг бэлтгэх аж.

2005-2013 онд Ираныг удирдсан М.Ахмадинежад наймдугаар сарын 4-нээс шинэ албан тушаалдаа очно. Энэ өдөр шинээр сонгогдсон Ерөнхийлөгч Хасан Рохани тангараг өргөх юм. Ахмадинежад Тегераны их сургуулийг шинжлэх ухаан, технологийн чиглэлээр төгсчээ.

Афганистанд 45 босогчийг устгажээ

Олон улсын цэргийн хүчин Афганистаны Хельманд мужид агаараас довтолж 45 босогчийг устгалаа хэмээн “Синхуа” мэдээлэв. Зэвсэгт босогчид сууж явсан таван авмомашиныг нисэх онгоцноос буудаж 45 босогчийг устгаж, гурвыг шархдуулсан аж. Агаарын довтолгоог талибуудын үүр болоод байсан Бахрамч хотод хийсэн хэмээн Хельманд мужийн засаг захиргааны төлөөлөгч Омар Завак мэдэгдлээ.

Хар арьст сайд руу гадил шиджээ

Италийн Засгийн газрын анхны хар арьст эмэгтэй сайд Сесиле Кайенге Червия хотод олны өмнө үг хэлж байхад нэгэн этгээд түүн рүү гадил шиджээ. Хэдийгээр “гадилан довтолгоо” байндаа хүрэлгүй наана унасан ч шуугиан дэгдэхээс зайлж чадсангүй. Хэд хоногийн өмнө хэт барууны үзэлтэй “Шинэ хүч” намынхан улаан өнгөөр будаж, “Цагаачлал биднийг хөнөөж байна” гэсэн зурагт хуудас барьсан хиймэл хүмүүсээр хар арьст сайдыг угтжээ. С.Кайенге Италийн иргэншил олгох журмыг хөнгөвчлөх хууль санаачилсныг ийнхүү эсэргүүцсэн бололтой. Сенатч Роберто Калдеро саяхан бас түүнийг орангутан сармагчинтай зүйрлэн доромжилсон билээ.

Үхэр тэрэг, Мерседесийн хоорондох Хойд Солонгос

Австралийн үхрийн гол мах, Бурдо дарс, лаазтай Пепси Кола, өндөр өсгийт гутал тэргүүтэн Пхеньяны хамгийн шилдэг супермаркетэд өнгө алаглана. Тэнд Hennessy конъякийг зарах үнэ нь 250 евро. Төрийн албан хаагчид нь сарын гурван мянган воны цалинтай (албан ёсны ханшаар 20 евро) тул ийм тансаг хэрэглээ цөөхөн хэдэн хойдсолонгост “заяагджээ”. Хорчийсон байцааны навч, өнгө муутай алимнаас өөр гялайх юмгүй улсын дэлгүүрүүдийн хажууд эдгээр супермаркетууд нь дүүрэн бараатай, хойд иргэд хааяа нэг орж ирэн нүд хужирлан, харж ч болтугай хорхойгоо дарах аж. Тэнд арван мянган воныг өрнөдийн валютаар солин НҮБ-ын хориг арга хэмжээг тохуурхан Хятадын хилээр оруулж ирсэн барааг худалдаж авах ажээ.

Залуухан Ким Чен Уны дэглэм эдийн засгаа бага зэрэг нээлттэй болгосон ч Японд цагаачлан гарсан хагас сая хойдуудын ар гэртээ илгээдэг мөнгө, худалдаа наймааг хянадаг төрийн болон цэргийн албан тушаалтнуудыг авлигаддаг мөнгө эдийн засгийг нь хүссэн хүсээгүй нээж, “урагшлуулж” байна. Одоогийн удирдагчийн эцэг, өвөө Ким Чен Ир, Ким Ир Сен нарын дүртэй тэмдгийг энгэртээ зүүж, жуулчдыг хаа ч явсан дагалдан харгалзаж явдаг Засгийн газрын хөтөчүүд өмнө нь хориотой байсан “цайны мөнгө” авч болдог болжээ. Хотын төв талбайгаар хосууд гараасаа хөтлөлцөн алхахыг бас л саяхан болтол хориглож байлаа. Бээжингийн нислэгээр буцан ирж байгаа дипломатууд гэр бүл, хамаатан садандаа бэлэглэх, эсвэл дамлан зарах гэж байгаа электрон бараагаар чемоданаа дүүргэн ирэх болов. НҮБ-ын хориг аргах хэмжээ хүчин төгөлдөр байгаа ч Пхеньяны төмөр замын буудлын эсрэг талын дэлгүүрт Sony компьютерийг 850, Sanyo зурагтыг 380 доллараар зарж байх ажээ.

Пхеньяны эртний өргөн чөлөөгөөр автомашинууд улам их үзэгдэх болсон байна. Гэхдээ зөвхөн Хятадын компанитай хамтран үйлдвэрлэсэн үндэсний брэнд Fiparam хөнгөн тэрэг, Samcheonri фургон бус, Хөдөлмөрийн намын дээд тушаалтнуудын хөлөглөх дуртай өндөр зэрэглэлийн Audi, BMW, Mercedes ч харагдах аж. Өнгөрсөн жил Чанжеон гудамжинд сүндэрлэн боссон 45 давхар тэнгэр баганадам орчин үеийн барилгын хажууд пирамид хэлбэртэй Ryugyong зочид буудал баригдаж дуусч байна. Гар утас Пхеньяны иргэдийн шинэ билэг тэмдэг болж, Кока-Кола болон Marlboro тамхи санал болгодог пицца болон гамбургерийн хэд хэдэн газар нээгджээ.

Гэвч хаалттай коммунист дэглэмийн элит ангийнхан амьдардаг нийслэл хотоос гарахад л Хойд Солонгосын уйтай, цөхөрсөн амьдрал залгаж авна. Чонгсанри үйлдвэр рүү явахад замын хоёр талаар тариачид үхэр тэргээр газар хагалан, болхи багаж хэрэгслээр ажил хийж байх нь тааралдана. Өмнөх талбайдаа улс орны эцэг Ким Ир Сений хөшөөг залсан 2500 ажилчинтай Чонгсанри үйлдвэр нь ургац нэмэгдүүлэх нэг арга хэмээн үзэж буй хүлэмжийг үйлдвэрлэн хөдөө нутагт суулгадаг аж.

“Бид жил бүр нэг хүний 400 кг цагаан будаа, 300 кг төмс, улаан лооль болон бусад хүнсний ногоо хүлээж авдаг” хэмээн хоёр ач зээгээ харан суудаг 59 настай эмээ Чой Оксон өгүүлж байна. Гадаадын зочид, гийчдийг түүн дээр авчирч байхаар сонгосон тул Чой эмээ үлгэр жишээ байх ёстой. “Зөвхөн удирдагчдын төрсөн өдөр зэрэг онцгой тохиолдолд бидэнд мах өгдөг. 90-ээд оны хэцүү цаг үеийг (Их өлсгөлөн) бодвол байдал хавьгүй сайжирсан” хэмээн тэрээр ярилаа. 90-ээд оны Их өлсгөлөнгийн үеэр Пхеньян 300 мянган иргэнээ алдсан гэдэг бол, гадаадынхны тооцоогоор сая гаруй хүн амь насаа алджээ.

Капитализмийн зүг чимээгүйхэн, ичингүйрэн алхаж байгаа тус улсад тариачид эдүгээ гэрийнхээ гадаа тариа, ногоо тарьж орон нутгийн зах зээл дээр худалдах эрхтэй болсон юм. Ингэж олсон мөнгөөрөө өөр зүйл худалдан авч тосгондоо авчран дамлан зарах моод дэлгэрчээ. Хэдийгээр армийн хянан шалгах постуудаар хүмүүсийн хөдөлгөөнийг хянаж, өөр хот руу явахыг хориглодог ч нуруун дээрээ, дугуйн дээр хүнд, овор ихтэй зүйл үүрсэн, ачсан хүмүүс замын хоёр талаар шоргоолж шиг бужигналдах болсон байна. Мөн цахилгааны хомсдолд орсон иргэд орон гэрээ халаахын тулд баглаатай, шуудайтай түлээ үүрэн алхална. Өдрийн хэдхэн цагт нь гэрэл цахилгаан ирээд алга болдог аж. Үхэр тэрэг, Mercedes-ийн дундуур Хойд Солонгос улс тодорхойгүй ирээдүй рүү урагшилсаар байна.

Э.Сноуденийг Орост гэрлэх санал, ажил, орон сууц хүлээж байна

Нэг сарын өмнө Москвагийн Шереметьево нисэх буудалд учир битүүлгээр ирсэн Тагнуулын төв газрын шинжээч асан Эдвард Сноуден гэрлэх санал, ажил, гэр хүлээж байгаа Орос оронд эрх чөлөөгөө олж авах бололтой. “Шударга бусаар мөрдөгдөн зовж байгаа хэн бүхнийг манай ард түмэн үргэлж энэрэнгүй сэтгэлээр хүлээж авдаг. Бурхны хүслээр Эдвард Сноуден Орост түр орогнох эрхтэй боллоо” хэмээн Оросын “Пчелки” ортодокс байгууллагаас мэдэгдлээ. Тус байгууллага америк залууд туслах сан байгуулснаа зарласан байна. Өмгөөлөгч Анатолий Кучерений хэлж буйгаар, Сноуден цаашдын хувь заяагаа өөрөө шийдвэрлэх боломжтой болж байгаа аж. Ямартай ч Америкийн нууц байгууллагуудын тагнуулын сүлжээ, булхайг ил гаргасныхаа төлөө АНУ-ын хууль хяналтын байгууллагаар хамгийн ихээр эрэн сурвалжлагдаж байгаа экс тагнуулчийн түр зуурын гэрээр Орос орон тодорч байх шиг. Сноуден өнгөрсөн долоо хоногт Оросын цагаачлалын албанаас түр хоргодох эрх хүссэн бөгөөд түүний өмгөөлөгч “Бид хамтдаа Москвагаар зугаалах болно. Түүнийг Улаан талбай дээр хараарай” хэмээн ярьжээ.

29 настай америк залуу эдүгээ ОХУ-ын Холбооны цагаачлалын албанаас хоргодох эрхийнхээ хариуг хүлээж байна. Түүний хүсэлтийг хүлээн авахгүй байх шалтгаан байхгүй бөгөөд хариу ирсэн даруйд нисэх буудлын дамжин өнгөрөх бүсийг орхиж Орос улсаар чөлөөтэй зорчиж болох ажээ. Оросын Дотоод хэргийн яам, прокурорын газраас гаргасан мэдэгдэлд, Сноуденийг хүлээн авч, аюулгүй байдлыг нь хангана хэмээгээд ямар ч тохиолдолд түүнийг АНУ-д хүлээлгэн өгөхгүй гэсэн байна. Хэдэн жилийн өмнө АНУ руу гарч бүгсэн Чеченийн алан хядагч Илиас Ахмадовыг ОХУ шилжүүлэн авахаар хөөцөлдсөн ч Вашингтон татгалзсан хариу өгч байсан юм. Оросууд 20 орчим гэмт хэрэгтэн, алуурчин, террористыг хүлээлгэж өгөх хүсэлт гаргасан ч Америкийн тал татгалзаж байсныг ОХУ-ын Ерөнхий прокурорын газрын Гэмт хэрэгтэн шилжүүлэх хэлтсийн дарга Сергей Горленко дурдлаа. Энэ хооронд Вашингтон ОХУ-д хандан “зөв хөдөлж”, төрийн нууцыг задруулсан этгээдийг АНУ-ын шүүхэд шилжүүлэн өгөхийг дахин шаарджээ.

Эдвард Сноуден түр орогнох эрх олж авбал дүрвэгсдэд олгодог хүмүүнлэгийн статус буюу нэг жил орогнох эрхтэй болно. Тэгвэл тэрээр Орост ажил хөдөлмөр эрхэлж орос иргэдтэй бараг адил эрх эдлэх юм. Иргэдийг хууль бусаар тагнаж, чагнадаг АНУ-ын нууц хөтөлбөрийг илчилснийхээ төлөө хүнд байдалд ороод байгаа Сноуденийг оросууд ихэд дэмжиж байгаа аж. Оросууд түүнийг дэмжих сан байгуулж, хандив цуглуулж байна. Герман дахь Олон улсын шударга тод байдал байгууллагаас Сноуденд шагналаа олгожээ. Эрх чөлөөг хамгаалагчдад олгодог энэ шагналыг дөрвөн мянган доллар дагалддаг. Үүнээс гадна Сноудентэй гэрлэх, орон сууц олгох санал олноороо ирээд байгаа аж. АНУ-д тагнуул хийж байгаад баривчлагдан, дараа нь Орост баривчлагдсан америк тагнуулчдаар "арилжигдан" эх орондоо ирсэн дур булаам, залуухан бүсгүй Анна Чапман түүнтэй гэрлэсэн ч яахав гэдэг санаагаа олон нийтийн сүлжээгээр дамжуулан илэрхийлсэн билээ. Анна эдүгээ загвар өмсөгч, бизнесмэн болж, Оросын хамгийн цуутай сайхан бүсгүйчүүдийн нэг болсон билээ. 

Эдвард Сноуден Орост ямар ч ажил хийсэн АНУ-ын нууц албаны мэдээллийг ил болгох үйл хэргээсээ татгалзах хэрэгтэй болж байна. “Сноуден Орос-Америкийн харилцаанд хохирол учруулахуйц үйл ажиллагаа явуулахыг зөвшөөрөхгүй” хэмээн Кремлийн тэргүүн В.Путин сануулсан билээ.

29 настай экс тагнуулч Оросын иргэншил хүсч магадгүй байна. Эхэндээ тэрээр улс төрийн орогнол олгоход бэлэн байгаа Венесуэль, Никарагуа, Болив улс руу гарах сонирхолтой байсан ч энэ санаагаа орхисон бололтой. “Хэн нэгэн хүн манай иргэншлийг хүсч өргөдөл гаргавал судалж үзэх болно” хэмээн Кремлийн төлөөлөгч мэдэгджээ.

Фалькао, та хэдэн настай вэ?

Испанийн “Атлетико” клубээс Францын “Монако” клубт 60 сая доллараар ирсэн колумб довтлогч Радамель Фалькао 27 настай, 1986 оны хоёрдугаар сарын 10-нд төрсөн хэмээн бүх бичиг баримт дээр нь байдаг аж. Гэтэл тэрээр хүүхэд ахуйдаа сурч байсан Колумбийн Букараманга хотын Сан Педро Клавер сургуулийн бичиг баримт дээр түүнийг 1984 онд төрсөн гэж тэмдэглэсэн байжээ. Фалькаогийн эцэг “Энэ бол алдаа” гэж байгаа бол, сургуулийн захиргаа “Сургуулийн шилдэг сурагч байсан Фалькаог яам руу бүртгүүлэх үеэр ийм бичиг баримт гарч ирсэн. Манай бичиг баримт бол баараггүй” хэмээн мэдэгдэж байна. Ийнхүү моодонд ороод байсан колумб довтлогч шууд хоёр насаар “хөгшрөв” бололтой.

Дани Афганистанаас цэргээ гаргалаа

Дани улс Афганистанаас цэргээ татлаа хэмээн DR телевиз мэдээлэв. Долдугаар сарын 22-нд Данийн 250 тэнгисийн цэрэг Хельманд муж дахь Camp Price баазыг орхижээ. Гэвч цөөн тооны дани цэрэг афган цагдаа нарт туслахаар Афганистанд үлдэж байгаа юм. Сүүлийн 12 жилд Данийн 43 цэрэг Афганистанд амь үрэгдэж, 211 цэрэг шархадсан байна. Дани улс Афган дахь цэргийнхээ зардалд 26.3 тэрбум доллар зарцуулжээ.

Автобус шатаж 19 хүн амиа алджээ

Тайландад зорчигч тээврийн автобус ачааны машинтай мөргөлдсөний улмаас 19 хүн нас бараад байна. Хоёр давхар автобус машинтай мөргөлдсөний дараа шууд шатжээ. 19 хүн газар дээрээ, нэг хүн эмнэлэгт нас баржээ. 20 хүн гэмтэж бэртсэн аж. Урьдчилсан шалгалтаар, ачааны машин эсрэг урсгалд орж Бангкокоос гарч явсан автобусыг мөргөсөн байна. Ачааны машины жолоочийг баривчилжээ.

“Хезболла” Европын холбооны шийдвэрийг зэмлэв

Ливаны өмнөд нутагт төвлөрөн үйл ажиллагаа явуулдаг лалын “Хезболла” бүлгийн цэргийн жигүүрийг Европын холбоо террорист байгууллагуудын жагсаалтад оруулсан билээ. Тус бүлэг энэ шийдвэрийг “түрэмгий, шударга бус” хэмээн буруутгаад энэ шийдвэрийг зөвтгөх ямар нэг шалтгаан алга гэжээ. Хэд хоногийн өмнө Европын холбооны Гадаад хэргийн сайд нар Брюссельд хуралдахдаа “Хезболла”-гийн цэргийн жигүүрийг террорист байгуулага хэмээн үзэх шийдвэр гаргасан юм. АНУ, Израиль, Их Британи, Канад, Египет улс “Хезболла”-г террорист байгуулага хэмээн үздэг ажээ.  

Сербийн тэргүүн баян барьцаагаар суллагджээ

Сербийн хамгийн баян иргэн, үйлдвэрийн эзэн Мирослав Мишкович 2012 оны эцсээс хойш хоригдон шалгагдаж байгаад өчигдөр 12 сая долларын барьцаа төлж суллагджээ. Энэ тухай Белградын дээд шүүхээс мэдэгдсэн байна. Мишкович санхүүгийн луйвар хийсэн хэргээр буруутгагдаж байгаа юм. 68 настай бизнесмэний гадаад паспортыг хурааж, сар бүр Белградын цагдаагийн хэсэг дээр ирж бүртгүүлж байхыг тушаажээ.

Мохамед Мурси хулгайлагдсан гэв

Египетийн Ерөнхийлөгч асан Мохамед Мурси хулгайлагдсан хэмээн түүний гэр бүлийнхэн мэдэгдлээ. Мурсийн охин Шаима “Цэргийнхэн миний эцгийг хулгайлж хорилоо” хэмээн “Аль-Арабия” телевизэд ярьжээ. “Лалын ахан дүүс” хөдөлгөөний харъяанд байдаг Эрх чөлөө, шударга ёс намын төлөөлөгч “Шүүхийн шийдвэргүйгээр гэрийн хорионд оруулсан нь хулгайлж, барьцаалсантай адил” хэмээн мэдэгдлээ.

Египетэд цэргийн эргэлт гарснаас хойш Мурсигийн гэр бүлийнхэн ч, хамтран зүтгэгчид нь ч түүнийг хараагүй аж. Энэ өдрүүдэд Каир хотноо эрх мэдлээсээ хүчээр зайлуулагдсан Ерөнхийлөгчийг дэмжигчид болон эсэргүүцэгчдийн хооронд мөргөлдөөн гарсаар байна.