“Мэтью” шуурга 27 хүний аминд хүрлээ

Карибын тэнгисийн сав газрыг дайрсан “Мэтью” далайн шуурга 27 хүний аминд хүрч, олон арван хүнийг гэмтээлээ хэмээн Reuters агентлаг уламжлав. Байгалийн гамшиг Гаитид гэхэд л 21 хүний амийг авч оджээ. Доминиканы бүгд найрамдах улсад дөрөв, Колумб, Сент-Винсент Гренадина арал дээр тус бүр нэг хүн амиа алдаад байна. “Мэтью”-г 2007 оноос хойшх хамгийн хүчтэй далайн шуурга хэмээн ярьж байсан ч хүч нь буурсаар таваас гуравдугаар зэрэглэлд очжээ. Эдүгээ далайн хүчтэй салхи Багамын арал руу дөхөж, АНУ-ын эрэгт хүрэхээр заналхийлж байна. АНУ-ын Флорида, Жоржиа, Хойд болон Өмнөд Каролина муж далайн шуурганаас сэргийлэх арга хэмжээ авч, ард иргэдийг аюулгүй газар нүүлгэн шилжүүлж байна.