Агаарын довтолгоо 140 хүний аминд хүрлээ

Саудын Араб тэргүүтэй цэргийн эвсэл Йемений нийслэл Сане хотод агаараас довтолгоо хийсний улмаас оршуулгад оролцож байсан 140 хүн амь насаа алджээ. Шархдаж бэртсэн хүний тоо 500-д хүрлээ хэмээн Йемений Эрүүл мэндийн яамнаас мэдээлэв. Харин цэргийн эвсэл агаараас довтолсон гэдгээ няцааж байна. Босогчдын төлөөлөгч Мохаммед Абдул-Салам агаарын довтолгооныг “үй олноор хөнөөсөн үйлдэл” хэмээн нэрлэжээ. Амь үрэгдсэн, шархадсан хүмүүсийн дотор шийт шашинтай хусит босогчдын өндөр албаны хүмүүс байгаа аж.

Саудын Араб тэргүүтэй цэргийн эвсэл 2015 оны гуравдугаар сараас эхлэн Йемений хусит босогчдын эсрэг цэргийн ажиллагаа явуулж эхэлсэн юм. Иран улс, улс орны Ерөнхийлөгч асан Али Абдалла Салехт үнэнч нутгийн цэргийнхэн энэ ажиллагааг дэмжиж байна. Дөрөвдүгээр сараас хойш цэргийн эвсэл хуситуудын байрлалыг агаараас довтлох болжээ.

Авлигач шүүгчдээс 800 мянган доллар хурааж авчээ

Ниегийн эрх баригчид авлигын эсрэг кампанит ажил өрнүүлж өндөр тушаалын хэд хэдэн шүүгчдийн гэрт нэгжлэг явуулсны эцэст 800 мянга гаруй доллар илрүүлэн хураажээ. Цагдаа нар шүүгчдийн гэрээс гадаад валют, үл хөдлөх хөрөнгө худалдаж авсан, авлигын торонд орооцолдсон нотолгоог олж авчээ. Нэгжлэгт өртсөн хүмүүсийн дотор шүүхийн дээд зөвлөл, давж заалдах шатны шүүх, дээд шүүхийн шүүгчид байгаа аж. “Зарим шүүгчийн хөрөнгө, тансаг амьдрал анхаарал татаж буй талаар иргэдээс гомдол ирсэн. Шүүхийн үйл явц, шийдвэрийг ч гажуудуулж байгаа талаар мэдээлэл ирсний дараа авлигын эсрэг кампанит ажил өрнүүллээ” хэмээн цагдаагийн газрын мэдэгдэлд онцолжээ. Авлигын эсрэг тэмцэл, террорист “Боко Харам” бүлгийн эсрэг тэмцэл, ажилгүйдлийг бууруулах гээд жилийн өмнө сонгогдсон Ерөнхийлөгч Мухаммад Бухари тун идэвхтэй ажиллаж байна.

Энэтхэг залуугийн 20 см сүүлийг тайрчээ

Энэтхэгийн Нагпур хотын 18 настай залууд 20 см урт сүүлийг нь тайрах мэс засал хийжээ. Хөвгүүнийг 15 нас хүрэхэд ахар сүүл нь ургасаар ийм урт болсон аж. Тэрээр, түүний гэр бүл бусдын доог тохуу болохоос айж хэдэн жилийн турш энэ байдлаа нууж явсан юм. Гэвч сүүл нь ургасаар бүр дотроо ястай болж эзэндээ ихээхэн түвэг удах болсон тул нууж хаах аргагүй болж эмнэлэгт хандсан байна. Төрөлтийн гажгийг улмаас хөвгүүний нуруу сээрний төгсгөл хэсэг дарагдаж шамшийсний улмаас ургалт үүссэн хэмээн таамаглаж байна. Мэс засал тийм хүнд биш байсан ч нурууг нь мэдээгүй болгох мэдрэлийн мэс засалч шаардлагатай болсон аж. Эмч нар 20 см сүүлийг тайрч авсан нь анагаарын түүхэнд хүний хамгийн урт сүүлэнд тооцогдож байна.