Кэмбрижийн гүнж Кейт хаан ширээ залгамжлах хүү төрүүллээ

Британийн хаан ширээг залгамжлагч, Кэмбрижийн гүн, ханхүү Уильямын гэргийн Кейт Мидллтон уржигдар Лондоны Сейнт Мэри эмнэлэгт амаржиж хүү төрүүлжээ. Кейт орон нутгийн цагаар 16.24-т амаржиж 3.7 кг жинтэй хүүтэй болов. Эх, хүүхдийн бие сайн байгаа бөгөөд эхний өдрийг эмнэлгийн хяналтад өнгөрөөж байна. “Бид хамгаас илүү баяртай байна” хэмээн ханхүү Уильям мэдэгджээ.

Хаан ширээ залгамжлах ханхүү мэндэллээ гэсэн албан ёсны зарлалыг Лондон дахь Букинамын ордны гадаа уламжлал ёсоор жаазанд хийж хүндэтгэлийн индэр дээр тавьж олон нийтэд үзүүлсэн байна. Кейтийг амаржих үед ханхүү Уильям хажууд нь байжээ. Хатан хаан II Элизабет, Эдинбургийн гүн Филипп, Уэльсийн хунтайж Чарльз нар хаан угсааны хүү төрсөн мэдээг баяртайгаар хүлээн авлаа хэмээн Кенсингтоны ордны мэдэгдэлд онцоллоо. Шинэ ханхүү мэндэлсэн мэдээг олон мянган британи иргэд хуваалцаж, Сейнт Мэри эмнэлэг болон Букинамын ордны гадаа цугларчээ. Кэмбрижийн гүнж амаржих гэж байна гэж хоёр долоо хоног хүлээлгэсэн юм. Ямар сайндаа хүлээж тэвчээр алдарсан хатан хаан “Намайг амрахаас өмнө төрчихвөл зүгээр байна” гэж хэлж байхав.

Кейт, Уильям нар эцсийн мөч хүртэл хүүхдийнхээ хүйсийг нууцалж байсан нь янз бүрийн таавар, цуу яриа дэгдэхэд хүргэсэн юм. Тэр бүү хэл бооцоо тавьдаг компаниуд хүү юу, охин уу хэмээн мөнгө хүүлж байсан билээ. Тэд хүүдээ ямар нэр хайрлах талаар ид шуугиж байна. Охин төрвөл Александра, Исабель, Шарлотт, Диана, Викториа зэрэг нэр өгнө хэмээн таамаглаж байв. Хүү төрсөн тул одоо Жорж, Жеймс зэрэг нэр өгнө, өгчихсөн хэмээн цуурцгаах болов.

Кэмбрижийн гүнж уржигдар өглөө Сейнт Мэри эмнэлэгт нөхөр Уильям, ээж Кэрол Мидллтоны, дүү Пиппагийн хамт очжээ. Эмнэлэгт арваад цаг байсны эцэст амаржсан аж.

Кейтийг амаржихад хатан хааны хувийн эмэгтэйчүүдийн эмч Маркус Сэтчелл, гүнжийн эмч Алан Фартинг нар байлцжээ. Шинэ ханхүү мэндэлсний дараа ханхүү Уильям хатан хаан Элизабет руу утасдаж дуулгасан бөгөөд үүний дараа шинэ хаан угсаатан мэндэлсэн мэдээг хатан хааны ордны гадаа хүндэт индэрт байрлуулан олон үзүүлсэн юм. Хатан хаан ямар ч байсан ирэх баасан гаригт амралтаа авч Шотландын Балморал дахь ордондоо очно хэмээн мэдэгдэж байв. Ач хүү, ач охины аль нь ч байсан яахав хэмээн хатан хаан хэлж байлаа.

2013 онд Их Британийн парламент хаан ширээг залгамжлах хуульд өөрчлөлт оруулсан билээ. Зөвхөн агь, ханхүү нар хаан ширээг залгамжлана, хааны эхний хүүхэд охин, дараагийн хүүхэд нь хүү бол хаан ширээ эгчийг нь алгасч дүүд нь очно гэсэн 300 жилийн настай хуулийг өөрчилж, хаан ширээг залгамжлахад хүйсээр нь ялгаварлахгүй хэмээн зааж өгсөн юм. Ийнхүү Кейт, Уильям нарын эхний хүүхэд нь охин байсан бол Британи улс хэзээ нэгэн цагт дахин хатан хаантай болох нөхцөл бүрдээд байлаа. Их Британийн хатан хаан нь Commonwealth буюу Британийн экс колони улсуудын нийгэмлэгийн 15 улсын төрийн тэргүүн нь байдаг ажээ.