Тед Круз, Берни Сандерс нар байр сууриа бэхжүүлэв

Бүгд найрамдах намаас АНУ-ын Ерөнхийлөгчийн сонгуульд нэр дэвшихээр өрсөлдөж байгаа Тед Круз Канзас, Мэн мужид болсон намын сунгаанд ялалт байгуулжээ. Харин Ардчилсан намын нэр дэвшигчдээс Берни Сандерс Канзас, Небраска мужид ялалт байгуулаад байна. Супер ням гариг хэмээн нэрлэгддэг сунгаанд Сандерсийн гол өрсөлдөгч Хиллари Клинтон Луизанад ялсан мэдээ иржээ. Бүгд найрамдах намын нэр дэвшигчдээс тасархай тэргүүлсээр байгаа тэрбумтан Дональд Трамп Луизанад илүү санал авч чаджээ. Ийнхүү нам доторх сунгаанд хатагтай Клинтон ес, Сандерс зургаан мужид ялалт байгуулаад байна. Бүгд найрамдахчуудаас Трамп 12, Круз зургаан мужид ялалт байгуулжээ. Кентаки, Лиузана мужийн сунгааны дүнг зарласны дараа Дональд Трамп Бүгд найрамдах намын бас нэг нэр дэвшигч Марко Рубиог сунгааг орхихыг уриалжээ. “Би Тед Крузтай халз тулаан хиймээр байна” хэмээн Трамп мэдэгдэв. Энэ мэдэгдлийн дараа куба гаралтай Марко Рубио  Пуэрто-Рикод ялалт байгуулсан байна.

АНУ-ын Ерөнхийлөгчийн сонгуулийн үйл явц Ерөнхийлөгчийн суудалд горилогчийг тодруулах намын сунгаагаар эхэлдэг. Бүгд найрамдах болон Ардчилсан нам муж бүрт сунгаа явуулж, ялсан нэр дэвшигч нь намын их хуралд төлөөлөгчөө сонгох эрхтэй болдог. Зарим мужид намын гишүүд, дэмжигчид хувийн байгууллага, сургууль, эсвэл олон нийтийн газар цуглаж, нэр дэвшигчдийг хэлэлцэж, илээр буюу гар өргөх зарчмаар (caucus) санал өгдөг бол бусад мужид primaries буюу саналын хайрцагт нууцаар санал хурааж ялагчийг тодруулдаг ажээ. Нам доторх сунгаа дуусч, хэн нэгний давамгайллаар өндөрлөдөг ч онолын хувьд нэгдсэн нэр дэвшигч тодордоггүй. Нэр дэвшигчийн сонгосон төлөөлөгчид зун болох намын их хурал дээр дахин санал өгсний эцэст арваннэгдүгээр сарын 8-нд болох Ерөнхийлөгчийн сонгуульд нэр дэвших хүний нэр эцэслэн тодордог аж.

Бүгд найрамдах намын нэр дэвшигч 1237 төлөөлөгчийн санал авах шаардлагатай. Ардчилсан намын нэр дэвшигч намын их хурал дээр 2383 төлөөлөгчийн санал авбал Ерөнхийлөгчийн сонгуульд өрсөлдөх эрхтэй болдог ажээ. Өнгөрсөн долоо хоногийн супер мягмар гаригт болсон хэд хэдэн сунгаад Клинтон, Трамп нар манлайллаа бататгаж чадсан юм.