Сураггүй алга болсон Малайзын онгоцны сэг олджээ

2014 онд сураггүй алга болсон Malaysia Airlines авиакомпанийн MH370 нислэг үйлдэж явсан нисэх онгоцны сэг байж болох зүйл Мозамбикийн эргээс олджээ. “Урьдчилсан үзлэг, таамаглалаар энэ сэг, үлдэгдэл нь MH370 нислэгийн Boeing 777 онгоцных байх магадлал өндөр байна” хэмээн Малайзын Тээврийн сайд Твиттер хуудсандаа бичжээ. Гэвч тэрээр яаран дүгнэлт хийхгүй байхыг уриалсан юм. Хэдийгээр Малайзын онгоцны сэг байж болох сэжүүр илэрсэн ч батлагдсан зүйл алга. Мозамбикээс олдсон үлдэгдлийн зургийг харсан шинжээч, мэргэжилтнүүд үүнийг Boeing 777 нисэх онгоцны тогтворжуулагч хэмээн үзэж байгаа аж. Сураггүй алга болсон нисэх онгоц нь Boeing 777 загварынх байсан билээ. Өнгөрсөн оны долдугаар сард Реунион арал орчмоос нисэх онгоцны далавч олдсоныг Францын шинжээчид алга болсон “Боинг” онгоцных хэмээн үзсэн юм. Сураггүй алга болсон нисэх онгоц Энэтхэгийн далайн өмнөд хэсэгт сүйрсэн хэмээн үзэж эрэл хайгуулын ажиллагаа үргэлжилсээр байгаа ажээ. Эрлийн ажиллагаа 2016 оны зургадугаар сард дуусна хэмээн Австралийн Ерөнхий сайдын орлогч мэдэгджээ. Австралийн Перт хотоос хоёр мянган км-ийн зайд 120 мянган кв км талбайд эрэл хайгуул хийсээр байна.  

2014 оны гуравдугаар сард Malaysia Airlines авиакомпанийн MH370 нислэгийн Boeing 777 нисэх онгоц Куала-Лумпураас Бээжин рүү нисч байгаад сураггүй алга болсон юм. Уг онгоцонд хятадууд голдуу 239 хүн явж байжээ. Нисэх онгоц Куалу-Лумпураас хөөрөөд 40 минутын дараа радараас алга болжээ. Энэ үеэр Өмнөд Хятадын тэнгис дээгүүр нисч явсан аж. Улмаар нисэх онгоц газраас ирэх дуудлага болон хиймэл дагуулаар дамжуулсан дуудлага, зурваст хариу өгөөгүй юм. Хожим хийсэн шалгалтаар, Бээжин рүү  MH370 нислэг үйлдэж явсан нисэх онгоц гэнэт чиглэлээ өөрчлөн Энэтхэгийн далайн гүн рүү ниссэнийг тогтоосон. 2015 оны нэгдүгээр сард Малайз улс Boeing 777 нисэх онгоцыг золгүй тохиолдлоор сүйрч, MH370 нислэгийн бүх зорчигч, нисэх багийн гишүүдийг амь үрэгдсэн хэмээн албан ёсоор мэдэгдсэн юм. Гэсэн хэдий ч онгоцны сүйрлийн шалтгаан, осолдсон газрыг тогтоож чадаагүй аж. Онгоцны нисгэгчид нисэх онгоцыг барьцаалж, Энэтхэгийн далайн гүнд сүйрүүлсэн гэж таамаглах хүмүүс байсаар байна. Учир нь нисэх онгоц гэнэт чиглэлээ өөрчлөн далайн гүн рүү нисч сураггүй алга болсныг барьцаалалт, алан хядах ажиллагаатай холбохоос аргагүй байдалд оруулсан билээ.