Ф.Олланд нөхрөө хөнөөсөн эмэгтэйг өршөөжээ

Францын Ерөнхийлөгч Франсуа Олланд нөхрөө алсан хэргээр 10 жилийн ял эдэлж байгаа 68 настай Жаклин Саважийг өршөөх зарлиг гаргалаа. Жаклины нөхөр нь олон жилийн турш эхнэр, охиноо зодож, нүддэг байжээ. Мөн хүүгээ харааж, загнаж байсны улмаас хүү нь амиа хорлосон аж. Хүү нь амиа хорлосны дараагийн өдөр Жаклин нөхрөө алжээ. Энэ хэрэг Франц даяар шуугиан дэгдээж 400 мянган хүн түүнийг өршөөхийг уриалж гарын үсэг цуглуулсны дараа Ерөнхийлөгч эмэгтэйг өршөөх шийдвэр гаргасан байна.

Дамаскт олон хүний амь үрэгдэв

Сирийн нийслэл Дамаскт болсон халдлагын улмаас 60 гаруй хүн амиа алдаад байна. 110 орчим хүн шархдаж бэртлээ хэмээн ВВС мэдээлэв. Амиа золиослогч этгээдүүд энэ халдлагыг үйлджээ. Дамаск хотын Куу-Ас дүүрэг дахь Саид Зейнаб лалын сүмийн гадаа дэлбэрэлт болсон аж. Халдлагыг “Исламын улс” бүлэг зохион байгуулснаа хүлээн зөвшөөрөөд байна. Хэд хоногийн өмнө Хомс хотод дэлбэрэлт болж 19 хүн амиа  алдсан юм.

“Синалоа” мафид том цохилт өглөө

Мексикийн цагдаа Америкийн тусгай албадын тусламжтайгаар “Синалоа” гэмт бүлэглэлийн 24 гишүүнийг баривчилжээ. Тус бүлэглэл нь хар тамхи, хүний наймаа эрхэлдэг томоохон мафи юм. “Чөтгөрийн буухиа” хэмээн нэрлэсэн тусгай ажиллагаа “Синалоа” мафийн удирдлагыг устгахад чиглэгдсэн ажээ. Гэвч баривчлагдсан хүмүүсийн нэр, албан тушаалыг ихээхэн нууцалж байна. Тусгай ажиллагаа Америк-Мексикийн хил орчимд явагдаж хар тамхины мафид томоохон цохилт өгчээ. “Синалоа” мафийн толгойлогч Хоакин Гузман хэд хоногийн өмнө баривчлагдсан юм.

Лоуренс Ф.Кастрогийн амрагийн дүрд тоглоно

Холливуд улс төрийн нөхцөл байдалд үргэлж мэдрэмжтэй ханддаг билээ. АНУ, Кубын харилцаа сайжирч байгаа өнөө үед Фидель Кастро, Марита Лоренц нарын хайр сэтгэлийн холбооны талаар кино хийхээр болжээ.

1959 онд 19 настай Марита Лоренц Кубад хөл тавьсан юм. Америкийн хөлөг онгоцны герман ахмадын охин Марита энэ үеэр 33 настай Фидельтэй танилцсан аж. “Бусдаасаа өндөр нэг залуу байсан. Би түүнээс “Та хэн бэ” гэж асуухад “Би куба хүн. Командлагч Фидель Кастро” гэж хариулж билээ. Би түүнд дурласан... Дараа нь түүнийг алах гэж оролдсон” хэмээн эдүгээ 76 настай Марита ТТГ-ын тусгай ажиллагааны тухай баримтат кинонд дурсан ярьж байна. Маритаг АНУ-д буцаж очсоны дараа ТТГ түүнийг элсүүлж Кубын хувьсгалын лидерийг хортой нүүрний тосоор хордуулж алах даалгавар өгч байжээ. Гэвч хайр сэтгэл дийлж, Марита даалгаврыг гүйцэтгэх гэсэн ч гар нь хөдлөөгүй юм. Тэгвэл Холливуд энэ түүхээр уран сайхны кино хийхээр болж Маритагийн дүрд “Оскар”-ын шагналт, 25 настай Женнифер Лоуренсийг тоглуулахаар сонгож авчээ. Дашрамд сонирхуулахад Марита Лоренц Венесуэлийн дарангуйлагч Маркос Перес Хименестэй амраглаж, АНУ-ын Ерөнхийлөгч Жон Кеннедийн аллагад нэр холбогдож явжээ. Мөн ХМТ-ны тагнуулчаар олон жил ажиллаж, социалист орнуудын дипломат ажилтнуудыг тагнаж явсан юм. 

Бангладешийн “Модон хүн”

Абул Баяндарыг Бангладешийн баруун өмнөд хэсэгт орших төрөлх тосгонд нь Хүн мод хэмээн нэрлэдэг. Арван жилийн өмнөөс түүний гар, хөлөнд модны холтос мэт хачин зүйл ургаж эхэлжээ. Эрдэмтэд үүнийг дэлхийн шинжлэх ухаанд хараахан бүртгэгдээгүй ховор өвчин хэмээн үзэж байна. Абул нийслэл Дакка хотод мэс засалд орохоор ирээд байгаа юм. “15 настай байхад хөлөн дээр хачин зүйл ургаж эхэлсэн. Анх ийм зүйл гарч ирэхэд жижигхэн, ердийн ургацаг гэж бодож байлаа. Гэвч сүүлийн таван жилд модны мөчир, үндэс шиг маш хурдан ургачихсан” хэмээн 26 настай Баяндар хэвлэлд ярьжээ. Одоо хөвгүүний “мөчир” нь таван кг татах болж, гар нь гэхэд ямар ч үүрэггүй эрхтэн болон хувирчээ. Түүний бүх мөч нь ургаж, хөдөлмөрлөх чадваргүй болсон тул рикшо буюу дугуйт таксины ажлаа хийж чадахаа больж, найз бүсгүй болон ээжийнхээ асрамжинд орсон юм. “Хооллох, бие засах гээд бүх юманд хүний тусламж хэрэгтэй болсон. Гар, хөлөө хөдөлгөхөд өвчин, зовиур улам нэмэгдэх боллоо” хэмээн Абул Баяндар The Daily Star сонинд ярьж байв. “Арьсан дээр үүсдэг генетикийн энэ өвчин нь арьсны гажиг ургалт хэмээх нэн ховор өвчин. Хүн мод ч гэж нэрлэх нь бий” хэмээн Dhaka Medical College эмнэлгийн эмч Саманта Лалсен онцлов. Тэрээр Абулд хийх мэс заслыг удирдах юм.

Бангладешт “модон хүн” гарч ирсэн анхны тохиолдол нь энэ ажээ. Румынд нэг, Индонезид хоёр тохиолдол бүртгэгдсэн байдаг. Баяндарын гэр бүл энэ хачин ургалтаас сэргийлэхийн тулд сүүлийн арван жилд янз бүрийн арга зам хайсан аж. Эхэндээ дом, ардын эмнэлгээр явсан ч улам дордуулж орхижээ. Баяндар орон нутгийнхаа эмнэлэгт хандахад тэрхүү хачин үзэгдлийг нь мэдэх, тайлбарлах эмч олдоогүй тул хөрш Энэтхэг улсын Калькутта хотыг зорьжээ. Энэтхэг эмч нар “Мэс засалд орох шаардлагатай. Зургаан мянган доллар төлөх хэрэгтэй” гэсэн байна. Түүний гэр бүл ийм мөнгө гаргах боломжгүй тул нутгийн сэтгүүлчдийн тусламжтайгаар өөрийн нөхцлөл байдлыг таниулснаар нийслэл Дакка хотод мэс засалд орохоор болоод байна. Бангладешийн хамгийн том эмнэлэг болох Dhaka Medical College-ийн эмч нар “модон залуу”-д үнэгүй мэс засал хийхээр болжээ. Гар, хөлөнд нь ургасан мод, үндсийг хаагуур нь хэрхэн тайрахыг судалж байгаа аж. Хөвгүүний илүү “ургамлыг” энэ тайрах ч тэр нь дахиад ургах магадлалтай хэмээн эмч нар үзэж байна. “Энэ өвчнийг бүрмөсөн эмчлэх боломж бидэнд байхгүй байх. Ямар ч байсан эхний ээлжинд хөл, гаранд ургасан илүү хэсгийг тайрч дөрвөн мөчийг нь ажиллагаатай болгоно” хэмээн эмч Саманта хэллээ.

Эмэгтэй жолооч нар 130 мянган долларын нөхөн төлбөр авчээ

Саудын Арабын нэг хунтайжийг АНУ-д ирэх үеэр үйлчилсэн ч дараа нь ажлаасаа халагдсан гурван эмэгтэй жолооч шүүхийн шийдвэрээр тус бүр 130 мянган долларын нөхөн төлбөр авлаа. Хунтайж “Би зөвхөн эрэгтэй жолоочоор үйлчлүүлнэ” хэмээн шаардсан тул тэд ажилгүй болсон аж. Араб хунтайж 2010 онд АНУ-д эмчлүүлэхээр ирэхдээ 40 орчим жолооч хөлсөлж ажиллуулсан юм. Гурван эмэгтэй жолооч эхний өдөр үйлчилгээнд гараад л ажлаасаа халагджээ. Тэд хүйсээр ялгаварлан гадуурхлаа хэмээн шүүхэд гомдол гаргаж ялалт байгуулсан байна. Саудын Арабт эмэгтэй хүн жолоо барихыг хориглодог ажээ.

Хоккейн домгуудын лигт ОХУ түрүүллээ

Дэлхийн хоккейн домгуудын лигийн анхны ялагчаар ОХУ-ын шигшээ баг тодорлоо. Москвагийн “Домгуудын парк” ордонд болсон аваргын төлөө тоглолтод талбайн эзэд чехүүдийг 8:5-аар хожжээ. Оросын шигшээгээс Андрей Коваленко, Сергей Федоров (хоёр гоол), Виталий Прохоров (хоёр гоол), Валерий Каменский, Павел Буре, Роман Ильин нар гоол оруулжээ. Чехээс Ян Петерек (хоёр гоол), Рихард Жемличка, Радек Теупал нар гоолдсон байна. Тэмцээний шилдэг хаалгачаар Ари Суландер (Финланд), хамгаалагчаар Вячеслав Фетисов (Орос), довтлогчоор Матс Нэслунд (Швед) шалгарлаа.

Дэлхийн хоккейн домгуудын лиг нь 45-аас дээш насны хоккейчид оролцдог, үзүүлэн тоглолтын бус өрсөлдөх чанартай олон улсын хоккейн тэмцээн юм. Тус лиг 2015 оны наймдугаар сард байгуулагджээ. Орос, Чех, Герман, Швед, Словак, Финланд улс Дэлхийн хоккейн домгуудын лигийг бүрдүүлж байна.

Туркийн эрэг орчимд 39 дүрвэгч амиа алдлаа

Дүрвэгчдийг суулгаж явсан завь Туркийн эрэг орчимд сүйрсний улмаас дор хаяж 39 хүн амиа алдаад байна хэмээн Anadolu агентлаг мэдээллээ. Туркийн эргийн харуул 75 хүнийг аварч чаджээ. Сири, Афганистан, Бирмийн цагаачид Грекийн Лесбос аралд хүрэх санаатай явж байжээ. Завинд хэдэн хүн явж байсныг тогтоох аргагүй байгаа тул эрэл хайгуул үргэлжилсээр байна. Амиа алдсан хүмүүсийн дунд хэд хэдэн хүүхэд байгаа аж. Өнгөрсөн долоо хоногт Эгийн тэнгист бас нэг хөлөг онгоц живж 40 гаруй цагаач амиа алдсан юм. Турк улс дүрвэгч, цагаачдын нөхцөл байдлыг зохицуулахын тулд Европын холбооноос таван тэрбум долларын тусламж хүсээд байна.

Фидель Кастро Зика вирусын тархалтад санаа зовниж байна

Кубын хувьсгалын лидер Фидель Кастро Зика вирусын тархалтад санаа зовниж буйгаа мэдэгдээ. Тэрээр Гавана хотод 2010-2015 онд Уругвайг удирдсан Хосе Мухика болон бусад улстөрчтэй уулзахдаа ийнхүү ярьсан аж. Мөн АНУ-ын Ерөнхийлөгч Барак Обама Зика вирусын тархалтын талаар Бразилийн Ерөнхийлөгчтэй санал солилцжээ.

Анх Уганда улсад илэрч байсан Зика вирус нь эдүгээ Америк тивийг тэр чигээр нь (Канад, Чилиэс бусад нь) хамраад байна. Маш бага судлагдсан энэ вирус, өвчний эсрэг вакцин, эмчилгээ гараагүй байна. Зика вирус нь эхэндээ Aedes төрлийн шумуулаар халдварлаж байсан бол сүүлийн үед бэлгийн замаар, хүнээс хүнд халдварлах болжээ. Энэ өвчний хамгийн гол аюул нь микроцефали буюу хүүхэд эхийн умайд байхдаа тархи, гавал нь жижгэрч, оюуны хомсдолтой төрдөгт байгаа юм.

Дүрвэгсэд - мафийн том наймаа

Европт 2015 онд дүрвэгсдийн хямралаас илүү том наймаа байсангүй. Үүнийг сайн мэдэж байгаа Туркийн мафиуд өөрсдийн эргээс Эгийн тэнгис хүртэл томоохон дүрвэлтийг зохион байгуулж, 800 мянган хүнийг тус бүрээс нь 400 евро авч Европ руу илгээжээ. Македоны түшмэлүүд ч дүрвэгсдэд галт тэрэг гаргаж өгөхдөө ашиг унагахаа мартсангүй, таван еврогийн тасалбарыг 25 еврогоор зарж байна. Сербийн ашиг хонжоо хайгчид орогнол хайж яваа дүрвэгсдэд автобусны тасалбарыг гурав нугалан заржээ.

Энэхүү том наймаанд зөвхөн Европын томоохон гэмт бүлэглэлүүдийг хамаатуулах нь учир дутагдалтай. Италийн зартай Каморра, Коза Ностра, Ндрангета мафи төр, улсын хүч бололцоо хүрэлцэхгүй байгаа орон зайг эзэлж, Сири, Ирак, Афганистанаас ирж буй цагаач, дүрвэгсдээс ашиг унагасаар байгаа юм. “Financial Times” сонинд бичсэнээр, Коза Ностра, Каморра бүлэглэл дүрвэгсдийн хоргодох байр, хоол хүнсний хангамж зэрэг Италийн төрийн тусламжийн системийг “хувьчилж аваад” байгаа аж. Эдгээр үйлчилгээний зөвшөөрлийг хэрхэн олгосныг цагдаагийн газраас шалгаж эхэлжээ. “Энэ бол маш өргөн тархсан бэрхшээл. Орогнол хүссэн хүмүүс том наймаа болон хувираад байна. Олон хот дахь олон төв энэ асуудалд орооцолдсон гэж үзэж байгаа” хэмээн Либера дахь мафийн эсрэг байгууллагын ажилтан Габриелла Страмацциони ярилаа. Дүрвэгсдийг ашиглан хийж буй наймааны эргэлт зөвхөн Италид 800 сая еврод хүрээд байна. Заримдаа мафиуд дүрвэгсдээс урьдчилан мөнгө авч өөрсдийн хөлөг онгоцоор авчирч байгаа аж.

Эрх баригч түшмэлүүд цагаач, дүрвэгчдэд үйлчилж, хамгаалахын оронд ашиглаж, мөнгө олохыг урьтал болгож байна. Коза Ностра, Каморра бүлэглэл энэ төрлийн наймаагаа өргөжүүлэх арга зам хайх болжээ. Мафиуд Газар дундын тэнгисийн төв замыг ашиглах нь улам багасч, Эгийн тэнгисийн боомтуудыг өөрсдийн том боломж хэмээн харах болсон байна. Тэнд Турк болон Грекийн Засгийн газрын анхаарал суларч, нүх сүв гарсныг мафиуд овжин ашиглаж байгаа аж. Хууль бус, хуулбарласан хувцасны наймааны ихэнх хувийг хянадаг Каморра мафи маш муу материалаар хуурамч аврагч хантааз үйлдвэрлэж цагаачдад шахах болжээ. Мөн Эгийн тэнгисийг гатлах гэж байгаа цагаачид болон Туркийн хүний наймаачдад зориулж хийлдэг завь үйлдвэрлэн нийлүүлэх болсныг хуулийн, хүмүүнлэгийн байгууллагууд анхааруулж байна. Өнгөрсөн оны арваннэгдүгээр сард Грекийн Лесбос арал дээр нэг өдөрт л цагаач, дүрвэгчдийг ачсан 100 орчим завь ирж байжээ. Мафи, гэмт бүлэглэлүүд цагаач, дүрвэгчдийн наймаанаас хар тамхинаас илүү ашиг олох болсныг тэдний хоорондын телефон ярианаас мэдэж авсан юм. Европт орж ирээд байгаа нэг сая орчим цагаачийн 170 мянга нь Италиар дамжин орж иржээ. Мэдээж тэдний хоол хүнс, хувцас хунар гээд “үзүүлэх үйлчилгээ” мундахгүй. Тиймээс төв Европ хүртэлх аян замынх нь туршид тэдэнд савтай ус, хачиртай талхыг хүртэл хэд нугалан зарж ашиг унагаж байна. Мөн гар утасны сим карт, өвлийн хувцас, ороолт, малгайг Unicef-ийн төвүүдээс үнэгүй тараадаг ч мафиудын гараар орж, цагаачдын гар дээр очихдоо дамлагдан зарагдаж байгаа юм. Италийн мафиуд Африкийн хойд хэсгийн хар тамхины мафиудтай холбоо тогтоож Газар дундын тэнгисээр мансууруулах бодис, хүний наймаа хийж байна. Италийн цагдаагийн газраас мэдээлж буйгаар, эдгээр мафиуд цагаач, дүрвэгсдийг ашиглан хар тамхи зөөж, эмэгтэйчүүдийн биеийг нь худалдан ашиг олж байгаа ажээ.

Швед цагаачдыг буцаахаар төлөвлөж байна

Шведийн эрх баригчид цагаачлах хүсэлт гаргаад няцаагдсан 80 мянган хүнийг эх орон руу нь буцаахаар төлөвлөж буйг Гадаад хэргийн сайд Андерс Игеман мэдэгдлээ. Тэднийг шууд нислэгээр буцаах бөгөөд нэлээн хугацаа шаардагдах аж. 2015 онд 163 мянган хүн Шведэд оршин суух эрх хүсч, 55 хувьд нь нааштай хариу өгсөн байна. Нэгдүгээр сарын эхээр Швед улс Данитай залгаа хил дээр зорчигчдын бичиг баримтыг шалгах болсон юм. Богино хугацаанд олон цагаач орж ирэх нь үндэсний аюулгүй байдал, олон нийтийн эмх журамд аюултай хэмээн Шведийн Засгийн газрын зарим гишүүн үзэж байна. Сүүлийн үед Шведэд том хүний харгалзаагүй хүүхдүүд ихээр орж ирэх болжээ. Өнгөрсөн онд гэхэд л, 33 мянган хүүхэд харгалзах том хүнгүй тус улсад орж ирсэн юм.

Суданы Ерөнхийлөгч Өмнөд Судантай залгаа хилээ нээжээ

Суданы Ерөнхийлөгч Омар Хасан аль-Башир Өмнөд Судантай залгаа хилийг нээх тушаал гаргалаа хэмээн SUNA агентлаг мэдээлэв. Хил хязгаарыг нээж, ажиллуулахад шаардлагатай бүх арга хэмжээг авахыг тушаалд зааж өгсөн байна. НҮБ Өмнөд Суданы иргэний дайнд нэрвэгдсэн хүмүүст туслахын тулд 1.3 тэрбум доллар шаардлагатай байна хэмээн мэдэгдсэн билээ. Өмнөд Судан нь 2011 оны долдугаар сарын 9-нд Суданаас салж, тусгаар тогтносон юм. Судан улс зөвшөөрч, гэрээ байгуулсны дараа ийнхүү дэлхийн газрын зураг дээр Өмнөд Судан гэх улс бий болжээ. Өмнөд Судан 2011 онд НҮБ-ын 193 дахь гишүүн орон болсон юм.

Турк “Исламын улс”-аас нефть авдаг гэдэгтэй санал нийлсэнгүй

Турк улс “Исламын улс” бүлгээс нефть худалдаж авдаг хэмээн Грек, Израиль улс мэдэгдсэнтэй санал нийлэхгүй байгаагаа АНУ-ын Төрийн департаментын төлөөлөгч Марк Тонер мэдэгдлээ. “Бид энэ дүгнэлттэй санал нийлэхгүй. Энэ буруутгалыг нотлох баримт бидэнд байхгүй байна” хэмээн тэрээр хэлжээ. Израилийн Батлан хамгаалахын сайд Моше Ялон хэд хоногийн өмнө “Лалын босогчид аль дээрээс Туркт нефть худалдах болсон. “Исламын улс” бүлгийн дайчид Туркийн мөнгөөр санхүүжиж байна хэмээн тэрээр буруутгасан юм. Мөн Грекийн Батлан хамгаалахын тэргүүн Панос Камменос, “Исламын улс” бүлгийн нефтийн ихэнх хэсэг Туркаар дамжин арилжигдаж байгаа хэмээн ярьсан юм. 

Халед Али: Аль-Сиси шинэ дарангуйлагч болох зам руугаа орчихлоо

Египетийн ард иргэд хилэгнэн босч Ерөнхийлөгч Хосни Мубаракийн дэглэмийг түлхэн унагасан хувьсгалын таван жилийн ой тохиож байна. Египетийн сөрөг хүчний төлөөлөгч, өмгөөлөгч, Ерөнхийлөгчийн сонгуульд нэр дэвшигч асан Халед Али тэр үед Хишам Мубаракийн хүний эрхийн төвийг удирдаж байсан бөгөөд уг төвийг хувьсгалчдын төв штаб болгон хувиргаж байсан юм. Тэрээр өнөөдөр ч цалин нэмэхийг шаардаж, төрийн мэдлийн гурван том компанийг хувьчилсныг эсэргүүцэн тэмцсээр байна. EL MUNDO түүнтэй уулзжээ.

-Таван жилийн өмнөх хувьсгалаас юу санаанд орж байна вэ?

-Би тэр хувьсгалын нэг ч мөчийг мартдаггүй. Тэр бол мөрөөдөл байлаа. Хувьсгал бүтэлгүйтсэн гэж би боддоггүй. Үр дүнг нь шүүхэд хэцүү. Одоогоор бид ялагдаад байгаа ч ард иргэдийн бослого египет залууст гүнзгий өөрчлөлт оруулсан. Мөдхөн эсэргүүцлийн шинэ давалгаа гарна гэж бодож байна.

-Бүс нутагт “Исламын улс” гэж бүлэг гарч ирснээр бослого, эсэргүүцлийг нухчин дарах хэрэгтэй гэсэн үзэл Египетэд гарч ирлээ гэж байна..?

-Харгислал, нухчин даралтыг зөвтгөх юм байхгүй. Хүмүүс таван жилийн өмнө гудамжинд гарч жагсахдаа эрх чөлөө, нийгмийн шударга ёсыг шаардаж байсан. Хувьсгалчдын зорилго нь нэг дарангуйлагчийг нөгөөгөөр солих байгаагүй. Бүс нутаг дахь өөрчлөлт, мөргөлдөөнд гадны хүчин оролцвол бүр аюултай, муу гэдгийг Ирак, Сири, Йемен, Ливи харууллаа. Гэвч энэ аюулаас зайлсхийж байна гээд нэг дарангуйлагчийг тэвэрч авах нь буруу.

-Абдельфаттах Аль-Сиси Египетийг хааш нь хөтөлж байна вэ?

-Тэр өөртөө ч, улс оронд ч түвэг учруулах боллоо. Олон нийтийн асуудлыг иргэдэд өгч, нөхцөл байдлыг өөрчлөх боломж түүнд байсан. Гэвч тэгсэнгүй, шинэ дарангуйлагч болох зам руугаа орчихлоо. Владимир Путинийг шүтдэг тэрээр шууд загварыг нь хуулчихсан.

-Бүтэн мөчлөг өнгөрлөө. Аль-Сисигийн Египет Мубаракийнхаас илүү сайн байна уу?

-Мубаракийн Египетээс ч муу байдалтай байна. Аль-Сиси төрийн гадаад төрхөнд л их анхаарч байна. Хууль, эрх зүй түүнд хамаагүй бололтой. Тэр улс төрийг үзэн яддаг.

-Таван жилийн өмнө хувьсгал хийж байсан ч ядуурал одоо ч буурсангүй...?

-Хувьсгалаар төрийн толгойг унагасан ч дэглэмийн үлдсэн хэсгийг устгаж чадаагүй. Зэвсэгт хүчин Египетийг хянаж байна. Үүнийг өөрчлөхөд дахиад их золиос хэрэгтэй. Генералууд улс төрд оролцоод ирэхээр улс оронд аюул нүүрлэдэг. Тэднийг хуаран руу нь буцаах ёстой. Тэд төрд гарвал тэдэнд нөлөөлөх хүч байхгүй болж, тэд хэнийг ч сонсохоо больдог.

-“Лалын ахан дүүс” хөдөлгөөнд дахин итгэх боломжтой юу?

-Хэцүү. Эрт, орой хэзээ нэгэн цагт “Лалын ахан дүүс” болон зэвсэгт хүчин эвлэрэх байх гэж боддог. Тэд нэг зоосны хоёр тал. 

Цасан шуурга гурван тэрбум долларын хохирол учруулжээ

АНУ-ыг нөмөрсөн “Жонас” цасан шуурга гурван тэрбум долларын хохирол учруулсан хэмээн судалгаа, шинжилгээний Moody's агентлаг мэдэгдлээ. Худалдан авагч, үйлчлүүлэгчгүй хоцорсон дэлгүүр, зоогийн газар болон бусад бизнесийн байгууллагад  хохирлын ихэнх нь ногдож байна. Мөн цасны улмаас ажилдаа очиж чадаагүй иргэд цагийн хөлсөө алджээ. 2012 оны аравдугаар сард АНУ-ын зүүн эргийг нөмөрсөн “Сэнди” шуурга АНУ дахь бизнест 26 тэрбум долларын хохирол учруулж байжээ. 2005 оны “Катрина” далайн шуурга 28 тэрбумын алдагдалд оруулж байсан юм. Нэгдүгээр сарын 22-ноос эхлэн зүүн эргийг хамарсан цасан шуурганы улмаас олон мужид онц байдал зарлаж, амиа алдсан хүний тоо 41-д хүрчээ.

“Холокостын урлаг” үзэсгэлэн Берлинд нээгдлээ

Германы канцлер Ангела Меркель Берлин хотноо дайны үеийн еврей хоригдлуудын урлагийн бүтээлийн үзэсгэлэнг нээжээ. Берлины түүхийн музей дахь “Холокостын урлаг” үзэсгэлэнд 1939-1945 онд нацистын хорих лагерьт хоригдож байсан еврей иргэдийн 100 орчим бүтээл тавигджээ. Иймэрхүү үзэсгэлэн залуу үеийг сурган хүмүүжүүлэхэд чухал хувь нэмэр оруулна хэмээн Меркель үзэж байна. “Бид юуны түрүүнд Израиль болон еврей хүмүүсийг үзэн яддаг орнуудын залуу хүмүүст анхаарлаа хандуулах ёстой” хэмээн тэрээр онцоллоо. Иерусалимд байрладаг Холокостын дурсгалын төв дээрх бүтээлийг дэлгэн харуулжээ. Үзэсгэлэнд тавигдсан бүтээлийн 50 орчим эздийн тал хувь нь нацист лагерьт амьсгал хураажээ.

Шенгений бүсийн дүрмийг өөрчлөхийг шаардлаа

Европын холбооны гишүүн орнуудын Хууль зүй, Дотоод хэргийн сайд нар Гааг хотод яаралтай хуралдаан хийсний дараа улс орнуудад цагаачдын урсгалтай тэмцэх боломж олгохын тулд хууль тогтоомжийг өөрчлөх шаардлагатай болсныг Европын комисст (Европын холбооны Засгийн газар) уламжилжээ. Одоогийн хууль дүрмээр, Шенгений бүсийн орнууд хил хязгаараа зургаан сараар хаах эрхтэй байдаг ч Гаагд болсон уулзалт дээр энэ хугацааг хоёр жил хүртэл нэмэгдүүлэхийг шаардсан байна. Европын комисс энэ асуудлыг судалж үзэхээр болжээ. Европын холбооны зарим орны эдийн засаг цагаачдын урсгалыг дийлэхгүй хэмээн үзэж байгаа аж. Африк, Ойрхи Дорнод дахь дайн мөргөлдөөнөөс зугтсан дүрвэгсэд Европт хэдэн мянгаараа ирсээр байна. Сүүлийн нэг жилд сая орчим цагаач, дүрвэгч Европт орж иржээ.

Кремлийн эзний хөрөнгө чинээг “дэлгэжээ”

Роман Абрамович Владимир Путинд 35 сая долларын үнэтэй дарвуулт хөлөг онгоц бэлэглэсэн нь ОХУ-ын Ерөнхийлөгчийн асар их нууц хөрөнгийнх нь нэг болж байна хэмээн Telegraph сонинд бичжээ. Энэхүү ер бусын мэдэгдлийг Америкийн өндөр албаны түшмэл хийж, В.Путинийг авлигад идэгдсэн, улсын хөрөнгийг үрэн таран хийж гэр бүл, найз нөхдөө тэтгэсэн хэмээн буруутгалаа. Кремлийн эзэн өөрийнх нь эд хөрөнгөний талаарх яриаг “Зүгээр л цуу яриа” хэмээн няцаасаар байна.

Гэвч BBC One tonight нэвтрүүлгээр удахгүй гарах Panorama баримтат сурвалжлагад В.Путинийг бодит эд хөрөнгөө нуун далдлах бүхэл бүтэн системийг бий болгосон хэмээн үзэж байгаа аж. Тэрээр саяхан “Олимпиа” хэмээх 57 метр урт тансаг дарвуулт хөлөг онгоцтой болсон гэж байна. Энэ хөлгийг ноён Абрамович зуучлагчдаар дамжуулан ОХУ-ын Ерөнхийлөгчид бэлэг болгон илгээсэн хэмээн “Совкомфлот” Оросын төрийн мэдлийн хөлөг онгоцны компанийн тэргүүн асан Дмитрий Скарга өгүүлэв. “Абрамович ажилтнуудаараа дамжуулан дарвуулт хөлгийг ноён Путинд өгсөн. Энэ хөлөг нь хэдийгээр Путиний хувийн өмч болсон ч улсын хөрөнгөөр явуулж, хадгалж байдаг” хэмээн Скарга Panorama-д ярьжээ. АНУ-ын Сангийн яаманд хориг арга хэмжээний биелэлтийг хариуцсан түшмэл Адам Шубин, В.Путин бол авлигач, түүний олон жилийн авлигыг АНУ анзаарч, харсаар байгаа хэмээн дээрх нэвтрүүлэгт ил тод ярьсан байна. “Тэр найзууд, ойрын  холбоотнуудаа хэрхэн баяжуулж, үүнийг эсэргүүцдэг хүмүүсийг ялгаварлан гадуурхаж байгааг бид харсан. Путин өөртөө үйлчилнэ гэж үзсэн хүмүүсээ улсын том компани, төрийн гэрээ, хэлэлцээнд явуулж, итгэдэггүй хүмүүсээ шахаж зайлуулдаг. Энэ бол авлигын нэг хэлбэр” хэмээн Шубин онцолжээ. Тэрээр Оросын лидерийн хөрөнгө мөнгөний хэмжээний талаар яриагүй ч Путиний жил тутмын цалин, орлогын мэдүүлэг нь үнэнд нийцэхгүй гэжээ.

Улс төрийн тоймч Станислав Белковский 2007 онд мэдэгдэхдээ, В. Путин Оросын эрчим хүчний гурван компанид хөрөнгө оруулалт хийж, ногдол ашиг авах замаар 40 тэрбум долларын хөрөнгөтэй болсон гэж байв. Хөрөнгө оруулалтын сангийн менежер, ОХУ-ын эрх баригчдыг ил тодоор шүүмжлэгч Билл Броудер 2015 онд “Оросын Ерөнхийлөгчийн хөрөнгө чинээ 200 тэрбум долларт хүрсэн” хэмээн мэдэгдсэн юм. Энэ үнэн бол В.Путин дэлхийн хамгийн баян хүнийг ч бараагүй хол хаях нь тодорхой.

АНУ-ын засаг захиргаа 2014 онд Путинийг эрчим хүчний салбарт нууц хөрөнгө оруулалттай хэмээн дурдаж байсан ч оруулсан хөрөнгийн хэмжээг нь дурдаагүй, мөн түүнийг авлигад ил тодоор буруутгаагүй юм. Хэдийгээр Кремлийн эзний хөрөнгөний талаар ийнхүү олон яриа гарч байгаа ч нотлогдсон зүйл байхгүй. ОХУ-ын Ерөнхийлөгчийн хэвлэлийн албанаас эдгээр яриаг “Огт үндэслэлгүй, зохиомол зүйл” хэмээн няцааж байгаа аж. Р.Абрамовичийн өмгөөлөгч ч дарвуулт хөлөг онгоцны тухай мэдээллийг “Улиг болсон цуу яриа” хэмээн мэдэгджээ.

Зургийн тайлбар: Олимпиа дарвуулт хөлөг, Сочи

В.Путин охидтойгоо далайгаар зугаалж байна

Ирак терроризмын эсрэг ганцаараа тэмцэнэ

Ирак улс террорист бүлгийн дайчидтай гадаадын оролцоотой бус, зөвхөн өөрсдийн гараар тэмцэх болно хэмээн тус улсын Гадаад хэргийн сайд Ибрахим аль-Жафари мэдэгдлээ. “Иракт газраар болон бусад арга замаар явуулдаг ажиллагааг зөвхөн Иракийн аюулгүйн хүчин удирдах болно. Гадаадын ямар нэг оролцоо хэрэггүй. Зөвлөхүүд ч хэрэггүй. Ирак улс бүрэн эрхээ хэнээр ч зөрчүүлэхгүй” хэмээн тэрээр онцолжээ. Пентагон Эштон Картер Ирак, Сири дахь “Исламын улс” бүлгийн эсрэг газраар цэргийн ажиллагаа явуулж магадгүй хэмээн мэдэгдсэн юм.

Франц онц байдлаа сунгах уу

Францын Гадаад хэргийн сайд Бернар Казнев улс орон дахь онцгой байдлын дэглэмийг хоёр сараар сунгахын төлөө байна. “Аюул оршсоор байгаа гэж бид үзэж байна. Тиймээс онцгой байдлын дэглэмийг сунгах хэрэгтэй” хэмээн тэрээр ярилаа. Онцгой байдал, цагдаагийн сонор сэрэмжийг аль болох бага хугацаагаар сунгах ёстой хэмээн тэрээр үзэж байгаа аж. Францын Ерөнхий сайд Мануэль Вальс мөн онцгой байдлын дэглэмийг сунгахын төлөө байгаагаа мэдэгдсэн байна. 2015 оны арваннэгдүгээр сарын 13-нд Парист цуврал халдлага болж, зоогийн газар руу буудаж, “Батаклан” театрт концерт үзэж байсан хүмүүсийг барьцаалж, Стад де Франс цэнгэлдэхийн гадаа бөмбөг дэлбэрсний улмаас 130 хүн амиа алдсан юм.

Сирийн арми 120 км нутгийг чөлөөлөв

Сирийн арми ардын босогчдын дэмжлэгтэйгээр хоёр хоногийн дотор хойд хэсгийн Латаки мужийн 120 км газар нутгийг чөлөөлжээ. Энэ тухай Сирийн армийн командлалаас мэдэгдсэн байна. Латаки мужийн үлэмж газар нутгийг лалын хэт даврагчдаас чөлөөлж, 20 орчим террористыг устгажээ. Олон хэт даврагч Туркийн хилийн зүг зугтааж алга болсон аж. Мөн стратегийн чухал түшиц газрын нэг Рабия хотыг лалын босогчдоос чөлөөлж, террористуудын хангалтын замыг тасласан байна. Сирийн Засгийн газрын цэргийн давшилтад Оросын нисэх хүчний дэмжлэг ихээхэн тус болж байгаа юм.

Бразилийн шоронгоос 40 хоригдол оргожээ

Бразилийн Ресифе хотын шоронгоос 40 хоригдол оргожээ. Тэд шоронгийн ханыг дэлбэлж нүх гаргаад оргосон байна. Шоронгийн хана дэлбэрэлтэд нурж, хоригдлууд хэрхэн гарч зугтаж байгааг орон нутгийн телевизээр харуулсан байна. Оргосон хоригдлууд хотын гудамжаар тарж, зарим нь айлд орж нуугджээ. Цагдаа нар хоёр хоригдлыг буудан устгаж, ихэнхийг нь баривчилсан мэдээ ирж байна.

Хэд хоногийн өмнө Бразилийн бас нэг шоронгоос 53 хоригдол оргосноос 13-ыг нь л барьж чаджээ. Тус улсын шоронгийн даац хэтэрсэн ч харуул, хуягуудын тоог эрс цомхотгосон нь ийм үр дагавар авчирч байгаа бололтой. 

В.Путиний “мангас” хилэгнэж байна

Владимир Путиний хүчирхэг хүн Рамзан Кадыровын ажил нь Чеченийг хөгжин, тохинуулах бус, харин чеченүүд оросуудыг дахин алахаас зайлж, сэргийлэх хэмээн Орост ярьдаг. Гэвч Путиний энэхүү хүчирхэг холбоотны зэвсэгт эрчүүдийн бригад (кадыровчууд)-ын салбар нь Москвад ч байдаг тул тэрээр Оросын хамгийн хүчирхэг, эрх мэдэлтэй хүний тоонд багтдаг аж. Кадыров Кремлийн урд орж дуугардаг болоод удаж байна. Тэр өрнөдийн эсрэг илүү хүчтэй дуугардаг. Кремлийн эзний дайснуудыг ил тод онилж, зарим тохиолдолд далдаас буудаж дуусгадаг хэмээн үзэх хүмүүс ч байдаг. Зарим аллагын ул мөр Чечень рүү ороод замхардаг ажээ. Кремлийн дайснуудын нэг Борис Немцов өнгөрсөн онд Москвагийн гудамжинд алуулсан. Энэ хэргийг зохион байгуулсан гэгдэж байгаа Руслан Геремеев Чеченьд нэг жил тайван бүгэж байгаад Ойрхи Дорнод руу гарч алга болсон тул мөрдөгчид түүнийг байцаах боломжгүй болсон юм.

Human Rights Watch-ийн Москва дахь салбарын тэргүүн Таня Локшина дөрвөн жилийн өмнө Чеченьд очиж байжээ. “Хүмүүс надтай харьцах, ярилцахаасаа айдаг” хэмээн тэрээр өгүүлж байна. Албан өргөөнийх нь хананд найз Наталья Эстемировагийн хөрөг байх аж. Эстемирова 2009 онд Грозный дахь гэрээсээ хулгайлагдаж, дараа нь толгой руугаа хоёр буудуулсан цогцос нь хөрш Ингушет дахь жалганаас олдсон юм.

Рамзан Кадыров энэ удаа илүү хүчтэй сүрдүүлж, заналхийлж байна. Тэрээр В.Путинийг эсэргүүцэгчдийг “хариуцаж авахад” бэлэн гэдгээ мэдэгдэж, тэднийг “Эх орноосоо урвагчид, ард түмний дайсан” хэмээн нэрлэж, сэтгэцийн эмнэлэгт ирж үзүүлэхийг уриалжээ. Чеченийн Ерөнхийлөгч Р.Кадыров, парламентын тэргүүн Магомед Даудов нар Оросын сөрөг хүчний төлөөлөгч Алексей Навальный, улстөрч Илья Яшин болон сэтгүүлчид, экс депутатуудыг заналхийлсэн мэдэгдэл хийжээ. Эстемирова, Немцов, мөн 2006 онд алуулсан сэтгүүлч Анна Политковскаягийн хэрэг дээр Чеченийн ул мөр олдож байсан билээ. “Кадыров заналхийлээд зогсохгүй эрх мэдэлтэй хэвээр гэдгээ харуулахыг хүсч байх шиг. Жилийн өмнөхийг бодвол түүний байр суурь суларсан” хэмээн Локшина өгүүлэв. Кадыров Москвад дэндүү олон дайсан бий болгож байна. ОХУ-ын аюулгүйн албаныхан Чеченьд үйл ажиллагаа явуулахаас залхаж байгаа аж. Тэднийг зөвшөөрөл авалгүй Чеченьд орж ирэх юм бол шууд сум зооно хэмээн сүрдүүлжээ. Р.Кадыров “Сөрөг хүчнийхнийг эх орноосоо урвагчид гэж үзэх ёстой” хэмээн мэдэгдсэнийг зарим улстөрч “Тэр Сталины үеийг эргүүлэн авчрахыг хүсч байна” хэмээн буруутгасан юм. Санкт-Петербург хотын парламентын гишүүн Максим Резник Чеченийн лидерийн мэдэгдлийг хэт даврах үзэлд уриалсан гэмт хэрэг хэмээн үзэхийг Ерөнхий прокурорын газраас хүсчээ. ЗХУ-ын үед цөлөгдөж байсан Людмила Алексеева зэрэг хүмүүсийг нэгтгэсэн сэхээтний бүлэг Кадыровыг албан тушаалаас нь огцруулахаар гарын үсэг цуглуулж эхэлсэн байна. Оросын үндсэрхэг үзэлтнүүд ч Кадыровоос залхаж, орос үндэстний тоонд багтдаггүй чеченүүдэд хэтэрхий их мөнгө өгч байна хэмээн гомдоллох болов.

 Гэсэн хэдий ч Кремлийн хэвлэлийн төлөөлөгч Дмитрий Песков “Түүнийг сүрдүүллээ, заналхийллээ л гэж байна. Би тэр сүрдүүлгийг нь хараагүй, уншаагүй. Тэр сөрөг хүчний зарим гишүүнийг шүүмжилсэн. Шүүмжлэл хаана ч байдаг” хэмээн өмгөөлсөн мэдэгдэл хийжээ. Путинийг сөрөн зогссоныхоо төлөө арван жил шоронд хоригдсон Михаил Ходорковский “Кадыров сөрөг хүчин, тэрс үзэлтнүүдийг айлган сүрдүүлэх ажил хийдэг” хэмээн мэдэгджээ.

АНУ-д 18 хүн амиа алдаад байна

АНУ-д цас ихээр орж буйн улмаас 11 мужид онц байдал зарлаж, Нью-Йоркт автомашины хөдөлгөөнийг хориглоод байна. Байгалийн гамшиг аль хэдийнэ 18 хүний аминд хүрээд амжжээ. Нью-Йоркт гурван хүн цас цэвэрлэж байгаад амиа алдсан бол, Виржинид хоёр осгож нас баржээ. 90 сая орчим хүний амьдарч буй газар цасанд дарагдаад байна. Вашингтонд тээврийн хөдөлгөөнийг хэсэгчлэн зогсоожээ. Орон нутгийн эрх баригчид ард иргэдийг гэрээсээ гарахгүй байхыг уриалж байгаа аж. Зарим мужид цасны зузаан 70 см-т хүрчээ. Янз бүрийн мужид 200 мянга гаруй хүн гэрэл, халаалтгүй болоод байна.

Брэд Питт, Анжелина Жоли нар Лондон руу нүүнэ

Анжелина Жолигийн найруулсан “Тэнгисийн өмнө” кино Европт нээлтээ хийх гэж байгаа энэ үед Америкийн “Us Weekly” сэтгүүл Холливудын хамгийн зартай хос зургаан хүүхдийн хамтаар Лондон хот руу шилжихээр болсныг зарлалаа. Тэд ирэх гуравдугаар сараас эхлэн Их Британийн нийслэлд зургаан сар амьдрахаар болоод байгаа аж. НҮБ-ын дүрвэгсдийн сайн санааны элч Жоли Европ дахь хүмүүнлэгийн үйл ажиллагаандаа илүү ойр байхын тулд ийнхүү Лондонд амьдрахаар ирж байгаа хэмээн уг сэтгүүлд бичжээ. Одоогоор тэд өнөр гэр бүлдээ тохирсон байр хайж байна. Их Британийн нийслэлд араб гаралтай баячууд их байдаг тул байрны үнэ, түрээс маш үнэтэй байдаг аж. Цуутай хос Маддокс (14 настай), Пакс (12), Захара (11), Шило (9) , ихэр Вивьен, Нокс (7) гэсэн зургаан хүүхэдтэй билээ. “Ийш тийшээ явах, нүүх шийдвэрт хүүхдүүд оролцдог. Найзуудтайгаа уулзаж чадахгүй, санагалзахаар газар очвол бид найзуудыг нь урьж авчрахыг хичээдэг” хэмээн Жоли гурван сарын өмнө ярьж байсан юм.

Мэрайя Кэри тэрбумтантай гэрлэжээ

Америкийн поп од Мэрайя Кэри Австралийн тэрбумтан Жеймс Паркерийн гэрлэх саналыг хүлээж авлаа. Сүй тавих ёслол Нью-Йорк хотод поп-дивагийн дотны найз нөхдийн дэргэд болжээ. Паркер нэг өвдөг дээрээ сөгдөж байгаад алмаазан шигтгээтэй бөгж барихад дуучин “Тийм” хэмээн зөвшөөрсөн байна. Энэ нь аль алиных нь хувьд гурав дахь гэрлэлт нь ажээ. Кэри, Паркер нар хуримын товоо хараахан гаргаагүй байна. Мэрайя Кэри өмнөх нөхөр Ник Кэнноноос (Тэд хоёр хүүхэдтэй) салсны дараахан тэрбумтан австрали эртэй танилцсан аж. Поп одын анхны нөхөр нь дуу бичлэгийн Sony Records компанийн захирал Томми Моттола ажээ.

Нью-Йорк хот 60 сая жуулчдыг хүлээж авчээ

Нью-Йорк хот хүлээж авсан жуулчныхаа тоогоор шинэ дээд амжилт тогтоогоод байна. 2015 онд тус хотод 60 сая жуулчин зочилсон нь урьд өмнө байгаагүй амжилт юм. Нью-Йорк хот сүүлийн зургаан жилийн турш хүлээж авсан жуулчдынхаа тоогоор тэргүүлж байна. Өнгөрсөн онд халдлага, алан хядах ажиллагааны сэрэмжлүүлэг их байсан ч аялагч, жуулчдын тоо өссөн аж. Иргэд, жуулчид, зочдын аюулгүй байдлыг хангахад шаардлагатай бүх арга хэмжээг авч байгаа хэмээн дэлхийн нүсэр том хотын эрх баригчид мэдэгдлээ. Хотын дарга Билл де Блазио Нью-Йорк хотыг АНУ-ын хамгийн сэтгэл татам, хамгийн аюулгүй хот хэмээн нэрлэжээ. Британийн The Telegraph сонин 2016 онд заавал зочлох ёстой хотуудын жагсаалтад Нью-Йоркийг оруулсан юм.

Хойд Солонгосын хэн ч баталж чадаагүй хачирхалтай зургаан нээлт

Дэлхийн хэвлэл мэдээллийн хэрэгслээр Хойд Солонгосын тухай мэдээ гарвал ерөнхийдөө цөмийн туршилт, эсвэл өмнөд хөрштэйгээ сайдсан, муудсан тухай байдаг. Гэвч Өмнөд Солонгосын хэвлэл илүү сонирхолтой зүйл мэдээлдэг ажээ. Тэд хойд солонгос эрдэмтдийн итгэмээргүй нээлт, хөгжил дэвшлийн талаар бичдэг ч түүнийг баталж нотлох боломжгүй юм. BBC хараат бусаар батлагдаагүй зургаан нээлтийг сонирхуулж байна.

1.Шартуулдаггүй архи

Pyongyang Times сонин мэдээлж буйгаар, Хойд Солонгосын эрдэмтэд хамгийн сүүлд шартуулдаггүй архи зохион бүтээжээ. Нутгийн хүн орхоодой болон цагаан будаанаас гаргаж авсан шинэ бүтээгдэхүүн нь 30-40 хувийн алкогольтой. Хүн орхоодой нь энэ ундааг анагаах увдистай болгож, шарталтаас зайлсхийхэд тусладаг гэж бичжээ.

2.Тамхинаас гаргадаг шахмал

Хойд Солонгосын эрдэмтэд тамхины эсрэг арга хэмжээний хүрээнд тамхинаас гаргадаг шахмал эм гаргаж авсан тухай гурван жилийн өмнө зарлаж байв. Энэ нь өндөр үр дүнтэй, зөвхөн тамхинаас гаргаад зогсохгүй бие организмаас хорыг гадагшлуулж цэвэрлэдэг хэмээн баталж байна. Мөн л хүн орхоодой болон хэд хэдэн эмийн ургамал орсны зэрэгцээ хавдрын эсрэг үйлчилгээтэй аж. Гэвч Ким Чен Уны сүүлийн үеийн зурагнаас харвал тэрээр шинэ эмийг хэрэглээгүй, тамхиа татсаар байгаа ажээ.

3.Элэгний гайхамшигт эм

Элэгний өвчин, вируст тун өндөр үр дүнтэй эм бэлдмэлийг гаргаж авсан тухай Хойд Солонгосын мэдээллийн агентлаг уламжилжээ. Протопорфирина хэмээн нэрлэсэн биохимийн бүтээгдэхүүн нь цусаар дамжин элгийг анагаах чадвартай. Элэгний вирус, хатуурал болон бусад өвчнийг анагаахад ашиглаж болно хэмээн хойдууд баталж байна.

4.Тархи сэргээгч ундаа

Тархийг сэргээж, шинэ эд эсийн хөгжлийг дэмждэг алим, лийр, гүзээлзгэний амттай нэгэн гаазтай ундааг Хойд Солонгост амтай болгон ярьж байна. Энэхүү “хувьсгалч” шингэнийг оюун ухаанаа сайжруулах, ой тогтоолтоо нэмэгдүүлэхэд ашиглаж болно хэмээн зөвлөж байгаа аж. Мөн энэ шидэт ундаа нь зүрх хаагдах, цус харвахаас сэргийлэхийн зэрэгцээ үрчлээг багасгаж, сэвхийг арилгадаг.

5.Радарт өртдөггүй далдлалт

Нээлтүүд нь зөвхөн анагаах ухаанд хамаарахгүй. Цэргийн машин, техникийг дайсны радараас нуух будгийг зохион бүтээсэн гэж байна. Тэр будаг нь байлдааны машин, техник, буу зэвсэг төдийгүй бүхэл бүтэн барилгыг ч радараас далдалж чаддаг гэсэн мэддээллийг Өмнөд Солонгос олж авчээ. Мөн цэргийн машины хөдөлгөөнийг дууриаж дайснаа төөрөгдүүлэхэд энэ будгийг ашиглаж болдог аж.

6.Интранетэд холбогддог таблет

Шинэ таблет нь интернэтэд бус, харин интранет буюу зөвхөн дотоодын сүлжээнд холбогддог ажээ. Хэрэглэгчид Хойд Солонгосын мэдээллийн агентлаг, төрийн том хэвлэл, сонин, телевиз зэрэг урьдчилан суулгаж өгсөн хуудсуудыг нээж үзэж болно. Уг таблетаар төрийн төв телевизийн нэвтрүүлгийг үзэх боломжтой юм. Хойд Солонгосын иргэд интернэт хэрэглэх эрхгүй тул Youtube, Facebook, Gmail зэргийг мэдэхгүй. Гэвч Angry Birds тоглоход дээрх таблетийг ашиглаж болох ажээ. 

Penthouse-ын цаасан хувилбар хаагдлаа

Penthouse эротик сэтгүүл цаасан хувилбараар хэвлэгдэхээ больж, зөвхөн дижитал хэлбэрээр уншигчдад хүрэхээр боллоо хэмээн тус сэтгүүлийг эрхлэн гаргадаг General Media Communications Group-ээс мэдэгдлээ. Эдүгээ худалдаанд байгаа нэгдүгээр сарын дугаар 50 жилийн цаасан хэвлэлийн сүүлчийнх нь болж байгаа аж. Алдарт сэтгүүлийн цаасан хэвлэлд дурладаг олон уншигчдыг онлайн уншигч болгож, илүү их орон зайтай, илүү өргөн мэдээлэл хүргэнэ хэмээн тэд амлаж байна.

Тус сэтгүүл гол өрсөлдөгч Playboy-ийн адилаар хэдэн аравны өмнөөс борлуулалт нь буурсаар иржээ. Penthouse сэтгүүл болон pets буюу хуудсанд нь нүцгэн биеэ гайхуулдаг залуу хүүхнүүд 1970-аад онд ид мандан бадарч байсан билээ. Тэр үед эротик сэтгүүл хэдэн сая хувиар борлогдож, 1972 оны арваннэгдүгээр сард 7.1 хувиар зарагдаж  хосгүй амжилт тогтоож байв. Гэвч өнөөдөр борлуулалт нь 100 мянгыг ч давахаа больжээ. 2013 оны есдүгээр сард General Media Communications болон Penthouse-ын толгой компани FriendFinder Networks дампуурлаа зарласан ч хэдэн сарын дараа дансаа сэргээж чадсан юм. Playboy сэтгүүл 2016 оны гуравдугаар сараас хойш хуудсандаа нүцгэн эмэгтэйн зураг хэвлэхээ болино хэмээн зарлалаа.

Пабло Эскобарын Майами-Бич дахь харшийг нураав

АНУ-ын Майами-Бич хотын эрх баригчид нэгэн үе Колумбийн хар тамхиын мафийн зартай толгойлогч Пабло Эскобарт харъяалагдаж байсан тансаг харшийг нурааж эхэлжээ. “Чөтгөрийн байшин нүдэн дээр алга болж байгаад би баяртай байна. Тэр бол энэ дэлхийн аймшигтай гэмт хэрэгтэн байсан. Хотын энэ хэсгийг илүү гэгээлэг байлгамаар байна” хэмээн тэрхүү үл хөдлөх хөрөнгийн одоогийн эзэн Кристиан Бердуа ярилаа. Тэрээр өнгөрсөн онд уг байшинг нэг хүнээс 9.6 сая доллараар худалдаж авчээ. Эхнэр нь энэ харшийн хар түүхийг мэдсэний дараа лам залж ном уншуулж байсан аж.

Байшинг нураахаас өмнө тэд мэргэжлийн эрдэнэс хайгчдыг хөлсөлж, баримтат киноны зураг авалтын багийг дууджээ. Гэвч гантиг чулуун шалан доороос ганц төмөр авдар олсон нь аль хэдийнэ тоногдчихсон байв. Пабло Эскобар энэ харшдаа заларч байсан эсэх нь тодорхойгүй байна. Эскобарын мафи 1980-90 онд АНУ-д оруулдаг кокаины ихэнх хэсгийг хянаж байсан юм.1993 онд тусгай албаныхан түүний нуугдаж буй газрыг бүсэлсний дараа буудаж  устгасан юм.

НҮБ Өмнөд Суданд туслахыг уриалав

НҮБ Өмнөд Суданы иргэний дайнд нэрвэгдсэн хүмүүст 1.3 тэрбум долларын тусламж үзүүлэх ажлыг санаачилж, хандив цуглуулж эхэлжээ. 2013 оны арванхоёрдугаар сард иргэний дайн эхэлснээс хойш тус улсын арван мянга орчим иргэн амиа алдаж, 2.3 сая хүн орон гэрээ орхин дүрвэжээ. Өмнөд Суданы 5.1 хүнийг дэмжин тэтгэхэд наад зах нь 1.3 тэрбум доллар хэрэгтэй байна хэмээн НҮБ-ын хүмүүнлэгийн тусламжийн зохицуулагч Евгений Овус ярилаа. Өмнөд Суданд тав хүртэлх насны 680 мянган хүүхэд хоол тэжээлийн дутагдалд оржээ. НҮБ 2016 оны хүмүүнлэгийн үйл ажиллагаанд 20 тэрбум доллар шаардлагатай хэмээн мэдэгдэж байна.

“Исламын улс” дайчдынхаа цалинг хоёр дахин багасгана

Лалын хэт даврагч “Исламын улс” бүлэг өөрсдийн дайчид болон бусад гишүүний цалинг хоёр дахин багасгахаа зэхэж байна хэмээн Британи дахь Сирийн хүний  эрхийн төвөөс мэдэгдлээ. Тус бүлэг онцгой нөхцөл байдлын улмаас зохион байгуулалтаа шинэчилж, бүтэцдээ өөрчлөлт хийж байгаа нь дайчдын цалин, хөлсийг бууруулах шалтгаан болсон бололтой. “Исламын улс”-ын хяналтад байдаг нефтийн байгууламжууд агаарын довтолгоонд өртөн ихээр сүйдсэн нь санхүүжилтэд нь муугаар нөлөөлжээ. Он гарсаар АНУ болон холбоотнууд Сири, Ирак дахь 270 байнд цохилт өгчээ. ОХУ-ын нисэх хүчин мянга гаруй байгууламжийг бөмбөгдөөд байна.

Өнөр бүл 19 дэх хүүхдээ хүлээж байна

Британийн хамгийн өнөр гэр бүл 19 дэх хүүхдээ хүлээж байна Metro мэдээлэв. 40 настай Сью, 45 настай Ноэл нар хамтдаа аль хэдийнэ 18 хүүхэдтэй болоод амжсан бөгөөд хамгийн бага нь найман сартай юм. Тэд 2014 онд 18 дахь хүүхдээ өлгийдөж авахдаа магадгүй хамгийн сүүлчийн хүүхэд байх хэмээн ярьж байв. Гэвч дахин хөл хүнд болсон гэргий “Энэ бол гэнэтийн сонин байлаа. Шинэ он гайхалтай эхэлж байна. Хэзээ ч гэж хэзээ ч битгий хэлж бай гэдэг үнэн юм байна” хэмээн өгүүлэв. Хос багадаа танилцсан бөгөөд Сью 14 насандаа анх жирэмсэлж байжээ. 

Афган залуу эхнэрийнхээ хамрыг огтолжээ

Нэг афган залуу эхнэртэйгээ муудалцаж, хамрыг нь огтолж хаяаад гэрээсээ зугтаж талибуудтай нийлжээ. Эмэгтэйчүүдийн эрхийг хамгаалагчид энэ хэрэг явдлыг балмад хэмээн нэрлэж, харгис нөхрийг олж шийтгэхийг шаардаж байна. 25 настай  Мохамед Хан гэгч нь гэмт хэрэг өдүүлж байгаагүй, талибуудтай холбоо сүлбээгүй нэгэн байсан ч эхнэртээ ийнхүү харгис хандсаны дараа талибууд руу зугтсан аж. “Эхнэр нөхөр хоёр бүтэн сайнд гэртээ маргалдсан. Хан эхнэрээ ална хэмээн буу гаргасан ч баарсан тул хутга гаргаж ирээд хамрыг нь огтолсон” хэмээн цагдаагийн төлөөлөгч Фаряб ярилаа. Нөхөртөө харгислуулсан бүсгүй Реза Гуль “Тэр намайг байнга зоддог байсан. Гарыг минь хүлж байгаад хамар огтолсон. Бас тархийг минь ухаж хаях юм болов уу гэж айж байсан” хэмээн эмнэлгийн орон дээрээс сулхан хоолойгоор ярьжээ. Бүсгүйн хамар бүрэн тайрагдсан тул Афганистанд эмчлэх боломжгүй болжээ. Энэхүү золгүй хэрэг Айша Бибиг санагдуулж байна. 14 насандаа талиб эрд богтлогдсон Айша охин зугтаж байгаад баригдсаны дараа хадам аав, нөхөр нь шийтгэл болгож хамар, чихийг нь тайрч (2009 онд) ууланд хаясан байсан юм. Гэвч иргэд болон америк цэргүүд түүнийг олж аварчээ. Айша охины “Тайм” сэтгүүлд нийтлэгдсэний дараа тэрээр сайн санаат хүмүүсийн ачаар АНУ-д очиж хамар нөхөн сэргээх мэс засалд орсон юм. Айшаг АНУ-д амьдардаг афган-америк гэр бүл өргөж авчээ.

Хүний эрхийг хамгаалагч байгууллагууд Реза Гулийг хүүхдийн хамт АНУ-д авчирч, хамрыг нь нөхөн сэргээх мэс засалд оруулах арга зам хайж байна. Холбооны хүчин 2001 онд талибуудыг эрх мэдлээс зайлуулсны дараа тус улсад эмэгтэйчүүдийг ялгаварлан гадуурхаж, доромжлохыг хуулиар хориглосон ч энэхүү бүдүүлэг ёс хадгалагдсан хэвээр байгаа юм. 2014 онд АНУ болон НАТО-гийн цэргийн гол хүчин Афганистаныг орхин гарсны дараа талибууд дахин толгойгоо өндийлгөж, хөдөө, алс бөглүү нутгийг бүрэн хяналтдаа авчээ. Улмаар тэд шариатын хуулийг сэргээж, эмэгтэйчүүдийг хүн биш хэмээн үздэг бурангуй ёсоо эргэн сэргээх болсон юм. 

Дэлхийн хамгийн залуу ээж өөд болов

Анагаах ухааны түүхэнд хамгийн залуудаа ээж болж байсан Перу улсын иргэн Лина Медина төрөлх нутагтаа 83 насандаа өөд болов. Тэрээр 1939 онд таван настай байхдаа хийсвэр хагалгааны тусламжтайгаар хүүхэд төрүүлсэн юм. Охины хүү нь цоо эрүүл мэндэлсэн билээ. Гэвч нь хамгийн залуу ээжээс мэндэлсэн хүү 1979 онд 40 насандаа тархины хавдрын улмаас хорвоог орхижээ. Лина хожим нь нөхөрт гарч дахин нэг хүүхэд төрүүлсэн байна.

Төв Америкт гацсан куба цагаачдын түрүүч Майамид ирлээ

Өнгөрсөн оны арваннэгдүгээр сарын дундуур Кубын найман мянга орчим иргэн Коста-Рикад ирээд гацсан юм. Кубуудыг визгүйгээр хүлээн авдаг Америк тивийн цорын ганц улс болох Эквадороос ирсэн кубууд Төв Америк, Мексикээр дамжин АНУ-д хөл тавих гэсэн ч Никарагуа улс хилээ хаасны улмаас куба цагаачид Коста-Рикад гацсан юм. Коста-Рика, Никарагуа, Мексик, АНУ цагаачдын энэхүү давалгааг шийдвэрлэх хэлэлцээг хэд хэдэн удаа хийсний эцэст Төв Америкт “хөл хорионд” ороод байсан куба иргэдийн түрүүч АНУ-д хөл тавьж, Флоридагийн өмнөд хэсгийн Майами хотод иржээ. Тэднийг Майами дахь төрөл төрөгсөд, найз нөхөд нь угтаж авсан байна.

Кубын 20 орчим иргэн өнгөрсөн долоо хоногийн сүүлчээр Мексикийн Ларедо  хотоос Техасын зүүн өмнөд нутагт орж ирээд тэндээсээ автобус, орон нутгийн нислэгээр Майамд хүрчээ. “Эрх чөлөөт кубууд” байгууллага дэмжиж тусалсан аж. Үүний араас 40 орчим куба цагаач Мексик, АНУ-ын хил дээр ирээд байгаа ба тэд мөдхөн Америкийн хэд хэдэн хот руу хүргэгдэхээр зэхэж байна.

Хятадын эдийн засгийн өсөлт тогтвортой байна

2016 онд Хятадын эдийн засгийн өсөлт өнгөрсөн оныхтой адил байх болно хэмээн тоймчид үзэж байна. БНХАУ-ын Үндэсний статистикийн  хорооны дарга Ван Баоан энэ онд эдийн засгийн өсөлт тогтвортой байх болно хэмээн онцоллоо. 2015 онд Хятадын дотоодын нийт бүтээгдэхүүний өсөлт 6.9 хувь хүртэл буурсан нь сүүлийн 25 жилийн хамгийн бага үзүүлэлт юм. Үүнээс гадна үйлчилгээний салбарын эзлэх хувь анх удаа 50 хувийг давжээ. 2014 онд 48.1 байсан бол, өнгөрсөн онд 50.5 хувь болсон байна. 1968 оноос хойш анх удаа цахилгаан эрчим хүчний боловсруулалт буурсан нь агаарын бохирдлын эсрэг тэмцэлтэй холбоотой ажээ.

Голландад цагаачлалыг эсэргүүцсэн жагсаал болов

Голландын Хес хотод цагаачдыг хүлээн авах төв барихыг эсэргүүцсэн жагсаал болж, цагдаа нар хүч хэрэглэн тараажээ. Хотын зөвлөлийн хуралдаанаар дээрх асуудлыг хэлэлцэж байхад эсэргүүцлийн жагсаал болсон байна. Эхэндээ тайван уур амьсгалд болж байсан ч хэсэг хугацааны дараа жагсагчид ширүүсч хотын захиргааны байр руу өндөг, шатамхай бодис шидэж эхэлжээ. Тусгай албанхын ирж жагсаалыг тараасан байна. Хотын эрх баригчид цагаачдыг хүлээж авах 500 хүний багтаамжтай төв барихаар төлөвлөж байгаа аж. Нутгийн иргэд хэтэрхий олон цагаач хүлээж авах гэж байна хэмээн эгдүүцжээ. Хес хот 28 мянган хүнтэй юм. 

Цагаачдыг англи хэл сурахгүй бол буцааж явуулна

Их Британид ирсэн лал шашинтай цагаач эмэгтэйчүүд англи хэл сурахгүй бол байнгын оршин суугчийн эрхийг нь хурааж авна хэмээн Ерөнхий сайд Дэвид кэмерон мэдэгдлээ. Их Британид амьдардаг 190 мянган лал эмэгтэй (нийт лал эмэгтэйчүүдийн 22 хувь нь) англи хэл мэддэггүй гэсэн тооцоо бий. Лал эмэгтэйчүүдийг ялгаварлан гадуурхах, нийгмээс тусгаарлахын эсрэг шийдвэртэй арга хэмжээ авах цаг болсон хэмээн тус улсын эрх баригчид үзэж байна. Мөн Их Британи дахь шашны зөвлөл, лалын хууль буюу шариатын шүүхийн (тус улсад 80 орчим байдаг) үүргийг нарийн чанд, гүнзгий шалгах ёстой хэмээн консерватив лидер үзэж байгаа юм. Зарим эрэгтэйчүүд эхнэр, охин дүү, охин хүүхдүүдээ шариатын хууль сахиулж байгаа нэрээр хорьж цагдаж, хор хохирол учруулдаг хэмээн үзэж байгаа аж. Лал шашны зарим нийгэмлэг эмэгтэйчүүдийг хүчээр нөхөрт гаргах, эмэгтэй бэлэг эрхтнийг нь тайрах зэрэг жигшүүртэй арга, хэлбэрийг өөгшүүлдэг хэмээн Д.Кэмерон үзэж байна. Мөн лалын хэт даврах үзлийг сурталчилж, Их Британийн газар нутаг дээрээс “Исламын улс” бүлгийн эгнээнд дайчин элсүүлэхэд ч гар хөл болж байгаа хэмээн үзжээ.

Их Британид оршин суудаг лал эмэгтэйчүүд сургууль, сургалтын төвд англи хэл сурахад зориулж төсвөөс 26 сая паунд гаргахаар болсныг Ерөнхий сайд зарлалаа. “Тэд англи хэлээ сайжруулж чадахгүй бол Их Британид оршин суух эрхтэй нь ярих болно. Илүү нэгдмэл, илүү нягтарсан, бүгдэд жинхэнэ боломжийг олгосон нийгмийг бий болгох тухай ярьж байна” хэмээн Кэмерон хэлжээ. “Өмнө нь манай улсад ирж байгаа хүмүүсийг салангид, тусгаарлагдмал байдлаар амьдрахыг зөвшөөрдөг байлаа. Энэ нь том алдаа байсан гэж би бодож байна” хэмээн тэрээр нэмж өгүүлэв.

Дэвид Кэмерон сүүлийн үед лал нийгэмлэгийн эсрэг мэдэгдлийнхээ улмаас ихээхэн шүүмжлүүлж байгаа юм. Ногоон намын лидер Натали Беннетт Засгийн газрын лидерийн санаачилгыг хатуу шүүмжилж байна. Тэрээр Twitter хуудсандаа “Дэвид Кэмерон тэргүүтэй Засгийн газар 2011 онд цагаачдад зориулсан англи хэлний хичээлийг таслан зогсоож байсан. Гэтэл одоо цагаачид англи хэл сурсангүй хэмээн гомдоллож байна” хэмээн бичжээ. Их Британи дахь хоёр дахь том шашин нь лал шашин юм. 2011 оны хүн амын тооллогоор, Их Британийн лал шашинтай хүн хоёр сая 706 мянга байсан нь нийт хүн амын 4.5 хувь ажээ. Англид 2.66 сая, Шотландад 76 мянга, Уэльст 45 мянга, Хойд Ирландад гурван мянган лал шашинтан амьдардаг гэсэн дүн гарчээ. 

Америкийн гурван цэргийг хулгайлжээ

Иракийн нийслэлд үл мэдэгдэх этгээдүүд Америкийн гурван цэргийг хулгайллаа хэмээн Al-Arabya телевиз мэдээлэв. Цэргүүд Багдадын өмнөд хэсэгт явж байгаад орчуулагчийн хамт алга болжээ. “Америкийн иргэд алга болсон хэрэг явдлыг судлан шалгаж байна. Бид Иракийн талтай холбогдож, цэргүүдийг хаана байгааг илрүүлж, чөлөөлөх арга хэмжээ авч байна” хэмээн АНУ-ын Төрийн департаментын төлөөлөгч ярилаа. Хэд хоногийн өмнө Багдадын нэгэн худалдааны төвд хэт даврагчид хүмүүсийг барьцаалсан юм. Тэд дэлгүүрийн гадаа бөмбөг дэлбэлж арван хүний аминд хүрчээ. Мөн энэ өдөр Багдадын зүүн дүүрэгт автомашинд тавьсан бөмбөг дэлбэрч долоон иргэний аминд хүрсэн байна.

Хойд Солонгост нефть нийлүүлэхээ зогсоохыг Хятадаас шаарджээ

АНУ-ын эрх баригчид Хятадад хандаж Пхеньянд нефтийн бүтээгдэхүүн нийлүүлж, Хойд Солонгосын нүүрсийг импортоор авахаа зогсоохыг шаардлаа. Америкийн тал Сөүлд Япон, Өмнөд Солонгосын дипломат төлөөлөгчидтэй уулзаж, цөмийн туршилт хийсэн Хойд Солонгосын эсрэг хатуу арга хэмжээ авах талаар ярилцахдаа ийнхүү шаардсан аж. Бээжин ямар нэг хариу өгөөгүй байна. Хятадууд Хойд Солонгост жил бүр 400-500 тн нефтийн бүтээгдэхүүн нийлүүлдэг аж. Харин Пхеньян 2015 онд Хятадад 15.5 тн нүүрсийг 115 сая доллараар нийлүүлсэн нь нийт экспортынх нь 40 хувь болж байгаа юм. АНУ-ын Төрийн нарийн бичгийн дарга Жон Керри нэгдүгээр сарын 27-нд Бээжинд ирж Хойд Солонгос дахь нөхцөл байдлын талаар ярилцах гэж байна.

Италийн ЭСЯ пуужинд өртлөө

Афганистаны нийслэл Кабул хот дахь Италийн Элчин сайдын яамны барилга өчигдөр пуужингийн довтолгоонд өртжээ. Дэлбэрэлтийн улмаас хамгаалалтын нэг ажилтан шархадлаа. Афганистан, Пакистан, АНУ, Хятадын тал Кабул хотод энхийн хэлэлцээг сэргээгээд байна. “Талибан” хөдөлгөөн энхийн үйл явцад бэлэн гэдгээ мэдэгдээгүй байгаа юм. 2014 оны эцсээр НАТО болон Америкийн цэргийн гол хүч Афганистанаас гарч явснаар талибууд толгойгоо өндийлгөж, Афганы эрх баригчдын эсрэг амжилттай байлдсаар байна. Өнөөдөр талибууд 2001 оноос ч илүүтэй газар нутгийг хяналтдаа авчээ. Гэвч томоохон хот, мужийн нийслэлүүдийг эзэлж чадаагүй байгаа юм.

Орост “шүүгээнээс гарах”-ыг хориглоно

Орос эр ижил хүйстэнтэйгээ унтдаг бол ажил дээрээ амаа хамхиж явах нь өлзийтэй. “Энэ бол хүний эрх” хэмээн гудамжинд гарч хашгирвал торгуулах нь бараг л тодорхой. Гэй, эсвэл лесби байж болно, гэхдээ тэр эрхээ олон нийтийн өмнө тунхаглахгүй байсан нь дээр. Орост ижил хүйстний хандлагыг өөгшүүлж, нийгэмд сурталчлахыг хориглодог. Уран зохиол, хэвлэл мэдээлэл, улс төрд ч гэй туг мандуулж болохгүй. Тэгвэл одоо “ангуучлал” хувь хүн рүү орж магадгүй болов.

Парламент дахь сөрөг хүчин энэ асуудал дээр ямар ч нөлөө үзүүлж чаддаггүй аж. ОХУ-ын Коммунист нам ижил хүйстнүүд “шүүгээнээсээ гарвал” хуулиар шийтгэх санал дэвшүүлжээ. Улаан намын депутат Иван Никитчук, Николай Арефеев нар жам бус чиг хандлага гаргасан иргэнийг 58 еврогоор торгох хуулийн төслийг санаачилсан байна. Уламжлалт бус хандлагаа олон нийтэд зарлавал засан хүмүүжүүлэх төвд 15 хүртэл хоногоор хоригдож магадгүй болов. Дээр саналыг энэ долоо хоногт Думаар хэлэлцэж, ижил хүйстнүүдийг олон нийтийн өмнө үнсэлцэх, жам бус чиг хандлагаа илэрхийлэхийг хориглох бололтой. И.Никитчук гэйүүдийг “өвчтэй, галзуу” гэж үздэг ба оросуудын оюун ухааныг хордуулж, залуусыг нь ялзруулж, төрөлтийг багасгах гэсэн өрнөдийн стратегийг хуулиар таслан зогсоох ёстой хэмээн үзэж байна.

Сэтгүүлчид Кремлийн эрх баригчдаас дээрх хуулийн төслийн талаар асуусан ч тайлбар хийсэнгүй. Ерөнхийлөгч В.Путиний “Нэгдмэл Орос” нам ижил хүйстнүүдийг “чангалах” саналыг дэмжиж байгаа бололтой. Төрийн Думын бүрэн эрхт төлөөлөгч Дмитрий Вяткин хоёр депутатын дэвшүүлсэн саналыг “шаардлагагүй” хэмээн нэрлэжээ. “Левада” төвөөс явуулсан судалгаагаар, оросуудын 37 хувь нь ижил хүйстэн хандлагыг гажуудал гэж үздэг бол, 18 хувь нь тэднийг шүүхээр шийтгэх ёстой гэжээ. Оросын ижил хүйстэн нийгэмлэгийн нэртэй идэвхтэн Ирина Федотова өнгөрсөн зун халдлагад өртөж зодуулсныхаа дараа  Люксембург руу гарчээ. “Би чадахаараа л тэмцсэн. Тэгээд чадахаа болиод  явсан” хэмээн ярилаа.

Human Rights Watch (HRW) байгууллагаас мэдэгдэж буйгаар, 2013 онд ОХУ-д ижил хүйстэн хандлагыг сурталчлахыг хориглосон хуулийг баталсан нь гэй, лесби нарын эсрэг хүчирхийллийг өөгшүүлсэн аж. HRW Оросын 16 хотод судалгаа явуулахад нөхцөл байдал улам дордсон байв. Санкт-Петербургт амьдардаг 26 настай гэй залуу Илья “Бид улам л байх газаргүй болж байна. Биднийг хавчиж, зодож, доромжлохыг хуулиар зөвшөөрчихсөн. Өмнө нь манай хот илүү тэвчээртэй байлаа. Одоо гараасаа бариад гудамжаар явах аргагүй болсон” хэмээн ярив.

“Албаны байр суурь” тодорхой. Гэй, эсвэл лесби байх нь эрүүл бус, амьдралын ийм хэв маяг хүүхдүүдэд хор хөнөөлтэй, тиймээс тэд хүний эрх гэдгээр далайлгаж нийгэмд эрх, байр суурь нэхэх эрхгүй гэдэг аж. Гудамжинд, ажил дээр гэй болон хүүхдийг садар самуунд уруу татагчдыг нэг шуудайнд чихэж орхих нь элбэг. Төрөөс шийтгэл хүлээлгэхээс гадна ард, иргэдийн гадуурхал их байгаа аж.