Apple-ийн экс менежер нууц задруулсан хэргээр ял сонслоо

Apple-ийн глобал нийлүүлэлт хариуцсан менежер асан Пол Дивайн компанийн нууц мэдээллийг дамжуулсан хэргээр нэг жилийн хоригдох ял сонсч, 4.5 сая долларын торгууль төлөхөөр болжээ. Дивайн Apple компанийн нууцыг Азийн сэлбэг, эд анги нийлүүлэгчдэд дамжуулж хэдэн сая долларын шан харамж авсан хэмээн шүүх үзсэн байна. Тэрээр 2005 онд Apple компанид глобал нийлүүлэлт хариуцсан менежерээр орж 2010 онд баривчлагдах хүртлээ ажиллажээ. Сан-Хосегийн холбооны шүүх Дивайнд оноох ялыг өнгөрсөн долоо хоногийн сүүлчээр зарласан байна. Эхлээд 20 жилийн ял өгөхөөр төлөвлөж байсан ч яагаад ийм олон жилийн дараа нэгхэн жилийн ял оноож байгаа нь тодорхойгүй. Дивайн мөрдөн шалгалтад хамтран ажиллаж, хууль бус сүлжээнд оролцсон бусад хүмүүсийг илчлэхэд ихээхэн туслалцаа үзүүлсэн тул ийнхүү хөнгөн ял авсан хэмээн бичиж байна.

Эболагаас хамгаалах хувцас хэрэглэлийг Ганад хүргэв

Японы агаарын хүчний онгоцууд Эбола вирусээс хамгаалах 20 мянган хувцас, хэрэглэлийг Гана улсад хүргэлээ хэмээн Kyodo агентлаг мэдээлэв. Баруун Африкийн орнуудад халдварт өвчнөөс сэргийлэх 700 мянган иж бүрэн хувцас, хэрэглэл нийлүүлэх төслийн нэг хэсэг нь энэ юм. Либери, Сьерра-Леон, Кени, Мали улс тусламжаа хүлээж байна. Баруун Африкийн орнуудад 17 мянга 800 хүн Эбола вирусээр халдварлаад байна.

Израилийн парламент тарлаа

Израилийн парламент өөрийгөө тараах хуулийг баталж, хугацаанаас өмнөх сонгуулийг 2015 оны гуравдугаар сарын 17-нд явуулах шийдвэр гаргалаа. Парламентыг тарааж, хугацаанаас өмнө сонгууль явуулахыг 93 депутат дэмжжээ.

Израилийн Ерөнхий сайд Биньямин Нетаньяху ийнхүү хэлсэндээ хүрлээ. Тэрээр мөн сөрөг хүчний төвийн намын Сангийн сайд Яир Лапид, Хууль зүйн сайд Ципи Ливни нарыг огцруулж буйгаа зарлав.

Энэтхэгийн Ерөнхий сайд Time сэтгүүлийн “Оны хүн”

Time  сэтгүүлийн уншигчдын санал асуулгаар Энэтхэгийн Ерөнхий сайд Нарендра Моди “Оны хүн”-ээр тодорлоо. Модигийн төлөө таван сая уншигчийн 16 хувь нь саналаа өгчээ. Хоёрдугаар байрт АНУ-ын Фергюсон хотод цагдаа, эрх баригчдыг эсэргүүцсэн хүмүүс оржээ. Хонконг дахь эсэргүүцлийн хөдөлгөөний лидер Жошуа Вонг гуравдугаар байрт орсон байна. Нобелийн энх тайвны шагналт Малала Юсуфзай, Эбола тахлаар халдварласан хүмүүсийг эмчилсэн эмч, сувилагч нар эхний тавд багтжээ. ОХУ-ын Ерөнхийлөгч В.Путин санал асуулгын дүнгээр зургадугаарт бичигдсэн байна. 

Хосе Мухика: Мөнгөнд их дуртай хүмүүсийг улс төрөөс зайлуулах хэрэгтэй

Латин Америкийн жижигхэн Уругвай улсад сонинд мэдээний зай бараг олдохгүй байна. Амьдралын энгийн хэв маяг, үлгэрийн мэт намтартай, эд материалын шуналгүй, илэн далангүй яриатай экс партизан Хосе Мухика улс орныг таван жил удирдаад халаагаа өгч байна. Түүний хуучин Volkswagen, үнэнч Мануэла, гурван хөлтэй нохой нь Уругвайн үндэсний билэг тэмдэг мэт болжээ. ХХI зууны хамгийн өвөрмөц лидер эрх мэдлийг орхихоос хэдхэн долоо хоногийн өмнө “АВС” сонин уулзаж ярилцжээ.

-Та 79 настай. Түүхэнд таныг хэрхэн дурсах бол?

-Үгүй ээ, надад түүх хамаагүй. Тэр бол бусдын бичдэг зүйл. Надад өөр хийх юм байна. Би өөртөө ийм эмгэнэлтэй асуулт тавьдаггүй.

-Та илүү сайн улсыг үлдээж байна уу?

-Нийгмийн шударга ёсны үүднээс харвал арай илүү сайн улсыг үлдээж байна. Ядуу, гуйлгачин хүмүүс цөөрлөө. Ирээдүйд илүү сайн нийгэм харагдаж байна.

-Та партизаны бүлгийн нэг хэсэг байсан. Тэр үеийн нөхцөл байдал эргэн ирвэл та гартаа дахин зэвсэг барих уу?

-Бид тэр ертөнцөд буцаад орвол зэвсгээ бариад л босох байх шүү. Гэхдээ хэзээ ч өнгөрсөн үе рүү эргэж ордоггүй юм. Тэр үед хэд хэдэн онцлог байсан, өнөөдөр бол өөр. Ядуу улс оронд коммунист нийгэм байгуулж байна гээд өөр бүлэгт харъяалагддаг хүмүүсийн эрх чөлөөг хязгаарлах оролдлого хийдэг байлаа. Тэгээд үр дүнд нь аймшигтай хүнд суртал бий болж тэр нь эцэстээ бутарч унаад дууссан. Өнөөдөр түүх биднийг капиталист болгочихлоо. Гэхдээ бид социалист гарлын амьтад болохоор энэ сэтгэхүйтэйгээ л дэлхийгээр алхаад байна.

-Та цаашдаа уйдах юм биш биз?

-Би уйдна гэж үү? Харин ч эсрэгээрээ, надад цаг хугацаа дутагдаж байна. Би газарт дуртай. Амьдралыг, байгалийг харах, бодох хэв маяг минь тэр чигээрээ тариачин. Би газартай ажиллах дуртай. Хүмүүст ажил хэрэгтэй болсон хэцүү бэрх үед миний хийж чадах хамгийн сайн зүйл бол газар. Бид газрыг орхиж, салж явдаг ч идэж, уух маань хүртэл газраас хамааралтай байдаг.

-Та бусад лидерээс огт өөр амьдралын хэв маягаараа ялгарсан хүн. Таны хүрсэн ололтыг дараагийн удирдагчид үгүй хийчих вий гэж айдаг уу?

-Магадгүй л юм. Гэхдээ ололт, амжилтыг хадгалж, хөгжүүлж явах нь Засгийн газрын үүрэг. Хуучныг нэг уламжлал бидний дундуур орж ирэх гээд байдаг. Удирдагчид нийгмийн эрх ямбатай цөөнхийн эрх ашигт нийцүүлж ажиллах гээд байдаг юм. Улс төрийн ажил мэргэжил нь эд баялагт үйлчилж, түүнийг сайрхуулахад байдаг юм уу? Хэлэхийг хүссэн зүйлээ базаад хэлчихье: мөнгөнд их дурладаг хүмүүсийг улс төрөөс хөөж зайлуулах хэрэгтэй.

-Европ тив хоёр дахь хямралаа туулж байхад Уругвайн эдийн засаг зогсолтгүй өссөөр. Та ямар нэг зөвлөгөө өгөхгүй биз?

-Европ зөвхөн хасаж, танаад хямралаас гарчихна гэж эрмэлзсэн. Тийм гүнзгий байдлыг тэгж эргүүлж чадахгүй.

-Европ, Латин Америк хоёр эсрэг тэсрэг замаар яваад байх шиг. Эхнийх нь холбоо байгуулаад одоо ан цав үүсээд, нөгөөх нь нэгдэж нийлээд, өсөөд дэвжээд яваад байна...?

-Бид олон жил буруугаа Европ, Америк руу чихэж, бэртэгчин маягаар амьдарсан. Бид хариуцлагаа хүлээхийг хүсдэггүй байлаа. Бусдыг буруутгах их амархан л даа. Испаниуд та нар одоо германуудыг буруутгаад сууж байна. Латин Америк бол ганц биш, олуулаа, олон ялгаатай. Гэхдээ бид 15 жилийн өмнөөс ярилцаж, хамтдаа шийдвэр гаргаад явж байна.

ncelotti deberá hacer en su pizarra una modificación tras la lesión de Gareth Bale. Isco se ha ganado ocupar el puesto del de Gales ante el Liverpool y ante el Barça.

Үр дүнгээ өгөөгүй “Ногоон уут”-ыг дахин тараах нь ямар учиртай вэ

Ихээхэн хэл ам дагуулсан хогны ногоон уутны төсөл есдүгээр сарын 1-нээс дахин хэрэгжиж эхлэхээр болжээ. Айл өрхөөс гарч буй хог хаягдлыг цэгцлэх, ангилах, хогоо соёлтой хаяж сургах гол зорилготой хэмээн тунхаглаж байсан. Гэвч төсвөөс гурван тэрбум төгрөг зарлагадан хэрэгжүүлсэн энэхүү төсөл үр дүнгээ өгөөгүй. Тэртэй тэргүй дэлгүүрээс авсан торондоо хогоо хийгээд хаячихдаг орон сууцныханд ямар ч ахиц, дэвшилтэй юм болоогүй, гэрийн хогны саванд нь багтахгүй баахан ногоон ууттай л болсон. Харин гэр хорооллынхныг хогоо ногоон уутанд хийгээд хаяарай, ногоон уутандаа хийгээд замын хажууд сайхан тавиад бай, хогны машин ирээд л аччихна, ингэж бид хоггүй сайхан хот, гудамжтай болно гэж байсан ч тэгсэнгүй. Замын хажууд тавьсан ногоон ууттай хогыг нь үхэр, нохой мэт нь шиншлэн тарааж тэрнээсээ эс юм болж байна. Нийслэлчүүд ногоон ууттай болоод “хог хаях соёл”-той болсонгүй, хот хогноосоо салаад цэвэр цэмцгэр болсонгүй.

Гэтэл дахиад л ногоон уут тараах сураг сонсогдож, дахиад л төсвийн мөнгө тэрбум тэрбумаараа урсах нь. Ногоон уут тарааж буй бас нэг тайлбар нь үндэсний үйлдвэрлэлийг дэмжиж байна гэдэг. Одоогоор хотын захиргааны санаачилгаар хэрэгжүүлж буй хогны ногоон уут тараах төсөлд “ОБ Пласик”, “Мультипак”, “Мөнгөн пластик”, “Монгол хэвлэл” компаниуд оролцож байгаа юм байна. Эдгээр үндэсний компаниа дэмжиж, төсвөөс гурав орчим тэрбум төгрөгийг тарааж, 27 сая орчим ногоон уут хийлгэж байгаа ажээ. “ОБ Пластик” бол та бидний иддэг “Атар”, “Зууван Чех”, “Мишээл” талх болон томоохон супермаркетуудын тор зэргийг үйлдвэрлэдэг үндэсний шилдэг компанийн нэг. Харин нөгөө гурав нь үйлдвэрлэлийн байр, тоног төхөөрөмж гээд байх юм бараг байхгүй бололтой. Өөрөөр хэлбэл төсвөөс авсан хэдэн зуун сая төгрөгөөр хаана, ямар үйлдвэрлэл явуулдаг нь бүрхэг. Сураг сонсохноо урд хөршид очиж, хогны ногоон уут хийлгээд аваад ирдэг гэх.

Нөгөө үндэсний үйлдвэрлэлээ дэмжиж, нийслэлчүүдийг хог хаях соёлд сургах төсөл нь явж явж урд хөршийн эдийн засгийг дэмжсэн хэрэг болж байна уу. Арай үндэсний компаниараа “гул барьж”, хэдэн түшмэлийн халаасны компанийг мөнгөөр тэтгэж, үндэсний эдийн засагт бус, урд хөршийн эдийн засагт хувь нэмэр оруулж байгаа юм биш биз. Хогны ногоон ууттай, уутгүй болоод л байсан. Ногоон уут тараагаад байдал огт дээрдээгүй. Тэгсээр байтал дахин төсвөөс гурван тэрбумыг гаргаж, ногоон уут тараах нь ямар учиртай юм бол. Ногоон уутанд зарцуулж буй тэрбум тэрбум төгрөгийг өөр амин чухал хэрэгтэй төсөл, хөтөлбөрт зарцуулж болох талаар сэтгүүлчид, иргэд хангалттай бичиж, дуугарч байсан. Төр засгаас Ажаа гэгээний санаачилгаар босч буй хүүхдийн эмнэлэгт амласан мөнгөө өгөлгүй “луу унжиж” байна л гэсэн. Ядахдаа тийшээ энэ мөнгийг зарцуулбал бидний үр хүүхэд, хойч ирээдүйд хэрэгтэй бус уу.   

Хятадад газар хөдөлж 381 хүн аминд хүрээд байна

Хятадын Юньань мужийн уулын бүсэд 6.1 магнитудын хүчтэй газар хөдөлсний улмаас 381 хүн амиа алдаж, 1800 гаруй хүн гэмтэж бэртээд байна хэмээн тус улсын эрх баригчид мэдэгдлээ. Олон байшин барилга нурсны дотор сургууль, цэцэрлэг байгаа аж. Харилцаа холбооны дэд бүтэц ихээхэн сүйрчээ. Газар хөдлөлтийн хүч хөрш Гуйяжоу, Сычуань мужид мэдрэгдсэн байна. 

Линдси Лохан компьютер тоглоомын компанийг шүүхэд өгчээ

Н.МӨНХЖИН

Холливудын жүжигчин Линдси Лохан Grand Theft Auto V хэмээх компьютер тоглоомын компанийг шүүхэд өгчээ. Тоглоомын нэг баатрын дүр төрх шуугиант жүжигчин бүсгүйтэй тун адилхан байсан нь ийнхүү гомдол гаргахад хүргэсэн бололтой. Лохан уг тоглоомыг зохион бүтээсэн Rockstar Games болон Take-Two Interactive компанийг Нью-Йоркийн дээд шүүхэд иргэний гомдол гаргаж өгсөн байна. Grand Theft Auto V тоглоомд Лэйси Жонас хэмээх папарацци нараас зугтдаг эмэгтэй байдаг. “Энэ дүрийг бүтээхдээ миний хувцаслалт, нарны шил, малгай, үс засалт, бүр жинсэн шортыг хүртэл дуурайлган ашигласан” хэмээн Лохан шүүхэд өгсөн гомдолдоо онцолсон байна. Grand Theft Auto V тоглоом 2013 оны есдүгээр сард худалдаанд гарснаа хойш зохион бүтээгчиддээ 800 сая долларын ашиг авчраад байгаа юм. Линдси Лохан хэдхэн хоногийн өмнө 28 хүрчээ.

Циркчид амьтан тоглуулахыг хориглосныг эсэргүүцэж байна

Циркийн тоглолтод амьтан ашиглахыг хориглосон шийдвэрийг эсэргүүцсэн циркийн мянга орчим ажилтан Мехико хотын гудамжинд гарч жагслаа хэмээн “ВВС” мэдээлэв. Эрх баригчдын энэхүү харалган шийдвэрийн улмаас циркийн амьтад төдийгүй циркийн жүжигчид ажилгүй хоцорно хэмээн жагсагчид үзэж байна. Шинэ хуулиар, арслан, бар, нохойг циркийн тайзнаа ашиглахыг хоригложээ. Харин далайн гахайн үзүүлбэр, бухны тулааныг зөвшөөрсөн хэвээр үлдээжээ.

Женнифер Лопес нээлтийн ёслолын дууг дуулна

Пуэрто-Рико гаралтай дуучин Женнифер Лопес куба гаралтай рэпчин Питбулл болон бразил бүсгүй Клаудиа Лейте нарын хамт хөлбөмбөгийн дэлхийн аварга шалгаруулах тэмцээний нээлтийн тоглолтын (Бразил - Хорват) өмнөх ёслол дээр “World Cup - 2014”-ын сүлд дууг дуулахаар боллоо хэмээн FIFA-гийн хэвлэлийн албанаас мэдээлэв. Ж.Лопес We are one хэмээх сүлд дууг дуулахаас татгалзсан хэмээх мэдээлэл тархсан ч тэрээр энэ мэдээллийг няцаалгүй удсан юм. Нээлтийн тоглолт “Арена Коринтианс” цэнгэлдэхэд 13-ны үүрийн 04.00 цагт (УБ-ын цагаар) болно.

Бритни Спирс, Кристина Агилерагийн нэрийг хар тамхинд ашиглажээ

Америкийн хар тамхины наймаачид өөрсдийн бараанд нэр өгөхдөө поп оддын нэрийг ашигласан байжээ. Мафийнхан нууцаар тээвэрлэдэг кокаинаа Кристина Агилера хэмээн нэрлэж, крэк хэмээх холимог хар тамхийг Бритни Спирс хэмээн нэрлэж байв. Тэд хар тамхиндаа ийнхүү нууц нэр өгснөөр хууль хяналтын байгууллагаас олон жилийн турш бултаж чадсан юм.

Цагдаагийнхан арван сарын турш уйгагүй мөрдсөний эцэст Нью-Йорк муж дахь хар тамхи наймаалагчдын томоохон сүлжээг илрүүлсэн байна. Мафийнхан поп оддын нэртэй хар тамхийг борлуулахдаа насанд хүрээгүй хүүхдүүдийг ашигладаг байжээ. Цагдаа нар 25 хүнийг баривчилж шүүхэд хүлээлгэж өгөөд байна.

Сноуден жинхэнэ тагнуулчаар бэлтгэгдсэн байжээ

Тагнуулын мэдээлэл цуглуулан хадгалдаг тун хүчтэй програмд нэвтрэн хулгайлсан мэдээллээ олон нийтэд түгээсэн АНУ-ын Үндэсний тагнуулын агентлагийн (NSA) экс ажилтан Эдвард Сноуден тагнуулчаар бэлтгэгдэж, Вашингтоны тусгай алба, тагнуудын агентлагуудад нууцаар ажилладаг байснаа хүлээн зөвшөөрлөө. Америкийн NBC телевиз Москвад очиж хийж, өчигдөр эфирээр цацсан ярилцлагын хэсэг ийнхүү хэвлэлээр тараад байна. Тэрээр бага түвшний, сайн биш шинжээч байсан гэх яриаг эрс няцаасан юм.

“Би тагнуулчаар бэлтгэгдсэн. Энэ үг ямар утгатай байдаг билээ дээ, яг л тэрүүгээр буюу тагнуулчаар бэлтгэгдсэн хүн. Гадаадад дүр эсгэж тагнуулчийн ажлаа хийж, амьдарч үзсэн. Үүний тулд таньж мэддэггүй ажлаа хүртэл хийх гэж оролдож явлаа. Тэр бүү хэл, надад өөр нэртэй паспорт олгож гадаад руу явуулж байв” хэмээн Сноуден ярьжээ. АНУ-ын Төрийн департаментын нууц мэдээллийг ил болгоод эх орноосоо зугтан Орост ирж бүгээд байгаа экс тагнуулч өөрийгөө “техникийн шинжээч” хэмээн тодорхойлов. “Би хүмүүстэй цуг сууж ажилладаггүй. Би тагнуулч элсүүлдэггүй. Миний хийдэг зүйл бол Америкийн нэгдсэн улсад зориулсан үйл ажиллагааны систем, программ хангамжийг хариуцах. Би энэ ажлыг бүр багаас нь  эхлээд дээд түвшинд нь хүртэл ажиллаж байсан” хэмээн Эдвард ярилаа.

Мань эр гадаадад Тагнуулын төв газарт ч, Үндэсний тагнуулын агентлагт ч ажиллаж байсан гэдгээ онцолж хэлсэн юм. Тэрээр “мэдээллийг хадгалах” арга хэлбэр, эх үүсвэрийг хөгжүүлэх тал дээр ажилладаг байв.

Э.Сноуден АНУ-ын төрийн нууц мэдээллийг задруулсныхаа дараа эхлээд Хонконг руу зугтсан юм. Дараа нь Москвад очихдоо 1.7 сая маш нууц баримт, материалыг цахим хэлбэрээр авч очсон хэмээн үздэг. Америкийн Үндэсний тагнуулын агентлаг иргэдийн цахим шуудан, гар утасны дуудлага зэргийг хянаж, чагнадаг байсан тухай мэдээлэл ийнхүү алдагдсан юм. Вашингтоны эрх баригчид хэдэн сая иргэнийхээ интернэтийн хэрэглээг тагнахын тулд тусгай программ, хөтөлбөр боловсруулан ажилладаг нь одоо нууц биш болжээ.

Сноуден албан тушаалаа урвуулан ашигласан, төрийн өмчийг хулгайлсан, үндэсний аюулгүй байдал, батлан хамгаалах чанартай мэдээллийг санаатайгаар тараасан, бусдад дамжуулсан хэрэгт буруутгагдаад байгаа. Тэрээр Орост түр буюу хоёр жилийн хугацаагаар оршин суух эрх аваад байгаа билээ. Сноуден Оросыг орхиж Герман руу гарах санаатай байсан ч бүтээгүй аж. 

“Номын баяр”  хүүхдийн баяртай

Жил бүрийн хавар болдог Номын баяр өнөөдөр “Битлз”-ийн талбайд нээлтээ хийж байна. Энэ удаагийн баяр “Ном - Оюун санааны тусгаар тогтнол” уриан дор болно. Номын баярт тогтмол оролцдог ахмад уран бүтээлч, зохиолч, орчуулагч, ном эрхлэн гаргагчид болон хэвлэлийн газрууд шинэ бүтээлээ уншигчиддаа дэлгэн сонирхуулж, зохиол, бүтээлээ 30 хувийн хямдралтай үнээр худалдах юм.

Мөн номын салбарт үйл ажиллагаа явуулж буй байгууллагууд үйл ажиллагаагаа сурталчлах өдөрлөг, шинэ номын нээлт болохоос гадна хүүхдийн зохиолчид уран бүтээлээ сонордуулж, хүүхэд багачуудад бэлэг барих ажээ. 

Эндрю Вайс: Хориг арга хэмжээ бол зүгээр л үйл явц

АНУ Украины хямралын улмаас ОХУ-ын эсрэг хамгийн түрүүнд хориг арга хэмжээ авсан билээ. Вашингтон Оросын хэд хэдэн түшмэл болон 17 компанийн АНУ дахь дансыг царцаасан юм. АНУ-ын хориг арга хэмжээний талаар Ерөнхийлөгч Билл Клинтоны үед Оросын талаар зөвлөж байсан Эндрю Вайс ярьж байна. Тэрээр эдүгээ Вашинтон дахь Карнеги сангийн дэд тэргүүний алба хашдаг.

-Яагаад АНУ гагцхүү энэ цаг мөчид Оросын эсрэг хориг арга хэмжээ авах болов оо?

-АНУ-ын засаг захиргаа Украинд жинхэнэ хямрал ажиглагдаж эхэллээ гэж үзээд үүнийг шийдвэрлэхэд дөрвөн талаар дэмжих шаардлагатай гэж тогтсон. Киевийн Засгийн газарт тусламж үзүүлэх, Европын холбоотой үйл ажиллагаагаа уялдуулах, эмх замбараагүй байдлаас болгоомжилж байгаа хуучин ЗХУ-ын орнуудыг дэмжих, тэгээд Оросыг үе шаттайгаар тусгаарлаж, ганцаардуулахыг оролдох.

-Энэ тохиолдолд дахиад хориг арга хэмжээ авах бололтой. Вашингтоноос юу хүлээж болох вэ?

-АНУ болон Европын холбоо үйл ажиллагаагаа хэрхэн уялдуулж чадахаас хамаарна. Өөр хүчин зүйл бас байна. Саяхан АНУ-д янз бүрийн яамны мэргэжилтнүүд, тэр тусмаа Цагаан ордны засаг захиргааныхан оролцсон зөвлөгөөн болсон. Тэнд Оросын эсрэг авч байсан урьд өмнийн, одоогийн хориг арга хэмжээ дэлхийн эдийн засагт хэрхэн нөлөөлж буй талаар ярилцсан хэмээн ойлгогдсон.

-Тэгээд яаж нөлөөлж байна гэсэн юм бол?

-Энэ талаар ярихад эрт байна. Үнэлж, дүгнэхэд цаг хугацаа хэрэгтэй. Оросын ааш авир, үйлдлээс их зүйл хамаарна.

-Тэгэхээр өрнөд дараа нь ямар арга хэмжээ авахаа тодорхойлоогүй, шийдээгүй байгаа бололтой..?

-Хориг арга хэмжээ бол зүгээр л үйл явц. Ерөнхийлөгч Барак Обама өнгөрсөн сард Манилад мэдэгдэхдээ, одоогийн хориг арга хэмжээ үр дүнгээ өгөх эсэхийг мэдэхгүй байна гэсэн. Ерөнхийлөгч “нэг зэрэг бүх сумаа тавихыг” хүсэхгүй байгаагаа хэлж байсан л даа. Москва Украины зүүн өмнөд нутагт цэргээ оруулах эсэхийг бүгд хүлээж, харж байна.

-Европын холбоо хориг арга хэмжээг дэмжилгүй АНУ-ыг ганцаардуулна гэж байх уу. Европын холбооны хувьд Америкаас илүү Оростой эдийн засгийн сайн харилцааг эрхэмлэж байж болох талтай. Тэгээд ч Европарламентад тавдугаар сарын сүүлчээр сонгууль болно. Европууд Оросын эсрэг хориг арга хэмжээ авах нь хэр үр дүнтэй юм бол?

-Европын лидерүүд хатуу чанд шийдвэр гаргахыг нөхцөл байдал шаардаад байна. Германы канцлер Ангела Меркел дараагийн арга хэмжээг авахад бэлэн гэдгээ мэдэгдэж байсан. Бусад улстөрч ч энэ талаар дуугарч байна. Хэдийгээр Европын парламентад сонгууль болж, үйл ажиллагааг нь түр саатаад байгаа ч Европын орнууд Оросын эсрэг дахин арга хэмжээ авах ёстой хэмээн үзэж байна.  

М.Кабалье 508 мянган еврогийн татварын өр барагдуулжээ

Дэлхийн дуурийн нэртэй дуучин Монсеррат Кабалье Испанийн Татварын албанд 508 мянган еврогийн татварын өрөө барагдуулж дуусчээ. Тэрээр Андоррад амьдарч байгаа дүр эсгэж тоглолтын орлогоос төлөх татвараа бултуулж байсан нь илэрсэн юм. Кабалье энэ сарын эхээр 300 мянган евро төлөөд байсан бөгөөд өчигдөр 208 мянган евро нэмж Татварын албатай тооцоо дуусчээ. Эдүгээ 81 настай нэрт дуучин татварын өргүй болсон ч татвараас зайлсхийсэн хэргээр шүүхийн танхимд дуудагдаж магадгүй байна. Мөн татвараа цаг хугацаанд нь төлөөгүй хэмээн торгуульд унах бололтой.   

Монсеррат Кабалье дэлхийн бүх алдартай, том театрт уригдаж, Паваротти, Доминго, Каррерас нартай хамтран дуулж байв. Тэрээр 1988 онд Queen хамтлагийн Фредди Меркуритэй хамтран Barcelona хэмээх дууг оркестр хөгжимтэй дуулсан нь тэр үедээ хит болж UK Singles Chart-д дээгүүр орж байжээ. 1991 онд Меркури нас барж, 1992 онд Барселонад зуны олимп болсноор Barcelona сингл болон Монсеррат Кабальегийн нэр хүнд “хаданд гарсан” билээ.

Google хамгийн үнэтэй брэнд боллоо

Америкийн интернет-компани Google дэлхийн хамгийн үнэтэй брэнд боллоо. Тус компанийн үнэ цэнэ өнгөрсөн нэг жилийн дотор 40 хувиар өсч 159 тэрбум долларт хүрч Apple-ийг тэргүүн сэнтийгээс нь буулгалаа. Цахим тоног төхөөрөмжийн Аpple компани гурван жил дараалан дэлхийн шилдэг брэндээр нэрлэгдэж байсан юм. Google компани Google нүдний шил, Android үйлдлийн систем зэрэг технологийн дэвшил гаргаж ирснээрээ лидер боллоо хэмээн Millward Brown Optimor судалгааны байгууллагын тэргүүн Ник Купер ярилаа. Энэ оны дэлхийн шилдэг арван брэндээр IBM, Microsoft, McDonald's, Coca-Cola, Visa, AT&T, Marlboro и Amazon шалгарчээ.

Гэлэнмаа нар хүүхдийн садар самууны эсрэг тэмцэнэ

Шашны байгууллагууд энэ зун Бразилд болох хөлбөмбөгийн дэлхийн аварга шалгаруулах тэмцээний үеэр хүүхдийн садар самууны эсрэг тэмцэл өрнүүлэхээр болов. Бразилд энэ үзэгдэл идэвхжих хандлагатай байгаад итали гэлэнмаа Габриэлла Боттани санаа зовниж байна. Дэлхийн хөлбөмбөгийн аваргын тэмцээн зэрэг олон нийтийн томоохон арга хэмжээний үеэр гэмт хэргийн байдал, хүүхдүүдийг муу зүйлд уруу татах нь эрс нэмэгддэг аж. 2006 онд Германд, 2010 онд Өмнөд Африкт болсон хөлбөмбөгийн хамгийн том баяр, цэнгүүний үеэр хүүхдийг садар самуун зорилгоор ашигласан хэрэг нэлээн гарч байсан хэмээн гэлэнмаа ярилаа. Тэд нисэх онгоцны буудал зэрэг олон хүн цугласан газраас явж мэдээлэл, товхимол тараах ажээ.

“Дэлхийн цом”-ын хуулбарыг сүйтгэжээ

Үл мэдэгдэх балмад этгээдүүд Рио-де-Жанейро хотод хөлбөмбөгийн дэлхийн аварга шалгаруулах тэмцээний аваргын цомын зургаан метр өндөр хуулбарыг шатааж сүйтгэжээ. “Алтан дагина”-ын гоёмёог, том хуулбар хотын гол гудамжийг чимж, аялагч, жуулчдын нүдийг хужирлаж байсан ч ийнхүү байхгүй болжээ. Хөшөө байсан газраас хэдхэн км-ийн зайд Бразилийн шигшээгийн бэлтгэлийн бааз байдаг аж. Зарим сүсэг бишрэлтэй хүмүүс “Бразил аварга болохгүй юм байна” гэж байгаа бол “Харин ч өлзийтэй юм боллоо. Бразил аварга болох юм байна” хэмээн ярих хүмүүс ч байна. Дэлхийн таван удаагийн аварга Бразилийн шигшээ хэсгийн эхний тоглолтоо Хорваттай хийх юм. 

Европыг орлох зах зээлийг Хятадаас хайж байна

Украин дахь үйл явдлын улмаас өрнөдийн хориг арга хэмжээний дарамтанд орсон Оросын Ерөнхийлөгч Владимир Путин Төв азийн орнууд болон  Ирантай аюулгүй байдлын асуудлыг хэлэлцэхээр Шанхай хотноо ирээд байна. Дөрөв дэх жилдээ болж буй эл уулзалтаас дэмжлэг хүлээхээр тооцоолсон Кремлийн удирдагч Хятадын лидертэй уулзаж тус улсад байгалийн хий нийлүүлэх хэдэн тэрбумын гэрээ байгуулах санаатай байна. Хоёр улс энэ төслийг олон жилийн өмнөөс хэлэлцсээр байгаа билээ.

“Хятад бол итгэж болох сайн нөхөр. Хятадтай хамтын ажиллагаагаа өргөжүүлэх нь ямар эргэлзээгүй Оросын нэн тэргүүний дипломат зорилт мөн” хэмээн В.Путин “Синхуа” агентлагийн түгээсэн нэгэн ярилцлагад онцолсон байна. Европын холбоо ч мөн Оросын хийн хоолой дайрч өнгөрдөг Украин дахь улс төрийн тогтворгүй байдлаас үүссэн хохирол, үр дагаварыг даван гарахын тулд хий импортлох өөр эх сурвалжийг хайж байгаа билээ. Хятад ч үйлдвэрлэлийн томоохон бүс болон хотуудынхаа агаарын бохирдлыг багасгаж, нүүрснээс ихээхэн хамааралтай байдаг эрчим хүчний салбараа төрөлжүүлж, хөгжүүлэхийн тулд хүчирхэг хөршөөсөө хий авах ихээхэн сонирхолтой байгаа юм.

Оросын “Газпром”, Хятадын Нефтийн үндэсний корпорац (CNPC) хамтран жилд 38 тэрбум куб метр хий нийлүүлэх чадалтай хоолой барих талаар ярилцаад арваад жил өнгөрч байна. Хэрвээ гэрээг 30 жилээр байгуулах хийгээд энэ өдрүүдэд “эцсийн шатандаа” орсон бол Путин, Си Жинпин нар гарын үсэг зурна. Сибирийн хий дамжуулах төвөөс Владивостокоор дайрч Хятадын зүүн хойд нутаг хүрэх хий дамжуулах хоолой 2014 оны эцсээр баригдаж дуусахаар байна. Өнгөрсөн онд төрийн мэдлийн хоёр компани гэрээ байгуулахад тун ойртсон ч эцсийн мөчид үнэ ханш дээрээ тохиролцож чадаагүй юм. Хоёр тал нэгхэн цифр дээр л санал зөрөлдөөд байгаа хэмээн Reuters мэдээлж байна. Хятадын тал үнийг буулгах сонирхолтой байгаа ч санасандаа хүрч чадахгүй байгаа аж.

38 тэрбум куб метр хий гэдэг нь Хятадын жилийн нийт хэрэглээний 25 хувь юм. Цаашдаа нүүрсний хэрэглээг багасгахын тулд Оросоос жилд 80 тэрбум куб метр хий авахаар тооцоолж байна. Хятад улсын хийн хэрэгцээ 2020 оноос хойш 400 тэрбум куб метрт хүрнэ хэмээн үзэж байгаа юм. 

“Лос Анжелес Клипперс”-ийн эзэн уучлал гуйлаа

НБА-гийн “Лос Анжелес Клипперс” багийн эзэн Дональд Стерлинг арьс өнгөөр ялгаварласан үзэл гаргаж шуугиан тарьсныхаа дараа анх удаа хэвлэлд ярилцлага өгөхдөө уучлалт гуйжээ. “Би арьс өнгөөр ялгаварлагч биш. Би том алдаа гаргасан, тэр алдаа дахиж давтагдахгүй. Би уучлал гуйхаар энд ирлээ” хэмээн тэрээр ярилаа. Калифорнийн клубын тэргүүний суудлаа алдах дээрээ хүрээд байгаа Стерлинг НБА-гийн бусад багийн удирдлагуудад хандаж дэмжлэг хүсчээ.

Стерлинг хар арьстнуудыг доромжилсон ярианыхаа төлөө НБА-гийн тоглолт үзэх эрхээ насан туршдаа хасуулж, 2.5 сая доллараар торгуулсан юм. Тэрээр найз бүсгүйдээ хандаж “Хар арьстнууд байдаг “Клипперс”-ийн тоглолтод намайг битгий авчирч бай. Харуудтай хамт битгий зураг аваад бай” гэх зэргээр ярьж байгаа нь хэвлэл мэдээллийн хэрэгслээр тархсан юм. Стерлингийн мэдэгдлийг сагсан бөмбөгийн олон нэртэй зүтгэлтэн, мөн АНУ-ын Ерөнхийлөгч Барак Обама шүүмжилсэн билээ. НБА-гийн удирдлага мөн Стерлингийн эхнэр Рошельд хориг тавьж, “Лос Анжелес Клипперс”-ийн хувьцааны хяналтын багцыг эзэмшихийг хориглосон гэсэн мэдээлэл байна. 

Г.Г.Маркесийн “Цайлган Эрендира” уншигчдын гар дээр очлоо

Колумбын бичгийн их хүн, Нобелийн шагналт Габриель Гарсия Маркесийн “Цайлган Эрендира болон сэтгэлгүй эмээгийнх нь итгэмээргүй бөгөөд гунигтай түүх” бэсрэг роман эх хэлнээсээ (испани) хөрвүүлэгдэж уншигчдын гарт хүрч байна. Орчуулагч Б.Нямдорж суут зохиолчийн бүтээлийг эх хэлнээс нь монгол руу буулгажээ. Тэрээр хоёр жилийн өмнө Габриель Гарсия Маркесийн бүтээлийг (“Гунигт янхнуудаа дурсахуй” роман) анх удаа эх хэлнээс нь орчуулан уншигчдад хүргэж байсан юм. Дашрамд сонирхуулахад, Г.Г.Маркесийн хамгийн сүүлд бичсэн роман нь энэхүү “Гунигт янхнуудаа дурсахуй”. Түүнээс хойш тэрээр гурван боть дурдатгалаа бичиж эхэлсэн ч эхнийхийг нь бичээд бие нь чилээрхсэн тул бичгийн ажлаа зогсоохоос аргагүй болжээ. 

Колумбын нэрт зохиолч, Нобелийн шагналт Габриель Гарсия Маркес дөрөвдүгээр сарын 18-нд таалал төгсчээ. Гэр бүлийнхэн нь түүний цогцсыг чандарлаж, Мексик, Колумбын хооронд өргөсөн байна.

1927 онд Колумбын Аракатака хотод мэндэлсэн Габо XX зууны Латин Америкийн утга зохиолын нэртэй төлөөлөгч болж, шидэт реализм хэмээх урсгалыг бий болгосон билээ. Үлгэр домгийн гэмээр Макондо хот дахь Аурелиано Буэндиагийн гэр бүл, үр удмын талаар өгүүлдэг “Зуун жилийн ганцаардал” роман энэхүү шидэт реализм хэмээх урсгалыг төрүүлсэн юм. 1967 онд гаргасан энэ бүтээл 1982 онд Нобелийн шагнал авчирсан билээ. 

Балетийн бүжигчин Б.Энхтуул: Өөрийгөө хүндэлж, үнэлдэг хүн

сонгодог урлагийг сонирхож, ойлгодог

Балетийг гоо сайхан, төгс төгөлдөрийн илэрхийлэл гэдэг. Сонгодог урлагийн хаан-балетийг монголчууд ойлгож, сонирхох нь их болсон. Эцэг, эхчүүд ч хүүхэддээ багаас нь балет, төгөлдөр хуур зэрэг сонгодог урлагийн боловсрол олгоход нэлээдгүй анхаардаг болсон билээ. Улсын Дуурь бүжгийн эрдмийн театрын балетийн гоцлол бүжигчин Б.Энхтуултай уулзаж ярилцлаа.

-Таныг манайд байдаг мэргэжлийн цөөхөн хэдэн балетчдийн нэг гэж сонссон. Өөрийгөө танилцуулахгүй юу?

-Намайг Баттөмөрийн Энхтуул гэдэг. Би 1996 онд ОХУ-ын Пермь хотын балетийн сургуулийг төгссөн. Тэнд мэргэжлийн балетийн бүжигчнээр найман жил сурсан. Сургуулиа төгсөж ирээд л Улсын Дуурь бүжгийн эрдмийн театрт ажиллаж байна. Дуурь бүжгийн эрдмийн театрын бүжигчин.

-Гадаадад мэргэжлийн балетийн бүжигчинг багаас нь бэлтгэдэг. Манайд ямархуу байдаг юм бол?

-Тийм ээ. Мэргэжлийн балетийн бүжигчдийг багаас нь сургаж бэлтгэх ёстой. Дөрвөн наснаас нь эхлэн хувийн балетийн сургалтад хамруулж, суурийг нь бага багаар тавьж байгаад 10-12 настайд нь мэргэжлийн сургуульд оруулдаг. Манай Хөгжим бүжгийн коллеж 12 настайд нь хүүхдүүдээ элсүүлдэг. Балет өөрөө маш нарийн мэргэжил. Бусад бүжгийн төрлөөс олон талаараа ялгаатай. Учир нь балет бие бялдрын төгс чанарыг шаарддаг юм. Хамгийн хэцүү нь гэвэл, хүссэн хүн бүхэн тэнцээд байдаггүй. 

-Балет бол хүнд, хэцүү урлаг гэсэн ойлголт байдаг л даа. Балетийн гоё сайхан нь юундаа байдаг вэ?

-Мэдээж сонгодог урлаг амар байна гэж байхгүй. Бух урлаг төгс төгөлдөр, гоо сайхны шаардлага тавьдаг шүү дээ. Бид үүнд тэмүүлэхийн тулд байнгын бэлтгэл сургуулилт хийдэг. Балет өөрөө тайзан дээр тоглогддогоороо онцлогтой. Тиймээс байнга “амьд” тоглолт хийдэг гэсэн үг. Тоглолт бүр дээр төгс сайхан байхын тулд бүжигчин бэлтгэл сургуулилтыг тогтмол сайн хийх хэрэгтэй болдог. Хамаг хүнд хэцүү, дасгал сургуулилт нь бэлтгэлийн танхимд явагддаг юм. Гэхдээ мэргэжилдээ дуртай болохоор тийм хүнд хэцүү санагддаггуй. Харин дасгал сургуулилт хийхгуй удвал бие хөшөөд хэцүү байдаг.

-Балетийн эмэгтэй бүжигчдийн хувьд жингээ барих, хүүхэд төрүүлэх зэрэгт онцгойлон шаардлага тавьдаг уу?

-Бүжигчин хүний хувьд хэдхэн зуун гр нэмэхэд л мэдэгдээд, өөр болоод явчихдаг. Мэдээж гоолиг сайхан бие дээр л бүжгийн уран хөдөлгөөн, өгүүлэмж тод сайхан харагдана. Тиймээс байнга хяналт тавьж байхгүй бол болдоггүй. Харин хүүхэд төрүүлэх тухайд бол ямар нэг хязгаарлалт тавихаа больсон. Хувь хүний зохион байгуулалт их чухал.

-Урлаг, спортын хүмүүс эрт тэтгэвэрт гардаг. Балетийн бүжигчид хэдэн насандаа тэтгэвэрт гардаг вэ?

-Бид 20 жил ажиллаад тэтгэвэртээ гардаг. Тодорxой насанд хүрээд хурд, хүч саараад эхэлдэг юм. Гэхдээ мэргэжлээ үнэхээр сайн эзэмшсэн хүмүүс байлгүй яаxав. Тэд 20 жил бүжиглэсэн ч үргэлжлүүлэн бүжиглэсээр байдаг.

-Балетаараа дэлхийд гайхагддаг улс бол яах аргагүй Орос. Одоо ч хэвээрээ юу?

-Тийм ээ. Гэхдээ бүх юм хөгжиж байгаатай зэрэгцэн сонгодог урлаг ч дэлхий даяар жигдхэн хөгжиж байна. Одоо тэр, энэ улс гэхээсээ тэр театрийн бүжигчид л гэж ярьдаг болсон.

-Одоо гадаадад балетаар сурч байгаа монгол хүүхдүүд байна уу. Монголчууд Вагановын балетийн их сургууль руу их явдаг байсныг санаж байна...?

-Тийм ээ, Ленинградын (одоогийн Санкт-Петербург) Вагановын балетийн сургуулийг манай олон залуус суралцаж төгссөн. Одоо Вагановын нэрэмжит Оросын балетийн академи гэдэг болсон. Тэд одоо ч Улсын Дуурь бүжгийн эрдмийн театрт бүжиглэж байна. Эдүгээ Пермь хотын балетийн сургуульд Монголын 12 хүүхэд суралцаж байна. Тэд дөрөв дэх жилдээ суралцаж байгаа. Би 1996 онд төгссөн. Түүнээс хойш хэдэн жил тасарч байгаад 2009 онд монгол хүүхдүүд тийшээ явсан даа.  

-Та саяхан балетийн бүжгийн сургууль нээсэн гэсэн. Энэ төрлийн сургууль цөөнгүй байх шиг байдаг. Сургуулийнхаа талаар сонирхуулаач?

-Би анх сургуулиа 2007 онд байгуулсан. Харамсалтай нь ажлын хажуугаар амжихгүй учир түр завсарлаад байсан юм. Сонгодог урлагийг үздэг, сонирхдог, түүний бүх сайхан зүйлийг нь мэдэрдэг бүжигчин, суралцагч, үзэгчдийг бэлтгэх нь миний зорилго. Балетээр хичээллэж байгаа төдийгүй балет үзэж байгаа хүмүүс хүртэл нуруу, бие нь тэгшрээд сайхан болоод ирдэг. Хүүхдээ багаас нь сонгодог урлагт дасгаж, үзүүлж, хичээллүүлснээр хүүхдийн  хүмүүжил төлөвшилд эерэгээр нөлөөлдөг. Манай сургуульд балет төдийгүй төгөлдөр хуур, уран зураг, калиграф зэрэг сонгодог урлагийн хэд хэдэн төрлөөр сургалт явуулж байна.

-Бүх насныхан танайд хандаж болох уу?

-Дөрвөн наснаас эхлээд хамрагдаж болно. Томчуудын хувьд насны хязгаар байхгүй. Балетаар хичээллэх хүсэлтэй хүн бүхэн манайд ирж болно. Манай сургууль балетийн таван багштай. Хүүхэд болон насанд хүрэгчдэд зориулж цогц сургалт явуулж байна. Бид City Ballet сургуулиа Шинэ Дөл хотхонд нээсэн. Шинэхэн, тохилог орчинд хүүхдүүдээ хүлээн авч байна. Сонирхсон хүмүүс ......... утсаар холбогдож болно.

-Миний хүүхэд хэдий хугацааны дараа балетчин шиг гоё бие бялдартай болох бол гэж эцэг эхчүүд сонирхдог ... ?

-Тийм ээ. Ингэж асуух хүмүүс олон байдаг. Балетийн үндсэн дасгалууд нь бүжиглэх суурийг нь тавьж өгдөг. Хичээлд яваад нэг сарын дотор л мэдэгдэхүйц өөрчлөлт гарна. Тиймээс эхнээс нь сууриа зөв тавибал үр дүн нь бие бялдар дээр богино хугацаанд мэдрэгддэг юм.

-Улсын Дуурь бүжгийн эрдмийн театрт ням гариг бүр тоглолттой байдаг. Монголчууд балет, сонгодог урлагийг аль хэр сонирхож, ойлгож байна вэ? Таны бодлыг сонирхоё.

-Нэг үеэ бодвол балетийг харьцангуй их үздэг болсон. Тоглолттой өдрүүдэд кассан дээр тасалбар дуусчихдаг. Ер нь хүмүүс ойлгож, сонирхож эхэлж байгаа нь харагддаг. Хүмүүс харьцангуй өөрийгөө боловсруулж, хөгжүүлэхийг хичээдэг болж. Ер нь өөрийгөө хүндэлж, үнэлдэг хүн сонгодог урлагийг үзэж, сонирхож, ойлгодог. Нөгөө талаар, Монголын сонгодог урлаг, балетийн хөгжил олон улсын хэмжээнд явж байгааг хэлмээр байна. Гадаад улс орнуудад тоглогдож байгаа бүхий л балетийг манайд тавьж байна. Гол дутагдалтай тал нь хүн, хүч багатай. Хөгжим бүжгийн коллеж балетийн ангидаа элсэлт авдаг ч жил бүхэн төгсөлт хийдэггүй. Хоёр, гурван жилд нэг удаа төгсөлт хийдэг юм. Сурах хугацааны хувьд ОХУ-д найман жил байдаг бол манайд зургаан жил. Одоогийн байдлаар манайд мэргэжлийн балетийн бүжигчин гэхэд 30 орчим л байна.

Цайлган Эрендира болон сэтгэлгүй эмээгийнх нь итгэмээргүй бөгөөд гунигтай түүх

                                            

                                                        Габриель Гарсия Маркес

Гай зовлонгийн салхи эргэх үед Эрендира эмээгээ усанд оруулж байлаа. Хүчтэй салхины түрүүч орж ирэхэд цөлийн ганцаардалд төөрсөн сар мэт цагаан өнгөтэй том шавар байшин сууриа хүртэл ганхжээ. Гэвч Эрендира болон түүний эмээ тэрхүү байгалийн өршөөлгүй аюул, эрсдэлд зориулж бүтээгдсэн тул олон тогос болон тоглоомон шигтгээгээр чимсэн Ромын үеийн угаалгын өрөөнд байхдаа салхины хүчийг бараг анзаарсангүй. Нүцгэн, том биетэй эмээ гантиг чулуун онгоцон доторх сайхан цагаан халим шиг харагдах аж. Дөнгөж арвандөрөв хүрээд байсан ач охин нь сул дорой, туяхан биетэйн дээр насандаа баймгүй хүлцэнгүй ноомой. Тэрээр гоё үнэртэй навч, ариусгагч ургамал хийж буцалгасан усаар эмээгээ далдын хүч шингэсэн мэт дэндүү удаан, нямбай гэгч булхаж байхад тэдгээр навч, ургамал нь нойтон нуруу, сул мөнгөлөг үс болон усан цэргүүд хайр найргүй шивээс хийж орхисон хүчирхэг мөрөн дээр нь наалдан хоцорч байлаа.

-Би захиа хүлээж байна гэж урьд шөнө зүүдэллээ гэж эмээ хэллээ.

Зайлшгүй шаардлага гараагүй л бол үг дуугардаггүй Эрендира,

-Ямар гаригт тэгж зүүдэлсэн юм бэ хэмээн асуув.

-Пүрэв гаригт.

-Тэгвэл муу мэдээ дагуулсан захиа байж дээ. Гэвч тэр захиа хэзээ ч ирэхгүй хэмээн Эрендира өгүүлэв.

Охин эмээгээ усанд оруулж дуусаад унтлагын өрөөнд аваачлаа. Тэр их тарган лагс тул зөвхөн ач охиныхоо мөрийг, эсвэл хамба ламынх шиг таяг түшин явдаг байлаа. Ингэхдээ ихэд зүдэргээтэй чармайлт гаргадаг байсан нь хүч чадлынх нь үлдэгдлийг харуулна. Бүхэл бүтэн байшин шиг хэтэрхий, бараг солиорсон гэмээр гоёж чимэглэсэн унтлагын өрөөнд Эрендира эмээгээ арчилж тордох гэж хоёр цаг зарцуулжээ. Үснийх нь ширэлдээг ширхэг ширхэгээр гаргаж, үнэртэй ус түрхэж, самнаж, эргэн тойрон цэцэгтэй хувцас өмсгөн, болор нунтган энгэсэг нүүрэнд нь түрхэж, уруулыг нь улаанаар будлаа. Хацрыг нь өнгөлж, сормуусыг нь дэрвийлгэн, хумсыг нь чийдэв. Охин эмээгээ хүний биеэс том хүүхэлдэй шиг гоёж гоодоод хувцсан дээрх цэцэг шиг нь бүгчим, хиймэл цэцэрлэгт аваачиж хааны сэнтий мэт суурьтай өргөн сандал дээр суулган том яндан шиг дуутай хөгжим тавин орхилоо.

Эмээ өнгөрснөө дурсан гиюүрч байх хооронд Эрендира хачин сонин тавилга, санаанаасаа зохиосон Цезарийн хөшөөнүүд, дотор зэвүүцэм аалз, шаазан сахиусан тэнгэрүүд, алтан эмжээртэй төгөлдөр хуур болон янз бүрийн хэмжээ, хэлбэр бүхий цагтай харанхуй, алаг эрээн байшингаа цэвэрлэхээр явлаа. Довжоон дээр нэлээд зайтай булгийн усыг дусал дуслаар олон жилийн турш хурааж дүүргэсэн том сав байх ба хажуугийн дугуй хашаан дотор тэрхүү зэвэргэн хахир шуургыг тэсч гарч чадсан цорын ганц өдтэй амьтан болох эцэж ядарсан тэмээн хяруул байх аж. Гайтай салхи үлээхэд ганцаардаж, цөхөрсөн ухнууд амь тавьдаг, ядуу тарчиг, халуу шатсан гудамжтай зэрэгцэн орших цөлийн гүнд тэрхүү байшин бүхнээс зайдуу байдаг байлаа.

Тэрхүү үл ойлгогдом оромжийг эмээгийн нөхөр, Амадис хэмээх домогт хууль бус наймаачин барьсан юм. Амадис мөн Амадис хэмээх нэртэй нэг хүүтэй байсан нь Эрендирагийн эцэг ажээ. Энэ гэр бүлийн гарал үүсэл, хүсэл зорилгыг хэн ч мэддэггүй байлаа. Ард иргэд ам дамжуулан ярьдаг нэг зүйл гэвэл, эцэг Амадис Антилийн янхны газарт нэгэн эрийг олон удаа хутгалан алж, үзэсгэлэнт эхнэрээ авч зугтаагаад цөлийн гүнд ирж суурьшжээ. Эцэг, хүү Амадис нэг нь халуурч элийрэн, нөгөө нь өрсөлдөгчдийнхөө суманд сийчүүлэн амиа алдахад эхнэр нь арвандөрвөн хөл нүцгэн үйлчлэгч бүсгүйг алж, нөхөр, хүүгийнхээ цогцсыг довжоон доороо оршуулж, мэндлэхээс нь авахуулаад харж өсгөсөн бутач ач охиныхоо асаргаа сувилгааны ачаар нууц байшингийнхаа сүүдэрт агуу мөрөөдлөө хариулан суух болсон юм.

Эрендира цагны баадууг чангалж, тааруулах гэж зургаан цаг болдог байв. Цагны баадуу маргааш өглөө хүртэл хүрэлцээтэй байдаг тул гай зовлон нь эхэлсэн энэ өдөр тэрээр үүнийг хийх хэрэггүй болсон юм. Үүний оронд эмээгээ усанд оруулж, хувцаслаж, шалаа угааж, өдрийн унд бэлтгэж, шилэн эдлэлээ гялалзуулах хэрэгтэй болжээ. Арваннэгэн цаг болж байхад тэмээн хяруулд тавьж өгдөг усыг сольж, эцэг, хүү Амадисын шарилын хажуу талбайн зүлгийг усалж байхдаа тэвчишгүй болж ирсэн салхийг сөрөн зогсох хэрэгтэй болов. Гэвч энэ нь түүний гай зовлонгийн салхи байсан гэдгийг төсөөлсөн ч үгүй. Арванхоёр цагт дарсны хундагануудыг зүлгээд дуусч байтал шөл зөөлөн буцалж буй үнэр гарч гал тогоо руу гүйж явахдаа Венецийн шилэн эдлэлээ золтой л хагалж орхисонгүй.

Ширмэн дээр дэврэн асгарч байсан савыг бушуухан зайлуулж дөнгөлөө. Дараа нь хөшиглөөд бэлдчихсэн махаа гал дээр тавиад гал тогооны сандал дээр суун түр амсхийх зав гарчээ. Нүдээ аниж, дараа нь ядраагүй мэт нүдээ нээн шөлийг том саванд хийв. Тэр унтаагаараа ажиллаж байлаа.