Б.Обама П.Порошенко нар уулзахаар болов

АНУ-ын лидер Барак Обама, Украины Ерөнхийлөгч Петр Порошенко нар НАТО-гийн дээд хэмжээний уулзалтын хүрээнд Варшавт уулзаж ярилцана хэмээн АНУ-ын Үндэсний аюулгүй байдлын зөвлөлийн орлогч дарга Бен Родс мэдэгдлээ. “Украины газар нутгийн бүрэн бүтэн байдал, бүрэн эрхт статусыг дэмжих дахин нэг боломж гарч ирж байна. ОХУ-ын тал хүлээсэн үүргээ биелүүлэхгүй байгаа тул Минскийн тохиролцоог мөрдөж, Оросын эсрэг хориг арга хэмжээг хадгалахад бэлэн гэдгээ илэхийлэх нь чухал” хэмээн тэрээр онцолжээ. Дээд хэмжээний уулзалтын үеэр НАТО-Украины хорооны хуралдаан болж Обама, Порошенко нараас гадна Их Британи, Франц, Итали, Германы лидерүүд оролцох ажээ.

DuPont компани 5.1 сая долларын нөхөн төлбөрт уналаа

АНУ-ын химийн томоохон үйлдвэр DuPont тус үйлдвэрийн химийн аюултай бодистой ус хэрэглэж хорт хавдартай болсон гэх нэг иргэний гомдлоор 5.1 сая долларын нөхөн төлбөрт унаад байна. Охайо мужийн Колумбус хотын шүүх, DuPont компани ундны усны эх үүсвэр болсон тефлоныг үйлдвэрлэхдээ перфторакт хүчил хэмээх химийн бодис ашиглаж усыг бохирдуулсан хэмээн үзжээ. Виржини мужийн Паркерсбург хотын ойролцоо тус компанийн үйлдвэр байдаг аж.

Үйлдвэрээс холгүй орших хотод амьдардаг 56 настай Давид Фриман тус компанийн үйлдвэрлэсэн усыг хэрэглэсээр хорт хавдартай болсон хэмээн шүүхэд гомдол гаргасан юм. DuPont компани перфторакт хүчлийн хор хөнөөлийг мэдсээр байж усны үйлдвэрлэлд ашигласан, мөн химийн бодисын үлдэгдлээ Охайо гол руу асгаж байсан хэмээн шүүхээс үзэж, Фриманд 5.1 сая долларын нөхөн төлбөр олгох шийдвэр гаргажээ.

Месси ял сонссон ч давж заалдана

Испанийн шүүхээс дэлхийн шилдэг хөлбөмбөгч Лионель Месси болон түүний эцэг Хорхе Мессид 4.1 сая еврогийн татвараас зайлсхийсэн хэмээн тус бүр 21 сар шоронд хорих ял оноолоо хэмээн Каталоны El Periodico сонин мэдээлэв. Мөн хоёр сая еврогоор торгохоор болсон аж. Хоёр жилээс бага ял шийтгэл, тэгээд ч анх удаагаа гэмт хэрэгт холбогдсон хэмээн үзээд заавал шоронд эдлэх шаардлагагүй ажээ. Нэрт хөлбөмбөгч 2007, 2008, 2010 онд орлогоо нуун дарагдуулж татвараас зайлхийсэн, санхүүгийн хууль бус ажиллагаа явуулсан хэрэгт холбогдсон юм. “Бид шүүхийн шийдвэртэй санал нийлэхгүй байна. Давж заалдах шатанд бид буруугүй гэдэг үндэслэлээ гаргаж тавина. Месси хууль зөрчөөгүй” хэмээн хөлбөмбөгийн өмгөөлөгч мэдэгджээ.

Финландад 14 мянган гадаадын иргэн жимс хураана

Энэ зун Финландад жимс хураах ажилд гадаадаас 14 мянган ажилчин ирэхээр боллоо хэмээн тус улсын Гадаад хэргийн яамнаас мэдээлэв. Финланд улс сүүлийн хэдэн жилд гадаадаас жимс хураагч нарыг авч байна. Гадаад ажилчдын ихэнх нь Украин, Тайландаас ирэх аж. Тайландын Хөдөлмөрийн яам гэхэд л гурван мянга 500 иргэндээ Финландад ажиллах зөвшөөрөл олгож, визийг нь авч өгчээ. Жимс хураах улирал таримал нэрс болдог долдугаар сарын дундаас эхэлж есөн сар хүртэл үргэлжилдэг аж. 2014 онд байгуулсан хэлэлцээрээр, Финландад жимс хураах ажилд дайчлагдсан гадаадын иргэн бүх татвараа төлсний дараа өдөрт 30 еврогийн цалин авах юм.

Испанид Сан Фермин эхэллээ

Испанийн Памплона хотод жил бүр уламжлал болсон хотын төвийн гудамжаар бух гаргаж хүмүүс хамт гүйдэг Сан Фермин баяр эхэллээ. Долоо хоног үргэлжилдэг энэ баяраар Испани болон дэлхийн өнцөг булан бүрээс ирсэн хүмүүс дуулж, бүжиглэж, галын наадам хийдэг. Баярын хамгийн гол хэсэг нь бухын тулалдааны урлагт тусгайлан үржүүлж буй бухнуудыг гудамжинд гаргаж хүмүүсийг хөөлгөж, хамт гүйх ажээ. Бухнууд болон хүмүүс нийтдээ 850 метр газрыг гүйж туулаад бухын тулааны талбарт орж ирснээр дуусдаг. Нэрт зохиолч Эрнест Хэмингуэй Сан Фермин баярыг дэлхий нийтэд алдаршуулж байсан билээ. 1911 оноос хойш энэ баярын үеэр 19 хүн буханд мөргүүлж, дайруулсны улмаас амиа алдсан байна. 

Крис Браун хэрэг тарьжээ

Америкийн нэрт дуучин Крис Браун Испанийн Барселона хотын Palau Sant Jordi ордонд концертоо тоглож хага авсны дараа тус улсын үзэсгэлэнтэй Ибиза арал дээр найз нөхдийн хамт очиж амарчээ. Тэрээр нэгэн тансаг зусланг хэд хоногоор хөлслөн наргиж цэнгэсэн аж. Гэвч нэрт дуучин амарч, цэнэг авахын оронд хөлсөлсөн байраа бөмбөгдсөн мэт болгож хаячихаад, 26 мянган еврогийн төлбөрөө ч төлөлгүй яваад өгчээ. Крис Браун болон түүний нөхөд ийнхүү байрны хөлсөө төлөөгүйн дээр уг зуслангийн эд хогшлыг ихээхэн эвдэн сүйтгэж, хутгаар ханыг нь сийчэж хаясан байв. Мөн зарим өрөөнд шээж, бөөлжсөн байжээ. Зуслангийн эзэн нийт хохирлоо 60 мянган евро гэж үнэлээд өмгөөлөгчөөр нь дамжуулан нэхэмжлээд байна. 

Багдадад амиа алдсан хүний тоо 250-д хүрлээ

Өнгөрсөн бүтэн сайнд Багдадад болсон дэлбэрэлтэд амиа алдсан хүний тоо 250-д хүрлээ хэмээн эрх баригчид мэдэгдэв. Дэлбэрэх бодистой ачааны машин Эль-Каррада дүүрэгт Рамадан сар дууссаныг тэмдэглэж байсан олон хүний дэргэд дэлбэрсэн юм. “Исламын улс” бүлэг энэ халдлагыг зохион байгуулснаа хүлээн зөвшөөрчээ. Иракт дэлбэрэлт, халдлага гарах нь хэвийн үзэгдэл болсон юм. Гэвч 2003 онд АНУ тэргүүтэй холбоотны цэрэг Иракт нэвтэрч орсноос хойш ийм аймшигтай, олон хүний аминд хүрсэн халдлага гарч байгаагүй билээ. Хоёр жилийн өмнө Иракт үүрэг гүйцэтгэж байсан АНУ болон НАТО-гийн цэргүүд нутаг буцаж, зөвхөн АНУ болон гадаадын дидломат төлөөлөгчийн газрын аюулгүй байдлыг хамгаалах цөөн тооны цэргүүд үлдсэн юм.

Б.Обама Хилларийн уулзалт дээр гарч ирэв

Ерөнхийлөгч Барак Обама Ардчилсан намаас АНУ-ын Ерөнхийлөгчийн сонгуульд нэр дэвших нь тодорхой болоод байгаа Хиллари Клинтоны сонгуулийн өмнөх кампанит ажлын арга хэмжээн дээр анх удаа иржээ. Хойд Каролинагийн Шарлотт хотод болсон цуглаан дээр Обама “Би Хиллари Клинтонд итгэдэг учраас өнөөдөр энд ирлээ. Энэ албан тушаалд хамгийн их тохирсон эрэгтэй, эмэгтэй хүний аль нь ч өмнө нь байгаагүй, хэзээ ч байгаагүй” гэж хэлжээ. Бүгд найрамдах намын нэр дэвшигч Дональд Трампын нэр хүнд өсч буйн улмаас Цагаан ордны эзэн Хилларид ийнхүү дэмжлэг үзүүлэхийг хүссэн бололтой. “Хиллари бол агуу хүн. Энэ бол өнгөрсөнтэйгээ зууралдаад үлдэх үү, ирээдүй рүү алхах уу гэдэг сонголт юм” хэмээн Обама онцолжээ. Ардчилсан нам АНУ-ын Ерөнхийлөгчийн сонгуульд нэр дэвшүүлэх хүнээ долдугаар сарын 25-28-нд Филиадельфид болох их хурлаараа эцэслэн батлах юм. 

Исландын хөлбөмбөгчдийг эх оронд нь баатрын ёсоор угтаж авчээ

Европын хөлбөмбөгийн аварга шалгаруулах тэмцээнийн шөвгийн наймд үлдэж томоохон шуугиан дэгдээсэн Исландын хөлбөмбөгийн шигшээ баг эх орондоо буцаж ирэхэд нийслэл Рейкьявик хотын төвд арваад мянган хүн цугларч баяр хүргэлээ. Тоглогчид задгай автобусанд сууж хотыг тойрсон юм. Исландын хөлбөмбөгийн шигшээ баг Европын аваргын тэмцээнд анх удаа оролцохдоо хэсгээсээ гарч, шөвгийн 16-д хүчирхэг Английн шигшээ багийг хожоод шөвгийн дөрөвт Францын багт хожигдсон билээ. Исланд нь ердөө 329 мянган хүн амтай, шигшээ багийн тоглогчид нь хагас мэргэжлийн, дасгалжуулагч нь гэхэд шүдний эмч хүн ажээ.

Медина дахь лалын сүмийн гадаа дэлбэрэлт болжээ

Саудын Арабын Медина хот дахь лалын сүмийн гадаа амиа золиослогч этгээд бөмбөг дэлбэлж таван хамгаалагчийн аминд хүрчээ. Нар жаргаж, сүсэгтнүүд мөргөлөө эхэлж байх үед дэлбэрэлт болжээ. Нэг этгээд мүсийн урд талын автомашины зогсоол дээр машинтайгаа ирээд шууд дэлбэлсэн байна. Лалын шашны зүтгэлтэн Масжид Набавийн бунхан байдаг Мединагийн сүм нь Меккагийн дараа орох лалын шашны чухал сүм юм. Хамгаалагч нар тэрхүү автомашиныг сэжиглэн шалгах гэж байхад тэр этгээд тэсрэх бөмбөгөө ажиллагаанд оруулсан бололтой. Үүний өмнө Саудын Арабын Жидда хот дахь сүмд, Америкийн консулын газраас холгүй дэлбэрэлт болж хамгаалалтын хоёр ажилтан өртсөн юм. Медина хотод болсон алан хядах ажиллагаа лалын Рамадан баярын үеэр болсон нь дэлхийн лал шашинтнуудын эгдүүцлийг хүргэжээ. “Исламын улс” бүлэг энэ халдлагыг зохион байгуулсан аж.

Египетийн экс Ерөнхийлөгчийг террористуудын жагсаалтад оруулав

Каир хотын эрүүгийн хэргийн шүүх экс Ерөнхийлөгч Мухаммед Мурсийг террористуудын жагсаалтад орууллаа хэмээн Anadolu агентлаг мэдээлэв. Мурсигаас гадна “Лалын ахан дүүс” хөдөлгөөний өндөр тушаалын 35 гишүүнийг шүүхийн шийдвэрээр дээрх жагсаалтад оруулсан байна. Тэдний дунд тус хөдөлгөөний дээд удирдагч Мохамед Бадиа, Египетийн парламентын дарга асан Саад Кататни нар байгаа аж. Зургадугаар сарын дундуур экс Ерөнхийлөгч Мухаммед Мурси болон түүний хоёр хамсаатанд Катарын талд тагнуулын ажиллагаа явуулсан хэмээн бүх насаар нь шоронд хорих ял оноосон юм.

Испани хос түргэн тусламжийн машин дотор гэрлэжээ

Испанид сүйт хархүү, сүйт бүсгүй хоёр түргэн тусламжийн машинд гэрлэсэн тохиолдол гарлаа хэмээн The Local сайт мэдээлэв. Иргэнийн журмаар гэрлэх ёслол долдугаар сарын 2-нд Мадрид хотын захиргааны ордонд болох ёстой байв. Гэвч 50 настай сүйт хархүүгийн даралт ихэсч, бие нь тавгүйрхсэн тул төрөл садан нь түргэн тусламж дууджээ. Эмч нар ирээд мань эрийг үзэж, сайжрах нь уу гэж жаахан хүлээсэн ч эмнэлэгт аваачих шийдвэр гаргасан аж.

Эмч нар гэрлэлтээ хойшлуулах санал гаргасан ч сүйт хархүү “Би зөвхөн энэ л өдөр хайртай бүсгүйтэйгээ гэрлэх учиртай” гэж хэлсэн байна. Ийнхүү хотын зөвлөлийн төлөөлөгч Эстер Гомесийг дуудаж авчраад түргэн тусламжийн машин дотор гэрлэлтээ батлуулжээ. Шинэхэн хос эхнэр, нөхөр болсны дараа будаа цацаж, урт удаан, жаргалтай амьдралыг ерөөгөөд амжсан юм. 

Хүний биеийн тэсвэр, тэвчээрийн хязгаар

Усан дор 73 хоног амьдарчээ

Брюс Кантрел, Жессика Фейн нар 2014 оны сүүлчээр Jules Undersea Lodge буюу усан доорх зочид буудалд 73 хоног амьдарчээ. Теннесийн их сургуулийн багшийн ажилтай хос далай, тэнгисийн амьдралд илүү сайн суралцаж, хамгийн гол нь оюутнуудаа хосгүй мэдээллээр цэнэглэх алтан боломжийг олж авсан юм. Мэдээж тэд усан дор хамгийн олон хоногийг өнгөрүүлж рекорд тогтоосон.

Сансарт 438 хоног

Сансар огторгуйд жилээс илүү хугацааг өнгөрүүлсэн хэд хэдэн хүн байдаг. Гэвч Оросын сансрын нисэгч Валерий Поляков шиг МИР сансрын хөлөг дээр тасралтгүй 438 хоногийг өнгөрүүлсэн (1994-95 онд) хүн байхгүй ажээ.

264 цаг унтаагүй

Оюутан Рэнди Гарднер Стэнфордын их сургуулийн судлаачдын багийн хяналт дор одоо ч эвдэгдээгүй байгаа аварга амжилтын эзэн болжээ. Рэнди ямар нэг өдөөгч, сэргээгч уулгүйгээр 11 хоногийн турш сэрүүн байсан юм. Хэдийгээр тэр рекорд тогтоосон ч эрүүл мэндээрээ хохирч нүүр царай, хэл ярианд нь өөрчлөлт орж, анхаарал тавих, ойлгох зэрэг оюуны чадвар нь суларчээ.

86 цагийн турш хөдөлгөөнтэй

Ким Аллен 2012 онд 86 цагийн турш 499 км замыг зогсолтгүйгээр туулжээ. Тэрээр 2010 онд анхны оролдлогоо хийж 85 цагийн турш гүйж, алхсан ч хөлийнх нь бүх хумс унаснаар зогсож байсан юм. Гэвч дараа нь бие, сэтгэлийнхээ хат, тэсвэрийг дахин баталж, рекордоо эвдэж чадсан билээ.

Усан дор 22 минут

Стиг Северинсен амьдралынхаа үлэмж хэсгийг яавал илүү сайн амьсгалах, амьсгаагаа түгжихэд зориулж, хүмүүст заасаар иржээ. 2012 онд тэрээр усан дор 22 минут байж бараг эвдэгдэхээргүй амжилтыг тогтоосон байна. Северинсен ямар ч тусламжгүйгээр 22 минутын турш шумбаж, усан дор байсан юм. Тэрээр мөн 2010 онд усны хувцас, нүдний шилтэйгээр мөсөн дор 72 метрийн гүнд шумбаж өмнөх рекордыг дөрөв дахин нугалан тогтоож байжээ.

Хятадын өмнөд хэсэгт томоохон жагсаал болов

Хятадын өмнөд хэсгийн Лубу хотод хэдэн мянган хүн оролцсон томоохон эсэргүүцлийн жагсаал болжээ. Нутгийн иргэд ундны усны гол эх үүсвэр болсон Сицзян голын эрэг дээр баригдаж буй хог шатаах байгууламжийг эсэргүүцсэн юм. Зарим мэдээллээр, жагсаалд арван мянга орчим хүн оролцжож, гурван мянга орчим цагдаа эмх журмыг сахиулсан байна. Жагсаалын үеэр эмх замбараагүй байдал үүсч 50 орчим хүн орон нутгийн удирдлагын байранд нэвтрэх гэж оролджээ. Албаны мэдээлээр, 21 хүнийг эмх журам зөрчсөн, танхайрсан хэмээн баривчилжээ. Нэг цагдаа, хоёр иргэн гэмтэж эмнэлэгт хүргэгдсэн байна.

Их Британид ашгийн татварыг бууруулна

Британийн Сангийн сайд Жорж Осборн пүүс, компанийн ашигт оноодог татварыг мэдэгдэхүйц бууруулна хэмээн амлав. Их Британи Европын холбооны бүрэлдэхүүнээс гарах шийдвэр гаргасны дараа улс орны эдийн засагт хөрөнгө оруулалтыг татахад ийм алхам зайлшгүй шаардлагатай хэмээн тэрээр үзэж байгаа аж. Өнөөдөр компанийн ашгийн татвар 20 хувь байгаа бөгөөд үүнийг 15-аас доош хувь болгон бууруулах бололтой. Ингэснээр эдийн засгийн өрсөлдөх чадварыг сайжруулж, үйлдвэрлэлийг нэмэгдүүлнэ хэмээн үзэж байна. 15-аас доош хувь руу буулгаж болохгүй хэмээн тэргүүлэх эдийн засагчид анхааруулж байгаа аж. Их Британийн эрх баригчид 2020 онд ашгийн татварыг 17 хувь болгон бууруулна хэмээн амлаж байсан ч бүх нийтийн санал асуулгын дараа дээрх арга хэмжээнд нэн даруй шилжих шаардлагатай болж иржээ.

Газын зурваст ачаа хүргэх Туркийн хөлөг онгоц Израильд ирлээ

Газын зурваст зориулсан хүмүүнлэгийн ачаатай Туркийн хөлөг онгоц Израилийн Ашдод боомтод иржээ. Хоёр улс зургаан жилийн турш тасарсан харилцаагаа сэргээх тохиролцоонд өнгөрсөн долоо хоногт хүрсний дараа Туркээс далайн замаар Израильд ирж байгаа анхны хүмүүнлэгийн тусламж нь энэ юм.

2010 онд Израилийн тусгай хүчнийхэн Газын зурвасын бүслэлтийн сэтэлж палестинуудад тусламж хүргэх гэж явсан Туркийн идэвхтнүүдийн флотилийн зургаан хөлөг онгоц руу довтолж саатуулсан билээ. Идэвхтнүүд израиль цэргүүдийн өмнөөс буудаж мөргөлдөөн үүссэний улмаас Туркийн арван идэвхтэн амиа алдсан юм. Израиль улс флотилтэй холбоотой хэрэг явдлын төлөө Туркийн талаас уучлал хүссэн ажээ.

Ашдодод ирсэн хөлөг онгоц хоол хүнс, хувцас, тоглоом тэргүүтэй мянган тн ачаатай ирсэн бөгөөд Израилийн газар нутгаар дамжуулж Газын зурваст хүргэх юм. Израиль улс палестин босогчдын гадаадаас зэр зэвсэг авах замыг хаахын тулд 2007 оноос хойш Газын зурвасыг бүслэн хааж байгаа билээ.

Багдадын халдлагад 130 хүн амиа алдлаа

Иракийн нийслэл Багдад хотын төвд автомашинд байрлуулсан бөмбөг дэлбэрч 130 хүний аминд хүрсэн аймшигтай халдлага болжээ. 150 орчим хүн шархдаж гэмтээд байна хэмээн ВВС мэдээлэв. “Исламын улс” бүлэг энэ дэлбэрэлтийг зохион байгуулснаа хүлээн зөвшөөрчээ. Эхний хүчтэй дэлбэрэлт шөнө дундын үед хотын төвийн Каррада дүүрэгт болжээ. Зоогийн газрын гадаа тавьсан автомашин дэлбэрсэн аж. Хоёр дахь дэлбэрэлт хэдэн минутын дараа Багдадын хойд хэсэгт болсон байна. Төвийн хэсгийн Каррада дүүрэгт олон дэлгүүр, зоогийн газар байдаг бөгөөд Рамадан сар тэмдэглэж дуусаад нар жаргасны дараа үргэлж хөл хөдөлгөөн ихтэй байдаг аж. Эрх баригчдын хэлж буйгаар, амиа алдсан, шархадсан хүний тоо нэмэгдэж болзошгүй байна. Иракийн Засгийн газрын цэрэг лалын босогчдын хяналтад байсан улс орны хоёр дахь том хот Фаллужаг эргүүлэн авснаас долоо хоногийн дараа энэ дэлбэрэлт болжээ.

Номын санд амьдардаг муурыг үлдээхээр шийджээ

Техас мужийн Уайт-Сетлмент хотын номын санд зургаан жил амьдарсан Браузер хэмээх муурыг дэлхийн олон орны иргэдийн хүсэлтийн дагуу тэнд нь үлдээхээр боллоо хэмээн Independent сонин уламжлав. Мууранд харшилтай уншигчдын гомдлоор муурыг номын сангаас гаргаж өөр газар аваачих шийдвэр гараад байсан юм. Гэвч Браузерийг номын санд нь үлдээхийг хүссэн 1800 орчим цахим шуудан Герман, Франц, Малайз, Канадаас, Америкаас ирсний дараа хотын зөвлөл яаралтай хурал хийжээ. “Тэр бидэнтэй хамт зургаан жил амьдарсан. Олон номын санд байдаг хулганын асуудлыг шийдэхийн тулд тэр ирж байсан. Браузер энэ асуудлыг шийдсэн” хэмээн Уайт-Сетлмент хотын зөвлөлийн гишүүн ярилаа. Ийнхүү муурыг номын санд нь үлдээхээр болсон ажээ.