Арын нүүүүүүрррттттттт..............

Клинтон рокеруудтай зугаалжээ

Н.Мөнхжин

АНУ-ын Ерөнхийлөгч асан Билл Клинтон өнгөрсөн амралтын өдрөөр Брюс Спрингстон, Пол Маккартни, Жон Бон Жови, Жон Мелленкамп, Pink Floyd-ийн Рожер Вотерс нартай рокеруудын баярт оролцож, “задгай авчээ”. Харин АНУ-ын Ерөнхийлөгчийн сонгуульд Ардчилсан намаас өрсөлдөх магадлалтай байгаа гэргий Хиллари нь зээ охиноо гэртээ хараад үлдсэн аж. Рок үдэшлэгийн дараа болсон хүлээн авалтад уригдсан хамгийн том зочин нь Билл байсан юм. Мөн Мюррей, Брюс Виллис нар хүрэлцэн ирсэн байна. Экс Ерөнхийлөгч цан цохиж after-party үдэшлэгийг нээжээ. Билл Клинтон зочидтой хундага тулган шар айраг ууж, мини гольф тоглон ихэд хөгжилтэй цагийг өнгөрүүлсэн байна. Дашрамд сонирхуулахад, Б.Клинтон саяхан телевизийн нэвтрүүлэгт орохдоо “Танд биелүүлээгүй мөрөөдөл байгаа юу” гэсэн сэтгүүлчийн асуултад “Би Монголд очиж Чингис хаан цэргүүдтэйгээ туулж явсан уудам талаар морь унан давхимаар байна” хэмээн хариулсан билээ.  

Зургийн тайлбар: Клинтон Pink Floyd-ийн Рожер Вотерсийн хамт    

“Исламын улс”-ын 120 дайчин бослого гаргаад цаазлуулжээ

Иракийн Найнава мужид “Исламын улс” бүлгийн 120 гаруй дайчин цаазлууллаа хэмээн Al Sumaria телевиз мэдээлэв. Дайчдыг бослого дэгдээж, бүлгийн лидер Абу Бакр аль-Багдадийг хороох гэж оролдсон хэмээн буруутгажээ. Авлига болон удирдлага, зохион байгуулалтын дутагдал “Исламын улс” бүлгийг дотроос нь хэрхэн идэж, ялзруулж байгааг энэ хэрэг явдал харууллаа хэмээн олон улсын тоймч, ажиглагчид хэлж байна. Тэрслүү дайчдын төлөвлөснөөр бослого, цэргийн эргэлт наймдугаар сарын 30-нд болох байжээ. Гэвч түрүүлж баривчлагдсан таван цэрэг хуйвалдагчдын төлөвлөгөөг илчилж орхисон аж. Үүний дараа 122 дайчин, түүний дотор хээрийн цэргийн 18 командлагчийг Мосул хотын өмнөд биед аваачиж буудаж устгасан байна. “Исламын улс” бүлэг доторх хагарал улам бүр томорсоор байгаа бололтой. Мөнгө, эрх мэдлийн хуваарилалтын төлөөх тэмцэл улам хурцдаж, олон дайчдыг урвасан, тэрсэлсэн хэргээр цаазалжээ.

Өмнө нь “Ирак болон Левантын исламын улс” нэртэй байсан “Исламын улс” бүлэг 2006 оноос хойш Иракт хүчирхэгжиж, нэр нөлөөгөө тэлэх болсон юм. 2014 оны зун тус бүлгийн дайчид Сири, Иракийн газар нутаг дээр хяналтаа тогтоож халифат улсаа зарлан тунхаглаж, Мосул хотыг нийслэлээ болгосон билээ. Дамаскийн Засгийн газарт үнэнч цэргүүд, Сирийн босогчид, Иракийн арми, шийт босогчид, курдын отрядууд болон АНУ тэргүүтэй олон улсын цэргийн эвсэл “Исламын улс” бүлгийн эсрэг тэмцэж, агаараас цохилт өгч байгаа ч олигтой үр дүнд хүрэхгүй байна. Тагнуулын төв газрын мэдээллээр, “Исламын улс” бүлгийн талд 30 мянга орчим хүн байлдаж байгаа аж. 

Майк Тайсон тагтаа тэжээдэг

Хүнд нударгаараа дэлхийд гайхагдаж явсан Майк Тайсон амьтан, тэр тусмаа тагтаа тэжээх тун дуртай. “Амьдралдаа хамгийн түрүүнд хайрласан зүйл бол тагтаа. Яагаад гэдгийг мэдэхгүй. Тагтаа бол миний амьдралын нэг хэсэг. Хөгширсөн хойноо ч тагтаа тэжээсээр байх болов уу. Тагтаануудаа бариад, хараад ярилцах дуртай” хэмээн өгүүлж байна. Жаахан байхдаа нэг тагтааг нь алчихсан дошны атамантай нударга зөрүүлж, намалдгийг нь нээж байсан гэдэг. Алдарт нударгач болох зам нь ингэж эхэлсэн ч гэж ярьдаг билээ.

Бейонс зотон дээр зураг зурдаг

Шоу ертөнцийн жинхэнэ од, үзэсгэлэнт дуучин Бейонс тайзнаас бууж, гэртээ амарч байхдаа ихэвчлэн хүүхдээ бөөцийлдөг. Гэвч зарим үед ээжийн ажлаа ч хойш нь тавьж зотон даавуун дээр зураг зурах дуртай ажээ. Тэрээр муугүй зурдаг гэдгийг ойр дотны найзууд нь баталдаг. Харин зурсан зургаа ер нь зарж , мөнгө болгож байгаагүй. Ганц хоёр удаа л пүүс, компанийн гуйлтаар их биш мөнгөөр зарж, орлогыг нь хүүхэд асрах газарт хандивлаж байжээ.

Селена Гомес юу сонирхдог вэ

Дуучин Жастин Бибертэй найзалж явсан Америкийн залуу дуучин Селена Гомес тун өвөрмөц хоббитой. Тэрээр дэлхийд шагшигдсан байшин, барилга, ордноор зочлохыг ямар ч хоббиноос илүүд үздэг ажээ. Тэр тусмаа хөгшин Европ руу байнга явдаг нь тэнд уран гоё, тансаг ордон, барилга их байдагтай холбоотой. Тэрээр хоббитойгоо холбогдуулж түүх цадиг багагүй судалдгаа нэг удаа ярьж байсан юм.

35 нөмрөг нэхсэн Зета-Жонс

Дэлхийн хамгийн хөөрхөн хүүхэн гэгддэг уэльс гаралтай жүжигчин Кэтрин Зета-Жонс янз бүрийн хувцас хунар нэхэх хоббитой ажээ. Тэрээр нэгэн удаа гэр бүлийнхэн болон дотны найзууддаа Зул сараар бэлэглэхийн тулд нэг дор 35 нөмрөг нэхэж байжээ. Тэрээр зав гарвал юм нэхээд сууж байх дуртай. Тэр тусмаа хэн нэгэнтэй сонирхолтой сэдвээр “буу халангаа” юм нэхэж суух нь жаргал, ядаргаа тайлах шилдэг арга хэмээн үздэг байна. 

Э.Амарсайхан: Месси, Роналдо хоёрыг одоо харахгүй бол хэзээ харах юм

Хөлбөмбөг болон бусад спортын үнэнч фэнүүдийн мөрөөдлийг биелүүлэхийн тулд ажиллаж байгаа спортын сэтгүүлч Э.Амарсайхантай ярилцлаа. - Испанийн алдарт Барса, Реал-ын тоглолтыг үзүүлэх гэж байна сонслоо...? - Тийм ээ, манай ATB Travel компани бол зөвхөн спортын арга хэмжээний аялалыг зохион байгуулах зорилгоор байгуулагдсан. Яагаад зөвхөн спорт аялал гээд байгаагийн учир нь хамгийн бага зардлаар дэлхийн тэргүүлэх зэргийн уралдаан, тэмцээнийг үзүүлэх зорилготой юм. - Яагаад заавал Испанийг, Барса, Реалыг сонгож авав? Английн Премьер лиг гээд асар хүчирхэг лиг байна шүү дээ? - Испани, Англи гээд аль аль нь хөлбөмбөгийн хөгжлөөрөө, лигээрээ тэргүүлдэг улс. Эхний ээлжинд Испанийг сонгож авсан нь бас учиртай. Месси, Роналдо гээд бараг сүүлийн 10 жилд дэлхийд ноёлсон шилдэг хоёр хөлбөмбөгч Испанийн Ла Лигад тоглодог. Мөн сая Европын шилдэг хөлбөмбөгчийн шагналд энэ хоёртой зэрэгцэн нэр дэвшсэн Луис Суарес байна. Магадгүй хоёр жилийн дараа ч юм уу Месси, Роналдо хоёр ид үеийнхээ шилдэг тоглолтыг үзүүлж чадахаа болих байх л даа. Тиймээс хөлбөмбөгийн үнэнч фанатуудаа Испани руу авч явж энэ хоёрын тоглолтыг үзүүлэе гэж бодсон юм. Хөлбөмбөгт шимтэн дурладаг хэн ч энэ хоёр агуу тоглогчийг хажуунаас нь харж, бөмбөгөөр хэрхэн наадахыг харахыг хүсдэг биз ээ. Тэгээд ч Барсагийн Камп Ноу, Реалын Сантьяго Бернабеу бол Европ байтугай дэлхийд тэргүүлэх гоё, том цэнгэлдэх л дээ. Тийшээ орж үзсэн хүн бүр дуу алдан шагшдаг юм. - За тийм байж. Мэдээж энэ аялалын үнэ хөлс л уншигчдад хамгийн сонин байгаа болов уу? - Бид энэ аялалаараа Ла Лига болон Аваргуудын лигийн гурван тоглолт үзүүлнэ. Мөн цэнгэлдэхийн аялал, музей болон энгийн жуулчдын үздэг гол гол газруудыг тухайн хотод нь үзүүлэх болно. Аялалын үнэ 4.7 сая төгрөг . Үүнд 2 талын тийз, буудал, унаа болон тоглолтуудын тасалбар багтаж байгаа. Та зөвхөн өдрийн хоолны болон халаасны мөнгөтэйгээ явахад болно. Нэг зүйлийг онцлоход манай энэ аялал аялал жуулчлалын компанийн санал болгодог үнээс 30-40 хувь хямд байгаа. - Ийм хямд аялал зохион байгуулах хэрэг байгаа гэж үү? - Зөв асуулт л даа. Бид эхний ээлжинд ашиг харахгүй байгаа. Зөвхөн спорт аялалаар дагная, олон хөгжөөн дэмжигчдээ баярлуулъя гэсэн үүднээс энэ аялалыг зохион байгуулж байгаа гэдгээ хэлмээр байна. Энэ дөрвөн сая 700 мянга гэдэг үнэ бол яг тулсан үнэ гэж ойлгоход болно. Интернэт, харилцаа хөгжчихсэн үед Европ руу аялах ямар үнэтэй байдаг, тоглолт хэрхэн үздэг гэдгийг хэн ч тооцоолоод гаргачихна, харчихаж болно л доо. Бид тооцоо хийж үзээд хамгийн бага боломжит үнийг гаргасан. Испанийн Мадрид, Барселона хот хөлбөмбөгийн багаараа алдартай төдийгүй жуулчдыг ихээр татдаг маш гоё хот. Тэнд үзэх юм асар их бий. Бид хөлбөмбөгийн тоглолтын хажуугаар тэдгээр гайхамшгуудыг үзүүлэх болно. - Яг ямар ямар тоглолт үзэх вэ? - Аваргуудын лигийн Реал Мадрид – Шахтар Донецк, Валенсиа – Зенит, Ла лигийн Барса - Левантэгийн тоглолт үзнэ. Аваргуудын лигийн хэсгийн сугалаа гарсан учир манай аялалын тоглолтууд ч тодорхой болсон байгаа. Нэг зүйлийг нэмж хэлэхэд манай аялалын бас нэг давуу тал нь бид аялал болгоноороо нэвтрүүлэг бэлдэж дараа нь телевизээр гаргана. Тэгэхээр энэ аялал нь хөгжөөн дэмжигчдийн хувьд дахин давтагдашгүй мөч, дурсамжаа нэвтрүүлэгт мөнхлөх боломжийг олгож байгаа юм. Спортын үйл явдал бол тухайн үедээ л болоод өнгөрдөг, дахин давтагдашгүйгээрээ онцлог, ховор шүү дээ. - Үнэхээр гоё сонсогдож байна. Санаа, зорилго үнэхээр сайхан юм. Цаашдаа олон ажил төлөвлөж байгаа биз дээ? - Тийм ээ. Спорт аялал жуулчлал маань дан ганц хөлбөмбөг дээр тогтолгүй дэлхийн хэмжээний спортын томоохон үйл явдлуудыг ч онилж байна. Ирэх аравдугаар сард Япон, арваннэгдүгээр сард Францыг зорьж авто спортын хаан Формула 1-ийн уралдааныг үзүүлье, Сумогийн башёг үзье орчинтой нь танилцъя, дэлхийд алдартай Феррари, Порше, Ламборгини зэрэг хөлгүүдийг унуулъя гэх зэрэг аялалууд эхний ээлжинд төлөвлөгөөнд орсон. Английн Премьер лигийн хувьд бид арванхоёрдугаар сард төлөвлөгөөндөө оруулсан байгаа. Тэр үеэр онцгой мөч нь таардаг учраас тэгж тааруулж байгаа юм. Манайд ПЛ-ийн фанатууд их байдаг, хайртай багийнхаа тоглолтыг газар дээрээс нь үзэх, цэнгэлдэх хүрээлэнтэй нь танилцах сонирхол их байдаг учраас арванхоёрдугаар сарын аялалын төлөвлөгөөг удахгүй дэлгэрэнгүй танилцуулна. Ирэх жил ЕАШТ Францад болно, мөн Риогийн Олимп байна. Эдгээр томоохон уралдаан тэмцээнийг үзэх хүсэлтэй монголчуудынхаа мөрөөдлийг биелүүлэхэд туслана.

Түймэрт өртсөн хүний тоо 260-д хүрлээ

Саудын Арабын Эль-Хубар хот дахь Saudi Aramco нефтийн компанийн ажилчдын цогцолбор хотхонд гал түймэр гарсны улмаас арав гаруй хүн амиа алдаж, 260 орчим хүн түлэгдэж гэмтжээ. Энэ тухай Reuters агентлаг тус улсын Иргэний хамгаалалтын яамны мэдээллээс иш татан мэдээлэв. Амь үрэгдсэн иргэдийн гурав нь канад, Пакистан, Нигерийн нэг нэг иргэн байгаа аж.

Египет байгалийн хийн импортоо зогсооно

Египет улс Газар дундын тэнгист байгалийн хийн томоохон орд газар илрүүлсний дараа хийн импортоо 3-5 жилийн хугацаанд зогсоох болсноо мэдэгдлээ. Тус улсын Нефть, эрдэс баялгийн яамны төлөөлөгч Хамди Азиз “Сая илэрсэн орд нь 1967 оноос хойш олдсон хамгийн том орд. Египетийг 10 жил хангах нөөцтэй. Энэ хугацаанд бид гадаадаас хий авахгүй байх бодолтой байна” хэмээн ярилаа. Израиль улс өөрсдийн “Левиафан” ордоосоо Египетэд хий нийлүүлэхээр төлөвлөж байсан юм.

Rolls-Royce Бразил дахь авлигын хэрэгт холбогджээ

Тансаг зэрэглэлийн автомашин үйлдвэрлэгч Британийн Rolls-Royce фирм Бразилийн нефтийн Petrobras компанийн авлигын хэрэгт оролцсон бололтой. “Бид Бразилд явагдаж буй мөрдөн шалгалттай хамтран ажиллаж байна. Мөрдөн шалгалт үргэлжилж байгаа тул дэлгэрэнгүй зүйл ярих боломжгүй. Rolls-Royce компани ямар ч төрлийн гэмт хэрэгт оролцох ёсгүй” хэмээн Британийн фирмийн мэдэгдэлд онцолжээ.

Бразилийн өндөр тушаалын хүмүүсийг хахуульдсан хэрэгт унаад байгаа Petrobras-ийн менежер авлигын хэрэгт хамсаатнаар оролцсон компаниудыг нэрлэсний дотор Rolls-Royce байгаа аж. Petrobras-ийн авлигын хэргээр Бразилийн экс Ерөнхийлөгчийг шүүхэд дуудаад байна.

Де Хеа 40 еврогоор зарагдсан бололтой

Энэ зунжингаа яригдсан нэгэн наймаа эцсийн эцэст тохиролцоонд хүрсэн бололтой. Зуны наймааны цонх хаагдаж буй сүүлчийн өдөр Английн “Манчестер Юнайтед”, Испанийн “Реал Мадрид” тохиролцоонд хүрч хаалгач Давид Де Хеа 40 еврогоор Эзэн хааны клубт ирэх нь тодорхой боллоо хэмээн Independent сонин дамжуулав. Английн клуб энэ наймаанд “Реал”-ын уэльс довтлогч Гарет Бейлийг оролцуулах гэсэн боловч испаниуд зөвшөөрөөгүй аж. Сэтгүүлчид Де Хеагийн наймаа бүтсэн эсэхийг дасгалжуулагч Ван Галаас асуухад тэрээр “Бид арилжаа наймаа хийхийг хүсвэл л дуугаръя. Сэтгүүлчдийг хүсэхээр л дуугардаг байж болохгүй биз дээ” хэмээн хариулжээ.

Грект сонгууль болоход 20 хоног үлдлээ

Европын холбооны шүдний өвчин болоод байгаа Грек улсад сонгууль болоход 20 хоног үлдээд байна. Хэд хоногийн өмнө гэнэт огцорч буйгаа мэдэгдэж, хугацаанаас өмнө сонгууль зарласан Ерөнхий сайд асан Алексис Ципрас бүх санал асуулгыг тэргүүлсэн хэвээр байна. Тэрс үзэлтэн Паниотис Лафазанисийн байгуулсан шинэ эвсэл хамгийн хүчтэй өрсөлдөөнийг үзүүлэх бололтой. Грекийн парламент радикал голдуу найман намаас бүрдэх магадлал их байгаа бөгөөд шинээр бүрдэх Засгийн газар улс орноо аврах ямар хатуу арга хэмжээ авахыг хэн ч таамаглаж чадахгүй байна. Шинэ Засгийн газар бүрэлдэж чадахгүй байх ч дүр зураг харагдаж байгаа юм.

Судалгаанаас үзэхэд өнөөдөр Грекийн радикал болон консерватив намын нэр хүнд бараг ойролцоо байна. Ципрасын тэргүүлдэг Syriza нам нэгдүгээр сараас хойш долоон сар төр барихдаа олон сонгогчийнхоо итгэлийг алджээ. Алко компани тандалт явуулахад, сонгогчдын 79 хувь нь Ципраст хууртагдсан, 77 хувь нь түүний ажилд хангалтгүй гэсэн дүн тавьжээ. Энэ хооронд түүний долоон сарын настай Засгийн газрын ажлын үзүүлэлтүүд гарч байна. 25.7 хувьтай байсан ажилгүйдэл 28 хувьд хүрчээ. Грек улс ханган нийлүүлэгчиддээ төлбөр хийж чадахгүй хэвээр, долдугаар сарын байдлаар улсын нийт өр дөрвөн дүнчүүр 595 тэрбум евро байна. Энэ хугацаанд улсын төсөвт орж ирсэн орлого дөнгөж 26.8 тэрбум байсан нь төлөвлөснөөс 12.8 хувиар бага байна. Нэгдүгээр сараас хойш дөнгөж гурван тэрбум еврогийн өр барагдуулжээ.

Алексис Ципрасын засаглалын долоон сард бодлого, чиглэл тодорхой бус, Засгийн газрын муу ажиллагаа болон хөрөнгийн хяналтыг хэрэгжүүлэх бодлогын улмаас улс орны эдийн засаг улам хүндэрсэн хэмээн эдийн засагчид хэлж байна. Эдийн засгийг нэг хувиар өсгөнө хэмээн тооцоолсон ч бүтэлгүйтжээ. Грект цорын ганц нааштай зүйл байгаа нь аялал жуулчлал. Тус салбар улс орныг авч явж буй гол хөдөлгүүр болсон хэвээр байна. Энэ онд 26 сая жуулчин хүлээн авахаар тооцоолсон нь урьд өмнө байгаагүй тоо юм. Мөн Европын холбооноос үзүүлж буй гурав дахь ээлжийн тусламжийн эхнийхээр Европын Төв банкинд 3.2 тэрбум еврогийн өрөө төлсөн нь бас нэг амьсгаа авахуулж байна.

Хамгийн энх тунх орон

Н.Мөнхжин

Lancet сэтгүүлд нэгэн сонирхолтой судалгаа нийтлэгджээ. Дэлхийн хамгийн эрүүл, энх тунх, иргэд нь урт насладаг орнуудыг жагсаасан байна. Олон улсын эрдэмтэд дэлхийн 18 хөгжингүй орны сүүлийн 20 жилийн эрүүл мэндийн тоо баримтыг судалж доорх жагсаалтыг гаргажээ. Иргэд нь хэдэн нас хүртлээ эрүүл саруул амьдардаг болон дундаж наслалт гэсэн хоёр үзүүлэлтийг гол болгосон байна.

Ингээд хамгийн энх тунх зургаан орныг жагсаавал:

1.    Испани: Эрүүл амьдралын дундаж нас-70.9; иргэдийн дундаж наслалт-81.4

2.    Итали: Эрүүл амьдралын дундаж нас-70.2; иргэдийн дундаж наслалт-81.5

3.    Австрали: Эрүүл амьдралын дундаж нас-70.1; иргэдийн дундаж наслалт-81.5

4.    Швед: Эрүүл амьдралын дундаж нас-69.6; иргэдийн дундаж наслалт-81.4

5.    Канад: Эрүүл амьдралын дундаж нас-69.6; иргэдийн дундаж наслалт-80.6

6.    Франц: Эрүүл амьдралын дундаж нас-69.5; иргэдийн дундаж наслалт-80.9

Зургийн тайлбар: Мадрид хот

Нохойнд эгдүүцэхдээ гурван хүний аминд хүрчээ

Португалд буудалцаан болж нэг эр гурван хүний аминд хүрсний хоёр нь цагдаа хэмээх ВВС мэдээлэв. Эл хэрэг явдал нийслэл Лиссабоноос 30 км-ийн зайд орших Дуконде тосгонд болжээ. 77 настай нэгэн эр хөршийнхөө нохойны хуцах, боргох чимээнд эгдүүцэж, нохойгоо дуугүй болгохгүй бол эзнийг нь ална хэмээн заналхийлжээ. Улмаар хэрүүл маргаан дэгдэж цагдаа ирсэн байна. Тэтгэврийн хөгшин дуудлагаар ирсэн цагдаагийн толгойд буудаж хөнөөжээ. Дараа нь нохойн эзнийг хөнөөж, хүч нэмэгдүүлж ирсэн цагдааг буудаж шархдуулсан байна. Шархдсан цагдаа эмнэлэгт очоод нас баржээ. Гэмт этгээд ангийн буугаар амиа егүүтгэхийг завдсан ч түүнийг баривчлаад байна.

М.Платини: Ойрын үед Крымд очиж болох юм

Европын хөлбөмбөгийн холбооны тэргүүн Мишель Платини мөдхөн Крымд очиж, орон нутгийн хөлбөмбөгийн аварга шалгаруулах тэмцээнийг үзэх боломжоо үгүйсгэсэнгүй. “Магадгүй ойрын үед би Крымд очих байх. Яагаад болохгүй гэж? Крымийн хойг өөрийн гэсэн лигтэй болвол бид их баярлах болно. Бүс нутагт хөлбөмбөг хөгжиж байвал UEFA-гийн хувьд сайн, чухал зүйл болно” хэмээн Платини ТАСС агентлагт ярьжээ.

Ким Чен Ун харамсал илэрхийлэв

Хойд Солонгосын лидер Ким Чен Ун Мүүн шашныг үндэслэгч Мун Сон Мений нас барсны гурван жилийн ойг тохиолдуулж харамсал илэрхийлэв. “Дэлхийн энхтайвны холбооны тэргүүн асан, ноён Мун Сон Мений нас барсны гурван жилийн ойг тохиолдуулж тус холбооны Ерөнхийлөгч Хан Хакче болон гэр бүлд нь эмгэнэл илэрхийлье” хэмээн Ким Чен Ун мэдэгдсэнийг орон нутгийн хэвлэлүүд уламжилж байна. Шашны зүтгэлтэн Мун Сон Мен улс орныг нэгтгэхийн тулд олон зүйл хийсэн, эдүгээ Дэлхийн энхтайвны холбоог тэргүүлж буй Хан нөхрийнхөө үйл хэргийг үргэлжлүүлнэ гэдэгт итгэж буйгаа Пхеньяны лидер мэдэгджээ. Мун Сон Мен нь Хойд Солонгост төрсөн бөгөөд 34 насандаа одоогийн Өмнөд Солонгост очиж Эв нэгдлийн сүмийг үүсгэн байгуулсан юм.

Иран “Исламын улс”-ыг өөгшүүлнэ гэв

Ираны цөмийн хөтөлбөрийн асуудлаар Иран болон зургаан улс тохиролцоонд хүрсэн нь Тегераны талд террорист хөдөлгөөнийг дэмжин, өөгшүүлэх боломж олгож байна хэмээн Израилийн Ерөнхий сайд Биньямин Нетаньяху мэдэгдлээ. “Ираны эсрэг хоригийг цуцалж, Иранд хөрөнгө оруулалт орж ирснээр тэд Ойрхи Дорнод, Хойд Африк болон бусад оронд террорист, түрэмгий үйлдлээ явуулах хэдэн зуун тэрбум доллартай болно” хэмээн Б.Нетаньяху Италид айлчлах үеэрээ онцолжээ. Тэрээр Иранаас ирж буй аюулыг “Исламын улс” бүлгийн заналхийллээс ч илүү ноцтой хэмээн үзэж байна. 

Египетийн шүүх гурван сэтгүүлчийг шийтгэв

Египетийн шүүх Катарын “Аль-Жазира” телевизийн гурван сэтгүүлчийг шийтгэж хорих ял оноолоо. Тэднийг зөвшөөрөлгүй ажилласан, төр улсад хохирол учруулсан баримт материал тараасан хэмээн буруутгажээ. Шүүхийн сандалд Канадын иргэншил аваад удаагүй байгаа египет гаралтай Мохамед Фахми, Бахер Мохамед нар суусан байна. Гурав дахь шүүгдэгч, Австралийн иргэн Питер Грест хоёрдугаар сард Египетийн газар нутгаас хөөгдсөн бөгөөд түүнд эчнээ ял оноосон аж.

Эдгээр үнэнч лал шашинтнууд яагаад Египетийн төрийн дайсан болон хувирав?

Энэ гурав өмнө нь Ерөнхийлөгч асан Мохамед Мурситай нягт холбоотой ажилладаг байсан “Лалын ахан дүүс” байгууллагад тусалсан, хамтарч ажилласан хэргээр 7-10 жилийн ял сонсож байжээ. 2013 онд Мурсийг эрх мэдлээс түлхэн унагаж, хэрэгт татсаны дараа “Лалын ахан дүүс” хөдөлгөөнийг терроризмийн хэрэгт буруутган, үйл ажиллагааг нь хориглосон юм. Сүүлийн 30 жилийн турш Египет болон хөрш лалын орнуудад ихээхэн нэр нөлөөтэй байсан энэ байгууллага ийнхүү төгсгөл болсон билээ. Канад улс өөрийн иргэнээ даруй суллахыг Египетийн эрх баригчдаас шаардаж, Австралийн иргэн Грестийн адилаар Египетээс гаргаж явуулахыг хүсчээ.

Каирийн шүүхийн гаргасан шийдвэр хэвлэл мэдээллийн эрх чөлөөнд дахин довтолсон явдал боллоо хэмээн “Аль-Жазира” телевизийн удирдлага мэдэгдэв. “Энэ бол Египетийн шүүхийн системийн түүхэн дахь хар өдөр боллоо. Ажлаа хийж явсан сэтгүүлчдийг шийтгэсэн нь байж боломгүй” хэмээн тус телевизийн мэдэгдэлд онцолжээ. АНУ-ын эрх баригчид Египетийн шүүхийн шийдвэрт ихээхэн санаа зовниж, гайхаж буйгаа илэрхийлээд, шийдвэрийг эргэн харахыг эрх баригчдад хандан уриалжээ. “Чөлөөт хэвлэлийг мөрдөж, мөшгиж, шүүхээр шийтгэж байгаа нь ихээхэн маргаан дагуулж байна. Ардчилсан хөгжилд чухал үүрэг гүйцэтгэдэг чөлөөт хэвлэлийг ийнхүү залхаан цээрлүүлж байгаа нь туйлын буруу” хэмээн Төрийн департаментын төлөөлөгч Жон Кирби мэдэгджээ.

Цэргийн эрх баригчид Ерөнхийлөгч Мохамед Мурсийг гэрийн хорионд оруулж, улмаар эрх мэдлээс зайлуулсны дараа лалын хөдөлгөөний олон мянган гишүүнийг баривчилсан юм. Тэдний зуу орчимд нь цаазын ял оноосон билээ. Египетийн шинэ лидер Абдель-Фаттах аль-Сиси радикал үзэлтнүүд, мөн аядуу лалуудын эсрэг хатуу бодлого баримталж байгааг дэлхий нийт ихээхэн шүүмжилж байгаа. Тэрээр  мөн либерал сөрөг хүчин, иргэний нийгмийн хөдөлгөөнийг хавчин хяхаж, хүчний байгууллагуудын эрх мэдлийг нэмэгдүүлэх болсон юм. Каирийн шүүх тавдугаар сарын 16-нд Ерөнхийлөгч асан Мурси болон түүний 105 хамсаатанд ялын дээд хэмжээ оноосон билээ. Мохамед Мурсийг 2011 онд “Лалын ахан дүүс” хөдөлгөөний лидерүүд шоронгоос оргоход хамтарсан хэргээр шийтгэсэн юм. Лалын олон лидер шоронгоос мултарснаар Египетэд аллага, хүчирхийлэл гаарсан хэмээн шүүх үзжээ.